Hoseya 7:14 - Bhiblia Yo Sawuleka

¹⁴ Se kha va dila kwangu ngu timbilu tawe, kambe va txi keta va di hamatahoni kwawe; va tshanganete fulaho ni vhinya, aniko ani va ni tshuralete.

Hoseya 7:14 Referans Kwoze

Jakobe 4:3

Hambi mi txi kombela, kha mi amukeli txilo, nguko kha mi kombeli ngu fanelo: Asi mi kombelako, mi kombela sa kutsakisa minavelo yo biha ya mmidi.

Jeremiya 3:10

Hambi keto, Judha, ndiyakwe wo mbi thembeka, kha wuya ngu mbilu yakwe yotshe, aniko ngu wuviyaku, kuwomba Mkoma.”

Vafilipiya 3:19

Magwito awe ngu kulova, nguko Txizimu txawe ngu mrumbu wawe. Va ti kukumukisa ngu sile si va thelako tingana, va khutalela tithomba ta mafu dwe.

Zakariya 7:5

Gela votshe vathu va ditiko diya, ni votshe vaphaxeli, u txi khawe: Mbimo yile mi nga ti tona, ni kudila, ka mtxima wa wutxhanu ni wa wutxhanu ni yimbidi, mndani ka malembe awa a mtxhanu wa magumi ni magumi mambidi, ina anu mi ti tonete ani, ngu ditshuri mi ti tonete ani kani?

Amosi 2:8

Va otelako kumweko ka ni txihi txiluvelo, ka simaha sa minandu, ka tinyumba ta sizimu sawe, ve sela vhinya ya va vo diha minandu.

Isaya 29:13

Nguko Mkoma a ti khene: Vathu vava koko va tshuketa hafuhi ni nani, se va ni dhumisa ngu sisofu, aniko timbilu tawe ti kule ni nani, ni txithavo txawe kwangu, nja kulondeta milayo ya vathu dwe, ayi va nga gondiswa yona;

Mika 2:11

Ku txo maneka wokari wa zumbelo ya walo, e hemba a txi khene: Ani ni na ku profetela ngu vhinya ni wusuke wa mtamo; eyo a na va mprofeti wa vathu vava.

Isaya 65:14

wonani taku sithumi sangu si na embelela ngu kutsaka ka timbilu ta sona, aniko anu mi na peka tihuwa ngu kupandiseka ka timbilu, mi na yowe, ngu kuxaniseka ka moya;

Valamuli 9:27

Vona va to huma va txi ya thembweni kasi kuya elula mivhinya yawe, ve phwarasela mauvha awe, ve maha mibuso, va txi wulela dithepeleni ka txizimu txawe, amu va nga ya dyela kona ni kusela kona va txi ruketela Abhimeleki.

Jakobe 5:1

Engisani, anu vanyatithombe, dilani mi txi peka tihuwa ta hombe ngu makhombo awa ma no mi wela.

Varoma 16:18

Nguko ava vo ngeto kha va thumeli Mkoma wathu Jesu Kristu, kambe va thumela masusu awe dwe; va hambukisa timbilu ta va vo divala ngu mapswi o tshamba ni kukanganyisa.

Amosi 8:3

Kambe ditshiku diya wu embeleli wa mathepele u na engiswa, kuwomba Mkoma Txizimu. Sirumbi si na tala ngutu, si na tshotshwa va di malate ka otshe makhalo.

Hoseya 13:16

Samariya a na maha txiwula, nguko a wukete Txizimu txakwe; Va na dawa ngu ditxhari, vanana vawe va na phatulelwa, se vasikati vawe va sirumbu va na bhandiswa ngu hagari.

Hoseya 3:1

Se Mkoma a to khene kwangu: Tsula kambe, u ya randa wamsikati, digelegele da mngana wako, dile i ku txigango, kufana ni Mkoma a randako vanana va ka Israyeli, hambiko vona va rendekelako ka simwani sizimu, va randako simbwanda sa mauvha.

Isaya 52:5

Se konkuwa, nji txani ni no txi maha, kuwomba Mkoma, nguko vathu vangu va ñotwe, va si nga ni mnandu kani? Avale va va fumelako va peka tihuwa, kuwomba Mkoma; se ditina dangu da ruketelwa, ngu ha ku si gwitiko, ditshiku ni ditshiku.

Eksodha 32:6

Mangwanani ka kona ni mixo, va to wuka, va txi humisa miningelo yo hiswa, ni miphaxo ya kudikha. Vathu votshe va to khalahatsha va txi dya ni kusela; msana keto, va to khukha ve humula.

Sidilo 2:18

Guleta dipswi u txi dila ka nyamne wa sotshe! Awe diguma da mwanana wa dihorana wa Siyoni! Mirongo yako yi na khulunge wusiku ni mitshikari nga txinambwana. Maso ako ma nga thuke ma txi humula, u nga leke kudila.

Hoseya 8:2

Se va na dila kwangu, va txi kha vona: “Txizimu txangu! Athu va ka Israyeli, ha kuziva.”

Hoseya 13:6

Msana keto, va ti khurisile ngu sa wudyiseloni kwawe; mbimo yi va nga khura va tikulisile timbiluni kwawe; ngu kumaha keto, va ni divate.

Jeremiya 12:2

Awe u va phayile ve zima mitwi; ve kula, ve ninga mihando. Awe u hafuhi ni sisofu sawe, aniko u kule ni timbilu tawe.

Hoseya 13:9

Kasi ku ni kukomba ti to u mwalate, awe Israyeli, u ni wukete, u wukete m'vhuni wako.