Hoseya 11:6 - Bhiblia Yo Sawuleka

⁶ Se ditxhari di nata txitimwi ka madhoropa awe, di nata fuvisa sikhweketo sa tisimbi, kambe di na va lovisa, ngu mhaka ya makungo awe.

Hoseya 11:6 Referans Kwoze

Hoseya 13:16

Samariya a na maha txiwula, nguko a wukete Txizimu txakwe; Va na dawa ngu ditxhari, vanana vawe va na phatulelwa, se vasikati vawe va sirumbu va na bhandiswa ngu hagari.

Hoseya 10:14

Ngu toneto, hagari ka vathu vako ku na wuka dizunga da hombe, se yotshe mikhokhola yako mi na hoxotwa, ku nga Salimani a nga hoxota Bheti-Arbheli ngu ditshiku da yimbi; mame ahale a phatuletwe ni vanana vakwe.

Hoseya 10:6

Nene Asiriya a na tekwa ku nga txiningo ka mfumeli Jerebhi; Efrayime a na vhilinganyeka, se Israyeli a nawa tingana ngu mhaka ya milayo yakwe apune.

Malakiya 4:1

Nguko wonani taku ditshiku dile, dita di txi tura nga m'dhikila; votshe va va ti kulisako ni votshe va va mahako wubihi, va na nga mwasi, se ditshiku di di nota di na va tshokomisa, kuwomba Mkoma wa Mabutho a Tiyimbi, taku kha di na mbi va siyela mkoloti, mwendo didhavi.

Mika 5:11

ni na khundumusela madhoropa a ditiko dako, ni ku wisetela yotshe mikhokhola yako;

Ezekhiyele 20:47

Womba ka txitinga txa Wulambwe u txi khawe: Engisa dipswi da Mkoma: Mkoma Txizimu a khene: Wona taku ni na dhivela mndilo ngu kwako, awuwa ngu kwako wu no tshokomisa yotshe mindonga yo nakana ni mindonga ya kuoma; dituro da kona kha di na mbi timeka; di na hisa totshe tikhohe, kukhukhela Wuphemba kala Wulambwe.

Jeremiya 5:17

Vona va na dya siyalo sako ni dipawu dako; va na daya vafana vako ni sihoranana sako; va na dayela tinvuta tako ni tihomu tako, va na dya mivhina yako ni mixanvu yako. Madhoropa ako a mikhokhola awa u ma thembako, va na ma lovisa ngu ditxhari.

Isaya 30:1

Dikhombo ka vanana va i ku vakaneti, kuwomba Mkoma, ava va nga mana wudhota, va si wu mani kwangu! Kambe va nga ti vhikela ngu txivhikelo txova i si nga Moya wangu, kasi kuengetela txionho ka txionho.

Isaya 27:10

Nguko didhoropa da mtamo di sate dokha, dizumbo do lambwa ni kulekwa kufana ni txiwula; eyo va na dyisela kona marole, kambe ma na otela kona, me dya madhavi a kona.

Isaya 18:5

Nguko kusanzi kufunyelwa, mbimo yile makhukhu ma nga thunga, se mauvha amambisu ma txi vitwa, sekoko, Txizimu txi na wilela mindonga, kambe txi na thavisa madhavi, txi txi ma tshatulela.

Isaya 9:14

Ngu mhaka yeto, ka Israyeli, Mkoma a na wila msungo ni mkila, lidhavi ni sihuvani, ngu ditshiku dimwedo.

Masalmo 106:43

Sikhati so tala Mkoma a va hulukisile, aniko vona va eyisile makungo akwe, ve ti beta ngutu mu kubihani kwawe.

Masalmo 106:39

Ka toneto ni vona va ti nyenyezisile ngu mithumo yawe ve maneka va sa thembeka ka Txizimu.

Dhewuteronome 32:25

Hahanze va na dawa ngu ditxhari, nyumbani va na dawa ngu dizowa; votshe va na fuva: Mazambi ni mahorana, vanana vo mama, hambi ni vo kumba va tinvi.

Dhewuteronome 28:52

Wona wu na kurandela amu ka madhoropa ako otshe, kala kuza ma txi khundumuka maguma o demba a madhoropa ako otshe o tsana, aawa u nga ti ma themba amu ka dotshe ditiko dako, wu na kurandela ka otshe madhoropa ako, amu ka dotshe ditiko dile Mkoma, Txizimu txako, a ku ningako.

Levhi 26:33

Ni na mi hangalasa amu matikoni, ni txi mi fuvisa ngu matxhari, ditiko danu di na maha txiwula, madhoropa anu ma na maha marumbi.

Levhi 26:31

Madhoropa anu ni na ma maha marumbi, ni khundumusela makhalo anu o nyenyeza, na mbiswa ni txi tsakela mafura a miphaxo yanu, o bhumula.

Jeremiya 50:35

Di nata ditxhari txitimwi ka Vakaldheya, kuwomba Mkoma, ni txitimwi ka Bhabhilona, ni txitimwi ka vathangeli vawe, ni txitimwi ka titxhari tawe.

Sidilo 2:9

Matimba akwe ma fayetetwe; Mkoma a khundumusete ni kufunyeletela matimba a tisimbi; mfumeli wakwe ni vathangeli va kona va ka matiko o mbi na milayo, kuve vaprofeti kha va mani txiwoniso ni txatximwetxo ngu ka Mkoma.

Hoseya 4:16

Nguko va ka Israyeli va ni kanu kufana ni homu ya makati ya kanu; konkuwa Mkoma a na va dyisa kufana ni txinvutana ka wukhalo wo anama.

Hoseya 4:17

Efrayime a ningetwe ka sithombe; mlekeni.

Amosi 6:8

A xambanyile Mkoma Txizimu, ngu dihika dakwe, Mkoma, Txizimu txa Mabutho a Tiyimbi, a khene: Na nyenya kutikulisa ka va ka Jakobe, ni venga ni tinyumba tawe ta wukoma; na ningela didhoropa ni sotshe si si ku ka dona.

Levhi 26:25

Nguko ni na rumela matxhari txitimwi kwanu, kasi ku ta photela txitumelelano txangu; ka mbimo yile mi no maneka mi di sengeletanile didhoropani kwanu, ni na rumela mtungu hagari kwanu, ni kumaha ti to mi txi ningelwa manzani ka valala vanu.