Hoseya 10:8 - Bhiblia Yo Sawuleka

⁸ Se mimango ya Avheni, i ku txionho txa Israyeli yi na khundumuswa; mipa ni maxexo si na kula txitimwi ka siluvelo sawe; se va na kha vona ka mimango: Hi fenengeteni! Se ka simangwana: Welani txitimwi kwathu!

Hoseya 10:8 Referans Kwoze

Luka 23:30

Sekoko ka yoneyo mbimo, va nata gela mimango va txi kha vona: ‘Welani txitimwi kwathu!’ Ka situnga va nata kha vona: ‘Hi khubhunyeteni!’

Mtuletelo 6:16

Ve gela mimango ni marigwi va txi: Khundumukani mi txi hi khubhunyeta, mi hi sisa ka khohe ya wu a nga khalahatsha ha txikhaloni ka wukoma, ni ka kuhenya ka Txinvutana,

Isaya 2:19

Sekoko vathu va na wulela tiphakoni ka marigwi, ni mu ka maphala a mafuni, ngu mhaka ya kuthava Mkoma, ni kudhumiswa ka wuhombe wakwe, ngako a txi khukha kasi kuxamalisa ditiko.

Hoseya 9:6

Nguko wona taku vona va tsute ngu mhaka yo hoxotwa, kambe Egipta a na va amukela, Menfisi a na va tshotsha; kunavela ka silivhela yawe ku na fenengetwa ngu maxexwe, ni mipa yi na mila matendani kwawe.

Amosi 8:14

Ava va xambanyako ngu wubihi wa Samariya va txi kha vona: Ndinene ngutu kuhanya ka txizimu txako awe Dhani; kambe ndinene ngutu kuhanya ka nzila ya Bherisebha; vonavo va nawa, kha va na mbi khukha kambe.

Isaya 32:13

Txitimwi ka ditiko da vathu vangu, ku na mila sihaha ni sitxhotxhota, kumweko ni txitimwi ka totshe tinyumba to tsaka ka tona, ka didhoropa di di ndakandakako ngu kutsaka.

Mtuletelo 9:6

Ka oneyo masiku, vathu va na lava lifo, kambe va si li mani; va na navela kufa, kambe lifo li na tutuma li va siya.

Mika 1:13

Sunga sihari sa sidotho aha ka txikotxikani, awe u zumbako Lakisi (aawa ngu ona makhato a txionho txa mwanana wa dihorana wa Siyoni), nguko kuta ngu kwako, kuhambunyeta ka Israyeli.

Mika 1:5

Totshe eto ngu mhaka ya ku ti lambisa ka Jakobe, ni sionho sa nyumba ya ka Israyeli; ngu kuhi ku ti lambisa ka Jakobe kani? Ina hi nga ka Samariya kani? Ngu ahi makhalo o guleka a Judha kani? Hi nga Jerusalema kani?

Hoseya 10:5

Vahanyi va Samariya va dhuswa ngu dirole da Bheti-Avheni, ngu kumaha keto, vathu va kona va na tilaya ngu mhaka yakwe, kufana ni vaphaxeli vawe (va nga ti tsaka ngu dona), se ngu mhaka ya wudhumo wu nga khukha ka dona.

Hoseya 10:2

Timbilu tawe ti abanekile; ngu kumaha keto, va na va ni mnandu; a na wilela siluvelo sawe, e khundumusa ni sifananiso sawe so wumbwa.

Hoseya 5:8

Vetani dikhombela kona Gibheya, ni mpundu kona Rama; kwangulani ngutu kona Bheti-Avheni; Ti wonele msana kwako awe Bhenjamini.

Hoseya 4:15

Se awe Israyeli, u txi lava ku ti mwalata, Judha a nga ti ninge mnandu; mi nga teni Giligali, kambe mi nga kweleleni mi ya Bheti-Avheni, ni ku mi nga xambanyeni mi txi khanu: “Mkoma a hanyako.”

Hoseya 4:13

Va phaxela titshokani ka mimango, ve hisa dibaselo txitimwi ka simangwana, hahatshi ka mikusu, ni ka mindonga yo tala ngu matshokoro a mitsudi yo tshamba; ngu toneto, mahorana anu ma geleza, ni va mamanyani vanu va maha wugango.

Isaya 34:13

Se tinyumbani kwawe ka wukoma ku na mila mipa, maxexo ni sihaha ka mikhokhola yawe; ku na maha dizumbo da vamwamilambo, ni m'hubhe wa sisondo sa timbuwu.

2 Makronika 31:1

Msana ka kuva va di gwitile kumaha Pasika, votshe va ka Israyeli va to khukha veya ka madhoropa a va ka Judha va txiya fayetela marigwi awe a wukhongeli va txi wilela ni tiphande tawe, va khundumusela ni makhalo awe o guleka ni siluvelo ka ditiko dotshe da va ka Judha ni da va ka Bhenjamini, ni da va ka Efrayime ni da va ka Manasi, kala kuza va txi heta sotshe. Se votshe vanana va ka Israyeli va ta tshumelela madhoropani kwawe.

2 Vafumeli 23:15

Se ni txiluvelo txile txi nga ti ti maneka Bheteli, ni txiluvelo txi txi nga mahwa ngu Jerobhowamu, mwana Nebhate, a nga ti ti onhisile Israyeli, kambe a to khundumusa txiluvelo; e hisa txiluvelo txi maha dikhuma, se e hisa txithombe txo vatwa.

1 Vafumeli 14:16

A na ningela Israyeli ngu mhaka ya sionho sa Jerobhowamu, a nga onha e onhisa ni Israyeli.

1 Vafumeli 13:34

Eto ti mahile txionho nyumbani ka Jerobhowamu, kasi ku yi hasamula ni ku yi fuvisa ha mafuni.

1 Vafumeli 13:2

Se a to ruketela txiluvelo ngu dipswi da Mkoma, a txi khene: Awe txiluvelo! Awe txiluvelo! Mkoma a womba tiya: Wona ti to ku na velekwa dizambi ka nyumba ya Dhavhidha, ditina dakwe i nava Josiya, awule a no ningela kwako vaphaxeli va wukholo ko guleka avale va hisako dibaselo, ni marambu a vathu ma hiswa txitimwi kwako.

Dhewuteronome 9:21

Kambe ni tekile txionho txanu, i ku dirole di mi nga ti di wumbile, ni txi di hisa ngu mndilo, kambe ni txi di rukuta, ni txi di kuya khakwati, kala kuza di txi maha mpupu; se mpupu wa kona ni wu xwayile ka txinambwana, txile txi nga ti relela ngu mmangoni.

Genesisi 3:8

Se va to engisa dipswi da Mkoma Txizimu, a nga ti tsimbila-tsimbila amu thembweni, ngu mbimo ya minova; wamwamna ni wamsikati va to sisala hagari ka mindonga ya thembweni, ngu kuthava khohe ya Mkoma Txizimu.

Hoseya 2:6

Ngu kumaha keto, wona taku ni na tsiva nzila yako ngu mipa, kambe ni na guleta diguma da makhukhu, kasiku asi mani tisoko takwe.

Hoseya 10:9

Kukhukhela ka masiku a Gibheya, u onhile awe Israyeli; mi zumbile kona haleya; kulwa kona Gibheya ni vanana va wubihi kha ku na mbi mi juma.

Amosi 7:9

Kambe makhalo o guleka a Israyeli ma na hoxotwa ni makhalo a vakhongeli va Israyeli ma na loviselwa magwito. Se na wukela nyumba ya ka Jerobhowamu ngu ditxhari.

Nahume 3:11

Nanawe Ninivha, u na leva u txiya sisala, kambe u na lava mtamo, ngu kuthava valala vako.

Isaya 2:21

Va na wulela mu ka tifa ta marigwi ni mu ka maphala a mimango, ngu kuthava Mkoma, ni kudhumiswa ka wuhombe wakwe, mbimo yile a khukhako, e xamalisa ditiko.

Hoseya 8:5

Dirole dako, awe Samariya, di lambilwe; kuhenya kwangu kuturile txitimwi kwawe; Va na pwata mnandu kala ditshiku muni, kani?

Amosi 1:5

Ni na faya matimba a tisimbi a Dhamasku, kambe ni na heta va va zumbako Bhikeyati-Avheni, ni va Bheti-Edheni; se vathu va Siriya va na tekwa ve yiswa wukhumbini, kona Kiri, kuwomba Mkoma.

Amosi 3:14

Ditshiku di ni no tsayisa Israyeli ngu kundaka kwakwe mlayo, ni na tsayisa txiluvelo txa Bheteli; se titxheho ta txiluvelo ti na wilwa ti wela hahatshi.