Genesisi 5:22 - Bhiblia Yo Sawuleka

²² Ngu msana ka kuvelekwa ka Metusela, Enoki a to tsimbila kumweko ni Txizimu 300 wa malembe, e veleka mazambi ni mahorana.

Genesisi 5:22 Referans Kwoze

1 Vatesalonika 2:12

Ngu toneto, nanathu hi nga ti mi gondisa tona, ni ku mi tsanisa, ni kukhongotela mmweyo ni mmweyo wanu, kasiku mi tsimbila ngu fanelo masoni ka Txizimu, atxi txi nga mi dhanela ka mfumo wa txona ni kupfaliswa ka txona.

Genesisi 17:1

Mbimo yi Abramu a nga va ni tanga ya mtxhanu ni mune wa magumi ni mtxhanu ni mune a malembe, Mkoma a to humelela masoni kwakwe, a txi khene: “Ani ni Txizimu txa Mtamo-Wotshe, u fanete kuhanya masoni kwangu, u txi ni engisa ngu kuhetiseka.

Luka 1:6

I ti vathu vo lulama ngu wumbidi wawe masoni ka Txizimu, va txi veketa va si solwi ngu m'thu, sotshe sirumo ni milayo ya Mkoma.

Malakiya 2:6

Mlayo wa ditshuri wu ti ti txisofuni kwakwe, kambe kha ka maneka wubihi txisofuni kwakwe, a tsimbite ni nani ngu kudikha, ni wululamo, se a to vayilelisa votala ka wubihi.

Genesisi 6:9

Ayiya i xawutelo ya liveleko la Nowa. Nowa i ti m'thu wamnene, i ti wa ditshuri hagari ka vathu va mbimo yakwe, kambe a ti ti tsimbila kumweko ni Txizimu yotshe mbimo.

1 Johani 1:7

Aniko, ngako hi txi tsimbilela liwoningoni, nga txona txi ku liwoningoni, hi vamwevo ngu txathu, se mnoha wa Jesu, Mwanana wa txona wa hi basisa ka sotshe sionho.

Mika 6:8

Ene a kuzivisile, awe m'thu, a ti i ku ta tinene; ni ti Mkoma a ti kombelako kwako, kuva u maha kululama, u randa tinene, u tsimbila ngu kutinamisa ni Txizimu txako.

Masalmo 116:9

Ngu toneto, ni na tsimbila masoni ka Mkoma, ditikoni ka va va hanyako.

Levhi 26:12

Ni na va hagari kwanu, ani ni na va Txizimu txanu, nanu mi na va vathu vangu.

Vakolosa 1:10

ti to mi txi tsimbila ngu tifanelo ti ti lavekako masoni ka Mkoma, mi txi mtsakisa ka totshe timhaka, mi txi veka mihando ngu kuthuma mithumo ya yinene, mi txi kula amu ka kuziva Txizimu,

1 Vatesalonika 4:1

Ngu kugwitisa, vanathu, athu hi mi kombela ni ku mi laya ngu ka Mkoma Jesu. Anu mi gondile kwathu ati mi fanelako kuhanyisa tona, kasiku mi txi tsakisa Txizimu. Se, ngu toneto mi fanelako kuhanyisa tona, simamisani mi anda ka toneto.

Vaefesu 5:15

Ti di ngeto, wonisisani ta tinene mahanyelo anu; mi nga hanyiseni ku nga vathu va va si ziviko, aniko hanyani nga vathu va va zivako,

Genesisi 48:15

Se Israyeli a to katekisa Josefa, a txi khene: Txizimu txi va nga tsimbila masoni ka txona vatate vangu Abrahamu ni Isaake Txizimu txi i ku m'dyisi wangu kukhukhela ni txi velekwa kala ditshiku da nyamsi,

Genesisi 24:40

“Mkoma, awu ni tsimbilako ngu mlayo wakwe, a na rumela ngelozi yakwe kumweko ni nawe a txi katekisa dipfhumba dako, u na ya tekela kona mwanana wangu msikati, wa lixaka la ka kwathu, muwa nyumbani ka tate wangu.

Vakolosa 4:5

Hanyani ngu wuzivi ni va va ku hahanze, mi txi londola ta tinene mbimo yi mi ku ka yona.

2 Vakorinto 6:16

Ngu sengela muni ku kuho hagari ka dithepele da Txizimu ni sithombe sa sizimu sa makuhu kani? Nguko athu hi dithepele da Txizimu txi txi hanyako kota nga ti Txizimu txi nga kha txona: “Ni na zumba navo ni txi tsimbila hagari kwawe; ani ni na va Txizimu txawe; vona va na va i di vathu vangu.”

Varoma 8:1

Sekonakuwa kha ku nga ngadi ho kuabaniswa ka vale va ku ka Kristu Jesu.

Mithumo 9:31

Hambi keto, Dibanza di ti ni kuthutha ka dotshe ditiko da Judheya ni da Galileya ni da Samariya, di txi kula, di txi hanya ngu kuxonipha Mkoma, di txi anda ngu kuvhunetelwa ngu Moya wo Sawuleka.

Mika 4:5

Nguko votshe vathu va na tsimbila, mmwani ni mmwani ngu ditina da txizimu txakwe, aniko athu hi na tsimbila ditinani ka Mkoma, Txizimu txathu, yotshe mbimo ngu ha ku si gwitiko.

Amosi 3:3

Ina vambidi va nga longoloka na va si na kupfana kani?

Hoseya 14:9

I mani i ku txhari, kasi ku e pfisisa timhaka tiya kani? Wo txhariha kasi ku e tiziva kani? Nguko tinzila ta Mkoma ndo lulama, se vo lulama va na tsimbila ka tona, kambe vo biha va nawa ka tona.

Ndando ya Tindando 1:4

Awe ni teke, hi na tutuma, hi kulondetela. Mfumeli a ni wuletile tinyumbani kwakwe. Hi na tsaka ngutu kwako, kambe hi na kutsakela; hi na alakanya lirando lako, kupinda vhinya; vo lulama va kuranda.

Masalmo 128:1

A katekile awule a thavako Mkoma awu a londetako tinzila takwe.

Masalmo 86:11

Ni gondise, Mkoma, nzila yako, kasiku ni yi londisa ngu yotshe mbilu. Maha ti to mbilu yangu yi dhumisa ditina dako.

Masalmo 56:13

nguko u hanyisile moya wangu ka lifo u hulukisile mikondo yangu ka tiphango, ti to ni txi hanya masoni kwako, Txizimu, liwoningoni ka va va hanyako.

Masalmo 26:11

I di ani, ni tsimbila ngu nzila yo lulama; ni hulukise, telwa ngu wumbilu ni nani!

Masalmo 16:8

Yotshe mbimo ni na ni Mkoma masoni kwangu; kha ni na mbi dhukiswa ngu txilo, nguko ene a ka didhawa dangu da txinene.

2 Vafumeli 20:3

Awe Mkoma! Alakanya taku ni tsimbite ditshurini, ngu mbilu yo thembeka, ni mahile to lulama masoni kwako, se a to dila ngutu Ezekhiya.

1 Vafumeli 2:4

Kasiku, Mkoma a na tsanisa dipswi di a ngadi womba kwangu, a txi khene: “Ngako vanana vako va txi xayisa nzila yawe, ve tsimbila ngu kuthembeka masoni kwangu, ngu mbilu yawe yotshe ni muhefemulo wawe wotshe, kha ni khali kuwomba to ku na pwateka wo tsiveta ka Israyeli.”

Dhewuteronome 28:9

Mkoma a na kumaha ditiko dakwe do sawuleka, nga ti ene a nga ku xambanyela, ngako u txi vekisa sirumo sa Mkoma, Txizimu txako, ni kungako u txi tsimbila ngu tinzila takwe.

Dhewuteronome 13:4

Mi na londisa Mkoma, Txizimu txanu, mi txi mthava, mi vekisa sirumo sakwe, mi txi engisa dipswi dakwe, mi txi thumela ene, mi namarela kwakwe.

Dhewuteronome 5:33

“Mi na tsimbila ngu yotshe nzila yi Mkoma, Txizimu txanu, a nga mi leleta, kasi ku mi txi hanya, mi di katekile, ni ti to masiku anu ma txi anda, ka ditiko di mi no ya di teka, di txi maha danu.”

Eksodha 16:4

Sekoko Mkoma a wombile ka Mosi a txi khene: “Ni na mi nisela sakudya ngu nzumani: Vathu va na huma va txi rolela mpimo wa ditshiku ni ditshiku, ni lava kuwona ti to mwendo votshe va vekisa mithetho yangu mwendo kha va vekisi.

Genesisi 5:24

Se Enoki a tsimbite kumweko ni Txizimu; se kha wonwa kambe aniko, Txizimu txi ti tekete ene.

1 Vakorinto 7:17

Ngu toneto, m'thu ni m'thu a na mahe nga ti a nga ningiswa tona ngu Mkoma, mwendo nga ti Txizimu txi nga m'dhanisa tona. Ngu tona ti ni rumisako tona ka otshe mabanza.

Genesisi 5:21

Enoki a di ni tanga ya mtxhanu wa magumi ni dimwedo, ni mtxhanu wa malembe, a to veleka Metusela.

Genesisi 5:23

Kotshe kuhanya ka Enoki nga 365 wa malembe.