Hoseya 13:14 - Bhiblia Yo Sawuleka

¹⁴ Ani ni na va tirula amu ko xaniswa ngu mndilo, ni va tekisa ka lifo. Awe lifo, yi hayi mitungu yako kani? Awe mndilo ku hayi kutimela kwako kani? Kutilaya ku na sisala amu ka maso angu.

Hoseya 13:14 Referans Kwoze

Isaya 25:8

A na fuvisa lifo ngu ha ku si gwitiko, ngu kumaha keto, Mkoma Txizimu, a na bahula mirongo ka totshe tikhohe, kambe a na thavisa tingana ta vathu vakwe kotshe ha mafuni, nguko Mkoma a wombile.

Mtuletelo 21:4

Se Txizimu txi na bahulela yotshe mirongo tikhoheni kwawe; kha ku na mbi swa ku txi maneka kambe lifo, hambi kudila, hambi tihuwa, hambi kupandiseka, nguko so khata si pindile.”

Jakobe 1:17

Sotshe sihiwa sa lisima, sotshe siningo sa kuhetiseka, si ta ngu txitimwi, si txi txhika ngu ka Tate wa liwoningo, awu a ku si nga ni kutxitxa, awu kuwoninga kwakwe ku ku si nga ni kutxitxa ku txi maha txidema.

Isaya 26:19

Vafi vako va na hanya, vafi vako va na wuka; vhumukani, kambe giyani, anu mi zumbako lithuluni, nguko mwando wako, awe Txizimu, wu na fana ni mwando wa mwasi, se mafu ma na tshotsha mapune vafi.

Masalmo 49:15

Kambe Txizimu txi na tirula wutomi wangu, txi na wu hulukisa mtamoni ka lifo.

Masalmo 30:3

Mkoma, awe u ni hulukisile ka lifo; u ni hanyisile, ani se ni nga ti relete diphalani.

Jobe 33:24

sekoko yi na tsetsa m'thu, yi txi kha yona ka Txizimu: Mtxhatxhe, a nga relele diphalani; se ni mani txo mtekisa ngu txona.

Varoma 11:29

Kasi siningo sa Txizimu ni kudhanwa ngu txona kha si na kutshumelela msana.

Masalmo 86:13

nguko wunene wako mbwa hombe kwangu; u ni ponisile ka diphala da lifo!

Masalmo 16:10

Awe Mkoma, khu na mbi ni leka ka wukhalo wa vafi, kambe khu na mbi tumela ti to msawuleki wako e sina diphalani.

1 Samuwele 15:29

Kambe awule i ku Mtamo wa va ka Israyeli kha hembi mwendo kutilaya; nguko hi nga m'thu waku a na tilaya.

Mtuletelo 20:13

Linene li to tshumeta vafi va va nga ti ka lona. Lifo ni Hadhesi si to ningela vafi va va nga ti ka sona, se mmwani ni mmwani a to lamulwa mandingano ni mithumo yakwe.

1 Vatesalonika 4:14

Nguko, akuwa mi kholwako ti to Jesu a fite e tshumela a txi wuka, ngu toneto hi fanela kukholwa ti to ni vale va nga otela ngu maotelelo a Jesu, Txizimu txi na va teka kumweko nayo Jesu.

2 Vakorinto 5:4

Nguko hi di ngadi mdhuteni muwa, i ku mmidi wathu, ha vilela ngu kunemelwa, na i si nga ti to ho lava kuhuma ka mmidi wathu wa ha mafuni: Aniko hi lava ti to hi txi ambekwa mmidi wathu wa nzumani, kasiku asi si fako si na mitwa ngu kuhanya:

Varoma 11:15

Nguko akuwa kutshuralelwa kwawe ngu Txizimu ku nga hinduka ku txi maha kuhuluka ka ditiko, ina kutshumela kwawe ve wuya kuhundulukani kha ti na mbi fana ni kuwuka ka vakufa kani?

Malakiya 3:6

Nguko ani Mkoma, kha ni txitxi; ngu mhaka yeto, anu vanana va ka Jakobe, kha mi loviswi.

Hoseya 6:2

Msana ka masiku mambidi, a na hi ninga wutomi; ngu ditshiku da wuraru a na hi wusa, hi hanya masoni kwakwe.

Masalmo 71:20

Awe u nga ni maha ni wona wubihi wawungi ni sixaniso, u na ni ninga kambe wutomi u na ni humisa diphalani ko hokoma ka mafu.

Mitengo 23:19

Txizimu kha txi na makuhu nga m'thu. Lambi, txona hi nga mwanana wa m'thu wo txitxa-txitxa. Txizimu hi nga txo womba dwe txi si mahi, ina kha txi mahi ti txi nga womba kani? Kasi hi nga txo womba ti txi tatiseka kani?

Vafilipiya 3:21

Ene a na phindula mmidi wathu wa wusiwana, a txi wu maha wu txi fanana ni mmidi wakwe wa wudhumo, a txi wu ninga mtamo wo fana ni wule ene a fumako ngu wona sotshe simaha.

Jeremiya 15:6

U ni lekile, kuwomba Mkoma, u tshumelete msana. Ngu konaho, ni nawulutile dianza dangu, ni kulovisa. Ni karate ngu ku kudivalela.

Mtuletelo 6:8

Ni to wona ku txi humelela dihantxhi do kwalala. Mgadhi wa dona a ti dhanwa ku i “Kufa,” se a ti londetelwa ngu Gehena. A ningilwe mtamo wa kufuma didhawa da wumune da mafu, kasiku e daya vathu ngu ditxhari, ni nzala, ni ntungu ni sihari sa txitinga.

Jeremiya 20:16

Se m'thuyo a na fana ni madhoropa aawa Mkoma a nga ma hasamula, na asi ti layi. Kambe ene a napfe tihuwa ni mixo, ni huwa ngu mbimo ya mitshikari.

Jeremiya 31:35

Mkoma a khene, awu a ningako ditambo kuwoninga ditshiku, ni kuleletela mtxima ni tinyeleti ha wusikuni, a bhandako linene ni kudhindisa mavimbi a lona; ditina dakwe Mkoma wa Mabutho a Tiyimbi.

Ezekhiyele 37:9

Se Mkoma a to khene kwangu: Profeta ka moya, profeta awe mwanana wa m'thu, u txi khawe ka moya: Mkoma Txizimu a khene: Ngono ngu ka mune wa madhawa awe moya, u txi ta futeta txitmwi ka vava vofa, kasi kuva txi hanya.

Jobe 41:22

Mtamo wa yona wu ha thamoni; masoni ka yona hambi kuhenya ka tutuma.

Masalmo 49:16

U nga khatale ngu wule a sengeletelako tithomba, hambi wu a engetelako nduma ya m'ti wakwe.

Hoseya 7:10

Se kutikulisa ka Israyeli mbu fakazi masoni kwakwe; hambi keto, kha va na mbi tshumelela ka Mkoma, Txizimu txawe, hambi ku mlava ka totshe tiya.