Genesisi 6:7 - Bhiblia Yo Sawuleka

⁷ Se Mkoma a ti khene: “Ni na fuvisa txitimwi ka mafu, m'thu wu ni nga mmaha, ni fuvisa kambe sihari, ni sihari so tsimbila ngu dibindi, ni sinyana sa nzumani; nguko na ti laya ngu kuva ni di si mahile.”

Genesisi 6:7 Referans Kwoze

Zefaniya 1:3

Ni na fuvisa vathu ni sihari, ni na fuvisa sinyana sa nzuma ni sihaka sa linene, ni sikhunguvanyiso sa va wubihi; kambe ni na fuvisa vathu txitimwi ka mafu, kuwomba Mkoma.

Masalmo 37:20

Aniko vaonhi va na fuva; valala va Mkoma va na hya kufana ni mwasi wa kuoma va na hangalaka kufana ni wutshi.

Mavingu 16:4

Sotshe si a nga si maha Mkoma asi emisete mithumo ya sona, hambi ni muonhi a mahetwe ditshiku do biha.

Mavingu 10:27

Kuthava Mkoma ka engetela masiku, aniko malembe a vo biha ma na komiswa.

Hoseya 4:3

Ngu kumaha keto, ditiko di na dila, ni wuhi wule a zumbako ka dona a na guma mtamo, ni sihari sa txitinga ni sinyana sa nzumani; hambi sihaka sa linene si na loviswa.

Genesisi 6:6

Sekoko Mkoma Txizimu, a to ti laya ngu kuva a di mahile m'thu ha mafuni, se a to pandiseka mbiluni kwakwe.

Genesisi 7:4

Nguko, ku di pindile mtxhanu wa masiku ni mambidi, ni na maha ti to mndani ka mune wa magumi a masiku, ku txi wa mati wusiku ni mitshikari, kasi ku ni na lovisa ha mafuni sotshe sivangwa si ni nga si maha.”

Genesisi 7:21

Se ku to lova sotshe si i ku nyama yi yi tsimbilatsimbilako txitimwi ka mafu, i ku sinyana, sifuyo, sihari sa txitinga, ni sotshe si si tsimbilako ngu dibindi txitimwi ka mafu, ni vathu votshe.

Genesisi 8:21

Se Mkoma a to hefemula, a txi pfa kubhumula, a txi khene kha Mkoma mbiluni kwakwe: “Ani kha ni na mbi ngadi ni ruketela ditiko ngu mhaka ya m'thu, nguko mipimiso ya mbilu ya m'thu njo biha, kukhukhela wananani kwakwe; kha ni na mbi ngadi ni daya kambe sotshe sivangwa si si hanyako, kufana ni ti ni nga ti maha.

Dhewuteronome 28:63

Ngu toneto, kufana ni kuwa Mkoma a nga txi tsaka ngu ku mi mahela ta tinene, ni ku mi andisa, kufana ni toneto, a na tsaka kambe ngu kuva mi txi loviswa, mi txi fuva; nanu mi na dulwa mi txi humiswa ka ditiko di mi yelako kuya di teka.

Dhewuteronome 29:20

Mkoma kha na mbi m'divalela, nguko kuhenya kwakwe ni txiviti txakwe, si na tura txitimwi ka eneyo m'thu, a txi welwa ngu otshe makhombo, aawa ma nga bhalwa ka diya dibhuku, se Mkoma a na pfhita ditina dakwe hahatshi ka nzuma.

1 Samuwele 15:11

Na tilaya nguku ni nga veka Sawule e maha mfumeli; nguko a lekile kulondeta sileleto sangu, kambe kha xayisa mapswi angu. Sekoko Samuwele a to henya, e dila ka Mkoma wusiku wotshe.

Amosi 7:3

Sekoko Mkoma a to tilaya ka tona. Ti na mbi maheka, kuwomba Mkoma.

Amosi 7:6

Se Mkoma a to ti laya ka toneto. Hambi tiya ti na mbi ngadi ti maheka: Kuwombile Mkoma Txizimu.

Zefaniya 1:2

Ni na fuvisa sotshe si si kuho ha mafuni, kuwomba Mkoma.

Zefaniya 1:18

Hambi silivhela yawe mwendo nzalama yawe, kha si na mbi sikota ku va hulukisa, ka ditshiku da kuhenya ka Mkoma, aniko ngu mndilo wa kuhiseka kwakwe, otshe mafu awa ma na fuviswa, nguko kha ditshuri a na lovisa votshe vazumbi va ha mafuni ngu txidhukisa.

Isaya 27:11

Mbimo yile madhavi a kona ma no oma, ma na funywa; vavasikati va nata ma dhivela, nguko vathu vava, hi nga vathu vo pfisisa; ngu toneto, wule a nga m'va nga kha na mbi mpfela wusiwana, ni wule a nga muwumba, kha na mbi va mahela wumbilu.