Genesisi 41:49 - Bhiblia Yo Sawuleka

⁴⁹ Ngu toneto, Josefa a to sengeletela fulaho yayingi ngutu, nga mtxhefa wa lineneni, a txi tandeka ni kubalela, ngu kugwitelwa ngu sibalo.

Genesisi 41:49 Referans Kwoze

Masalmo 78:27

Txi to rumela ngu nzumani nyama yo ninga vathu va txona; se si txi wa ngu nzumani sinyana so tala nga mtxhefa wa linene!

1 Samuwele 13:5

Se Vafilista va to sengeletana kasi kulwa ni Israyeli. Va ti ti ni 3.000 wa sikotxikani, ni 6.000 wa vagadhi va mahantxhi, ni vathu votala ku nga mtxhefa wa mambambe ka linene; kambe va to kwelela veya gova Mikimaxi, ngu didhawa da wutxani ka Bheti-Avheni.

Valamuli 7:12

Vamidhiyani ni Vaamaleki ni votshe vanana va wutxani, va ti ti mbambamete mkovani, na i di vavangi nga humbi, ni mtengo wo mbi balwa wa makamelu awe, ma txi nga mtxhefa wa likasani ka linene.

Valamuli 6:5

Nguko va ti ti kwelela ni mitxhambi yawe ni matenda awe; i ti ti vavangi ngutu nga direfu da humbi, votala aha ka kuva ti si koteki ku va bala, vona, hambi makamelu awe; se va to wulela, kasi kuonhetela ditiko.

Genesisi 22:17

ni na kukatekisa, ni andisa liveleko lako, nga tinyeleti ta nzumani, ni ku nga mtxhefa mabambe ka linene; liveleko lako li na honyola madhoropa a valala va lona.

Jeremiya 33:22

Ni na engetela mtengo wa liveleko la txithumi txangu Dhavhidha ni wa Valevhi i ku vaphaxeli, nga ku mtengo wa yimbi ya nzuma wu si balwiko, hambi ni mtxhefa wa linene.

Jobe 1:3

A ti ti fuyile 7.000 wa tinvuta, ni 3.000 wa makamelu, 500 wa mipatwa ya tihomu, ni 500 wa timbongola; kambe a ti ti thumelwa ngu vathu vavangi ngutu; aha kaku, wamwamna wuwa, i ti ti wa hombe kupinda votshe va Wutxani.

Genesisi 41:48

Va to sengeletela sotshe sakudya sa malembe awa a mtxhanu ni mambidi a kupfuna ditikoni ka Egipta; va txi xayiswa sakudya ka otshe madhoropa, si veketelwa madhoropani sotshe sakudya sa tithembwe ta madhawani ka didhoropa.

Genesisi 41:50

Na kusanzi kuhoka malembe a nzala, Josefa a to velekelwa vanana vambidi vavafana ngu Asenati, mwana Potifera, mphaxeli wa Oni.