Hoseya 11:10 - Bhiblia Yo Sawuleka

¹⁰ Mi na tsimbila ngu msana ka Mkoma; se ene a na bhonga ku nga ngonyamo; ene a txi bhonga, vanana va Mswa-ditambo va na dhudhumela.

Hoseya 11:10 Referans Kwoze

Amosi 1:2

Se Amosi a to khene: Mkoma a na bhonga a di Siyoni, se a di Jerusalema, a na pfalisa dipswi dakwe; amu va zumbako kona vadyisi, ku nava ni kudila, kambe ku na oma tshokani ka mmango wa Karmeli.

Joyeli 3:16

Se Mkoma a na bhonga a di Siyoni. Dipswi dakwe di na pfala Jerusalema, se nzuma ni mafu si na dhudhumela; aniko Mkoma a na va wuthavelo wa vathu vakwe ni mkhokhola wa vanana va ka Israyeli.

Isaya 31:4

Nguko Mkoma a ni gete tiya: Kufana ni kubhonga ka ngonyamo ni ka txingonyamwana, na ti di mani mpfimba wa tona, hambi ti txi rambelwa dibutho da vadyisi, kha ti dhukiswi ngu mapswi awe, hambi kututuma ngu kuthava wungi wawe. Ngu toneto, Mkoma wa Mabutho a Tiyimbi, a na txhika kuya lwela mmango wa Siyoni, ni tximangwana txa kona.

Jeremiya 25:30

Awe koko, u na profeta kwawe totshe timhaka tiya, u txi khawe kwawe: Mkoma wa dhuma-dhuma ngu txitimwi, wa pfalisa dipswi dakwe ngu nyumbani kwakwe ko Sawuleka; ngu kuthisisela, a na dhuma e wukela dizumbo dakwe, wa peka huwa ya litsako, nga mrukuti wa mauvha, a txi wukela vazumbi votshe va ha mafuni.

Jeremiya 31:9

Va na wuya va txi dila, ni txi va heleketa na va txi khongela; ni na va thangela minamboni ka mati, ngu nzila yo basa, eyo va na kwa mbi huma ka yona; ngu ku ni ku tate ka Israyeli, matiwula angu ngu Efrayime.

Isaya 64:2

U txi nga mndilo wu hisako tikhuni, wu halisa mati, kasi ku ditina dako di zivaneka ka valala vako, ngu kumaha keto, matiko ma na dhudhumela masoni kwako.

2 Pedro 2:10

ngutu-ngutu avale va londetelako kunavela ka nzambwa, va txi ti ningela ka minavelo yo nyenyeza, va txi eyisa ni wuhi wukoma. Vathuvo va ti themba ngutu, va ti kukumukisa, kha va thavi kuruketela sivangwa so sawuleka sa txitimwi.

Varoma 8:1

Sekonakuwa kha ku nga ngadi ho kuabaniswa ka vale va ku ka Kristu Jesu.

Mithumo 24:25

Kota ngako a nga txi womba ngu ta kululama ni ta kutiñola, ni ta kulamulwa ku kutako, Felikisi a to dhuka, se a txi khene: “Tsula; ni na kudhana ngu yimwani mbimo.”

Johani 8:12

Jesu a to tshumela a txi womba-womba ni vathu, a txi va gela ku khene: “Ani ni liwoningo la ditiko. Awu a ni londisako, kha tsimbili txidemani, kambe a na va ni kuwonekela ka wutomi.”

Zakariya 10:12

Se ani ni na va tsanisa ka Mkoma, kambe va na tsimbila ditinani kwakwe, kuwomba Mkoma.

Zakariya 8:7

A womba tiya Mkoma wa Mabutho a Tiyimbi: Wona taku ni na hanyisa vathu vangu, va ditiko da Wutxani ni va ditiko da mswa ditambo;

Habhakuki 3:16

Ni di ti engisile ani, mndani kwangu kudhuka, ngu dipswi dakwe txisofu txangu txi dhudhumete; kuwulete kusina marambuni kwangu, se ni dhudhumela mndani kwangu; na humula ani ka ditshiku do pandiseka, ngako ni txi nata lwa ni vathu vale va nota hi hoxota.

Mika 4:5

Nguko votshe vathu va na tsimbila, mmwani ni mmwani ngu ditina da txizimu txakwe, aniko athu hi na tsimbila ditinani ka Mkoma, Txizimu txathu, yotshe mbimo ngu ha ku si gwitiko.

Amosi 3:8

Yi bhongile ngonyamo, i mani wu a na kwa mbi thava kani? A wombowombile Mkoma Txizimu, i mani a na kwa mbi profeta kani?

Amosi 3:4

Ina ngonyamo yi nga bhonga txitingani na yi sa ñola txilo kani? Hambi txingonyamwana txi nga guleta dipswi diphalani na txi sa ñola txilo kani?

Hoseya 3:5

Msana keto, vanana va ka Israyeli va na tshumela ve lava Mkoma, Txizimu txawe, ni Dhavhidha, mfumeli wawe; ka masiku o gwita va na thava Mkoma ni wumbilu wakwe.

Jeremiya 33:9

Se adiya didhoropa di na va da ditina da litsako ni kudhumisa ni wudhumo, hagari ka otshe matiko a ha mafuni, ma no pfa wotshe wunene wu ni mmahelako; kambe va na xamala, ni kudhudhumela, ngu mhaka ya wotshe wunene, ni mhaka ya kotshe kuthutha, aku ni di ningako.

Jeremiya 7:9

Ina mi ngadi mi txi napa, mi daya, mi maha wugango, mi xambanya makuhu, mi hisa miphaxo yo bhumula ka Bhahali, ni kulondetela simwani sizimu asi mi si si ziviko kani?

Jeremiya 7:6

ngako mi si xanisi muwuyi, txisiwana ni noni, ngako mi si theketi mnoha wa va va singako ni mnandu ka wuwa wukhalo, hambi ni kulondetela simwani sizimu, miva ni makhombo ngu kota yawe;

Jeremiya 5:22

Ina kha mi ni thavi kani? Kuwomba Mkoma; kha mi na mbi dhudhumela masoni kwangu kani? Ani wu ni nga veka mtxhefa kuva muhingano wa Linene wa kala kupinduka, ti taku li si sikoti ku wu ndaka. Hambi mavimbi ma txo peka ngu mtamo kha ma sikoti ku wu xula; hambi li nga dhindadhinda ngu mtamo kha li na mbi pinda.

Jeremiya 2:2

Tsula, kwangula tinzeveni ka Jerusalema, u txi khawe: Mkoma a khene: “Na alakanya wunene wa wuphya wako, Ni lirando lako mbimo yi u nga wutwa ngu yona; mbimo yile u nga ti ni londetela txiwulani, Ka ditiko di ku nga sa phaywa txilo

Isaya 49:10

Kha va na mbiswa va txi pfa nzala, mwendo ditora, hambi txiwunda mwendo ditambo, kha si na mbi va xanisa, nguko awule a ku ni wumbilu navo, a na va tsimbitisa, e va yisa ngu kuthutha sisimani ka mati.

Isaya 42:13

Mkoma a na huma kufana ni ndena, kufana ni m'thu wa yimbini, a na wusa kukhatala; a na kwangula, e maha diguwa da hombe, kambe a na veka hahatshi valala vakwe.

Isaya 2:5

Ngonani, anu va nyumba ya ka Jokobe, he tsimbileni kuwonekelani ka Mkoma.

Masalmo 119:120

Mmidi wangu wa dhudhumela ngu dizowa masoni kwako, ngu txithavo txi ni ku natxo ka mithetho yako!

Masalmo 2:11

Thumelani Mkoma Txizimu ngu txithavo, mi txi mtsakela ngu kudhudhumela.

Jobe 37:1

Se ngu mhaka ya eto, mbilu yangu ya dhudhumela, yi ndaka ngu ha ka wukhalo wa yona;

Mtuletelo 10:3

Se yi kwangula ngu dipswi da hombe, nga kubhonga ka ngonyamo. Mbimo yi yi nga bhonga, ku to pfala kudhinda ka singwalangwanda sa mtxhanu ni simbidi.

Isaya 66:2

Nguko dianza dangu di mahile sotshe simaho siya, se sotshe simaha siya si to mahwa, kuwomba Mkoma; aniko wonani awu ni no muwona: Ka txisiwana, ni wule wo xaniseka moyani, kambe a dhudhumelako masoni ka dipswi dangu.

Isaya 66:5

Engisani dipswi da Mkoma, anu mi dhudhumelako masoni ka dipswi dakwe. Vananu vale va mi nyenyako, kambe va mi tshotshako kule ngu kuranda ditina dangu, va kha vona: “Mkoma a na dhumiswe, kasi ku hi wona kutsaka kwanu!” Aniko vona va na wiswa tingana.

Ezekhiyele 26:16

Se vathangeli va lineneni va na txhika ngu situluni kwawe ka wukoma, kambe va na thavisa sifenengelo sawe, ve ambula simaha sawe so lukelwa; va na ambekwa kudhudhumela, va khalahatsha ha mafuni, va txi dhudhumela yotshe mbimo; kambe ngu mhaka yako, va na xamala.

Isaya 11:11

Nguko ti na maheka tito, ka ditshiku donedo, a na nawuluta kambe dianza dakwe e teka miboti ya vathu vakwe vale va nga sala Asiriya, ni Egipta, ni Patro, ni Etiyopiya, ni Elame, ni Sinari, ni Hamati, ni sitondoloni ka linene.

Jeremiya 50:4

Ka masiku onayo ni ka yona yile mbimo, kuwomba Mkoma, vanana va ka Israyeli va nata, kumweko ni vanana va ka Judha; va na wuya va txi dila, va na lava Mkoma, Txizimu txawe.

Zakariya 10:10

Nguko ni na va wuyisa ngu ditikoni ka Egipta, ni va sengeleta ngu Asiriya; ni va tisa ka ditiko da Gileyadhi ni da Libhanoni, kambe kha ku na mbi maneka wukhalo wo va lumba.