Genesisi 42:2 - Bhiblia Yo Sawuleka

² Se e engeta a txi khene: “Ani ni ti engisile ati to ditikoni ka Egipta, yi ho fulaho yi xaviswako. Relelani mi ya hi xavela, kasiku hi nata dya hi txi hanya, hi si fi ngu nzala.”

Genesisi 42:2 Referans Kwoze

Genesisi 43:8

Sekoko Judha a to khene ka tate wakwe Israyeli: “Veka mfana wuwa mtamoni kwangu, hi na khukha hi txi tsula hi ya xava sa ku ta hanya nzala ngu sona, kasiku hi si fi athu ni nawe ni vanana vathu.”

Matewu 4:4

Aniko Jesu a mu xamute a txi khene: “Ti bhatwe tito: ‘M'thu kha na kuhanya ngu dipawu dwe, aniko ngu otshe mapswi awa ma wombwako ngu Txizimu.’ ”

Isaya 38:1

Ka masiku ale, Ezekhiya a lwate ngu malwati o daya; se a tota kwakwe Isaya, mwana Amosi, mprofeti, a txi ta khene kwakwe: Mkoma a khene: Lulamisela nyumba yako, nguko u nafa, khu na mbi hanya.

Masalmo 118:17

Kha ni na mbi fa, aniko ni na hanya kasiku ni xawutela mithumo ya Mkoma!

Genesisi 45:9

Tsulani ngu kukuluveta m'tini ka tate wangu mi txi ya m'gela ku khanu: Josefa mwanako a khene: “Txizimu txi ni mahile mfumeli wa ditiko dotshe da Egipta. Ngono kheno kwangu, u nga swele!”

Genesisi 43:4

Ngako u txi tumela ku hi tsula ni mwanathu Bhenjamini, hi na relela hi ya ku xavela sakudya;

Genesisi 43:2

Se mbimo yi va nga heta sakudya si va nga ti wuyile naso ngu Egipta, tate wawe Jakobe a va gete, a txi khene: “Tshumelani mi tsula Egipta, mi txi ya hi xavela kambe sakudya sokari.”

Mithumo 7:12

Kambe, ku ti ngako Jakobe a di engisile ti to fulaho yiho Egipta, a to rumela kona vatate vathu do khata.

Genesisi 42:3

Sekoko vanawe va Josefa va digumi, va to relela va txi ya Egipta, veya xava fulaho.

Masalmo 33:18

Mkoma ngene a xayisako ava va mthavako, avale va thembako wunene wakwe,

Masalmo 33:19

ene wa va hulukisa ka lifo kambe wa va veketa va txi hanya ka mbimo ya nzala.