Genesisi 46:34 - Bhiblia Yo Sawuleka

³⁴ “Sekoko mi na khanu: Athu sithumi sako, hi vafuyi va sifuyo, kukhukhela ha wananani kwathu kala nyamsi, ngu wonewo mthumo wathu, hotshe ni vatate vathu. Wombisani toneto kasiku mi na mana kuya zumba Goxeni, nguko Vaegipta kha va dhundi vathu va i ku vadyisi.”

Genesisi 46:34 Referans Kwoze

Eksodha 8:26

Se Mosi a to khene: “Kha ti faneli kumahisa eto, nguko miphaxo yathu ka Mkoma, Txizimu txathu, njinyenyeko ka Vaegipta. Ngako hi txi maha mphaxo wathu hagari ka Vaegipta, miphaxo yile vona va yi nyenyako, kha va na mbi hi balisela ngu marigwi kani?

Genesisi 43:32

Va to phamela sakudya ve ninga Josefa ha mezani kwakwe, ve phamela sa kuninga vanawe ha mezani kwakwe ni vona, ve phamela kambe Vaegipta va nga ti ti ho ha mezani kwakwe ni vona: Nguko Vaegipta kha va dyi kumweko ni Vahebheru, nguko eto ta yila ka Vaegipta.

Genesisi 46:32

Vathu vava mbadyisi, mthumo wawe ngu kuxayisa mitxhambi yawe ya sifuyo. Ngu mhaka yeto, va bwakile ni tinvuta tawe, tihomu tawe, ni sotshe si si va lumbako!

Genesisi 37:12

Vanawe Josefa va to ya Sikemi, va txi ya dyisela kona mitxhambi ya tate wawe,

Genesisi 45:10

Mi na ya zumba Goseni, hafuhi ni nani, awe, ni vanana vako, ni vatukulu vako, tinvuta tako ni tihomu tako, ni sotshe si si kulumbako.

Genesisi 30:35

Ka donedo ditshiku, a to thavisa vamabhongwe va matshakatshaka ni va mindenda, totshe tiphongo ta matshakatshaka ni ta mindenda, sotshe si si nga ti ni divalavati do basa; se hagari ka tinvuta a thavisile totshe ti i ku ta mtima. Ene a to si ningela ka vanana vakwe, ve si xayisa.

Genesisi 34:5

Mbimo yile Jakobe a nga ziva taku, Sikemi a onhile mwanana wakwe Dhina, kambe, ngako vanana vakwe va mazambi va nga ti si nga ho, va nga ti bhuwani, kudyisani ka sifuyo, a to malala kala kuza ve wuya.

Genesisi 13:7

Se ku ti ti ho kuphikizana hagari ka vadyisi va sifuyo sa Abramu ni vadyisi va sifuyo sa Loti, ka yona mbimo yile; sekoko Vakanana, Vaferezi va ti ti zumba kona ditikoni mule.

Genesisi 13:8

Abramu a to khene ka Loti: “Kha kulaveki ku txi vaho kuphikizana hagari kwangu ni nawe, hagari ka vadyisi vangu ni vako, nguko hi vamwevo.

Genesisi 26:20

Vadyisi va niya Gerara, va to khata kuphikizana ni vadyisi va sifuyo sa Isaake, va txi kha vona: “Aawa mati athu!” Ti di ngeto, a to raya txisima txile ditina daku i Eseki “Kuphikizana”: Nguko va phikizanile ni vadyisi ngu mhaka ya txisimetxo.

Genesisi 37:2

Ngu tiya tiveleko ta Jakobe: Josefa a ti ni tanga ya digumi da malembe ni mtxhanu ni mambidi, ene a txi dyisa tinvuta ta tate wakwe, kumweko ni vanawe, vanana va Bhiliha ni Zilpa, vasikati va tate wakwe; Josefa a ti ti geletela tate wakwe timhaka to biha, ati vanawe va nga txi ti mahetela.

Genesisi 45:18

mi na ya teka tate wanu, ni timwaya tanu, mi txi wuya kheno kwangu; ani ni nata mi ninga wukhalo wa wunene ditikoni ka Egipta, kasiku mi txi dya mihando ya kupfuna ka ditiko diya.

Genesisi 47:3

Sekoko Faro a to khene ka vanawe: “Ngu wuhi mthumo wanu kani?” Vona va to xamula va txi kha vona: “Athu sithumi sako hi vadyisi va tinvuta, athu hotshethu ni vatate vathu.”

Genesisi 47:4

Vona va to womba kambe ka Faro, va txi kha vona: “Hi tela ku ta aka ditikoni muwa kwako, nguko Kanana, mwani kwathu, kha kuswi ku di ni wudyiselo wa mitxhambi yathu, athu sithumi sako, ngu mhaka ya paya i ku ya hombe. Ha kombela ti to athu sithumi sako hi txi zumba ditikoni ka Goxeni.”

Genesisi 47:6

Ditiko da Egipta di mtamoni kwako: Akisa tate wako ni vananu, ka wukhalo wa wunene. Va na ake ditikoni ka Goxeni. Se ngako, u txi ziva ti to hagari kwawe ku ni vavamna va mtamo, u na va veka ve maha vahombe va mitxhambi ya sifuyo sangu.”

Genesisi 47:11

Josefa a to veka tate wakwe ni vanawe, ka wukhalo wa wunene ngutu ka otshe makhalo a ditikoni ka Egipta, ka wukhalo wa Ramesesi, madingano ni ti Faro a nga wombisa tona.

Eksodha 8:22

Se ka ditshiku dile, ni na hambanisa ditiko da Goxeni, adi va zumbako ka dona vathu vangu, ti to ku si maneki koneyo mabhawu, se u na tiziva ti to ani ngani Mkoma hagari ka ditiko dotshe.