Genesisi 45:22 - Bhiblia Yo Sawuleka

²² Mmwani ni mmwani kwawe a mningile syambalo sa siphya, aniko Bhenjamini a mningile mazana mararu a male ya maxekele silivhela, ni syambalo sa mtxhanu so txitxa ngu sona.

Genesisi 45:22 Referans Kwoze

Genesisi 43:34

Aniko ene a to phamela vanawe sakudya sakwe sa ha mezani kwakwe, a txi phamela Bhenjamini sakudya sa kupinda mtxhanu wa kona asi a nga phamela mmweyo ni mmweyo ka votshe vamwanyani vanawe. Se vona ve sela, va txi busa nayo.

2 Vafumeli 5:5

Se mfumeli wa Siriya a to khene: Kuluveta u tsula, u ya ningela dipasi diya ka mfumeli wa ka Israyeli. Se manzani kwakwe a ti ti ni digumi da titalenta ta silivhela, ni 6.000 wa maxekele a nzalama, ni digumi da syambalo so tshura.

Valamuli 14:12

Samusoni koko, a to va gela tiya: “Ni lava ku mi mahela thethekatheka yokari, mi na randula, se ngako mi txi yi tumbula ni ku ni randulela mndani ka mtxhanu wa masiku ni mambidi a m'buso, ni na mi ninga magumi mararu a tinguwo, ni magumi mararu a syambalo sa kubomba ngu sona.

Mtuletelo 6:11

Konaho, mmweyo ni mmweyo wawe a to ningwa syambalo so basa, se ve gelwa kambe ti to veya masoni ngu kuhumulanyana, kala kuza kutatiseka mtengo wa vakwawe ni vanawe, ava va no dawa nga vona.

Valamuli 14:19

Sekoko Moya wa Mkoma wu to ta wulela ka Samusoni ngu mtamo, se e relela a txi ya ka va ka Asikaloni, a ha a nga ya daya magumi mararu a vavamna hagari kwawe, se a txi teketela syambalo sawe, e ningela syambalo sa kubomba ngu sona, ka vale va nga randula thethekatheka; ngu kumaha keto, txi to tura txiviti txakwe, se e tshumelela m'tini ka tate wakwe.

Genesisi 45:23

Ka tate wakwe, Josefa a rumete digumi da timbongola ta vamatune ti di rwate simaha sa lisima sa Egipta, ni digumi da timbongola ta mikati ti di rwate fulaho, ni sakudya, ni mbuva ya nzila.