Genesisi 37:8 - Bhiblia Yo Sawuleka

⁸ Sekoko vanawe va to kha vona kwakwe: “Ti komba ti to awe u na fuma txitimwi kwathu kani? Niku awe u na hi thangela nga m'thu wa hombe kani? Ngu kumaha yeto, va to m'vengela ngutu, ngu mhaka ya miloro yakwe, ni mapswi akwe.”

Genesisi 37:8 Referans Kwoze

Mithumo 7:35

“Mosi wuwa ngene wu va nga mkanyisa, va txi kha vona: ‘I mani wu a nga kumaha mfumeli ni mlamuli wathu kani?’ ” Ngene wu a nga rumwa ngu Txizimu kumaha mfumeli ni mtiruli wawe, ngu mtamo wa ngelozi yi yi nga mu humela txipoponi.

1 Samuwele 10:27

Kambe vanana va ka Bheliyali va to kha vona: Ina ngene wu a no hi txhatxhisa kani? Se va to mueyisa va si mtiseli siningo. Kambe ene a so ti maha diphazeve.

Vahebheru 10:29

Se, ngu toneto, mi alakanya txani ngu txitsayiso txa hombe, atxi a no txi mana wule a nga kanyisa Mwanana wa Txizimu, asi khatali txilo ngu mnoha wa txitumelelano, awu a nga sawulekiswa ngu wona, se a txi tshumela e ruketela Moya wa makatekwa, kani?

Luka 20:17

Se a txi va wonisisa, a ti khene kwawe: “Ti womba txani ati ti nga bhalwa va txi kha vona: ‘Dirigwi di vaaki va ngadi nyenya, ngu dona di nga mahwa dirigwi da hombe da kutsanisa kani?’

Luka 19:14

Aniko vathu va ditiko dakwe va ti mu vengela, ve ruma mitumi msana kwakwe, kuya womba tito: ‘Kha hi ti lavi kufumwa ngu m'thu wuwa.’ ”

Masalmo 118:22

Dirigwi diya vaaki va ngadi nyenya di mahile dirigwi da hombe do tsanisa.

1 Samuwele 17:28

Se mbimo yile Eliyabhe, mkomwakwe a nga tipfa, a txi womba ka vavamna vale, a to henyela Dhavhidha, a txi khene: U tete txani hawa kani? Se u ti site ni mani tinvuta tile ta tidotho txiwulani kani? Na kuziva kha kwati kutikulisa kwako, ni wubihi wa mbilu yako, taku u tete ku ta wona kulwa ka yimbi.

Eksodha 2:14

Ene a to xamula a txi khene: “I mani a nga kuveka kumaha wa hombe, ni mthethisi hagari kwathu kani? Se u lava ku ni daya nani, nga kule nyamnova u nga daya Muegipta kani?” Sekoko Mosi a to dhuka, a txi khene: “Mhaka yi zivilwe!”

Genesisi 49:26

Makatekwa a tate wako ma na pinda makateko a vatate vangu, kala titshokani ka mimango ya kale ngutu; ona ma nava txitimwi ka msungo wa Josefa, ni txitimwi ka msungo wa wule a nga sawulwa hagari ka vanawe.

Genesisi 37:4

Vanawe ngako va txi wona ti to tate wawe a randa ngutu Josefa, kupinda votshe vamwani vanawe, va to khata ku m'vengela ngutu, va si lavi ni kuwombawomba nayo ngu kuthutha.

Genesisi 27:41

Se Esawu a to khata kuvenga Jakobe mnanda wakwe, ngu mhaka ya txikatekiso txi tate wakwe a nga mninga, a txi pimisa ekha mbiluni kwakwe, a txi khene: “Masiku o na dila tate nguko a di fite, ma hafuhi; sekoko ni na daya mnanda wangu Jakobe.”

Genesisi 37:9

Ene a to lora wumwani mloro, awu a nga wu xawutela ka vanawe, a txi khene: “Ni lorile wumwani mloro: Ni woni ditambo, mtxima ni digumi da tinyeleti ni yimweyo, na si txi ni khizamela.”

Genesisi 42:10

Vona va kanetile va txi kha vona: “Ahim-him awe nyamne wathu; athu sithumi sako hi tete ku ta xava sakudya.

Genesisi 44:18

Sekoko, Judha a to tshuketa hafuhi ka Josefa, a txi khene: “O! Nyamne wangu, na ku kombela, ni tumelele ani txithumi txako, ni womba dipswi dimwedo tinzeveni kwako nyamne wangu, ti to txiviti txako txi si humeleli txitimwi ka txithumi txako, nguko awe u fana ni Faro, ene apune!”

Genesisi 50:18

Ngu msana, vanawe va Josefa, va manekile va txi ta ngu wutumbu wawe, ve ta ti wisa minengeni kwakwe va txi kha vona: Hiho hawa, athu sithumi sako.

Dhewuteronome 33:16

mihando ya mafu ni kutala ka yona, ni kateko ya wule a nga aka mu txipoponi. Makatekwa ma nave ha msungo ka Josefa, txitimwi ka msungo wa wule a nga sawulwa hagari ka vanawe!

1 Samuwele 18:8

Sekoko Sawule a to henya ngutu, ni dipswi dile di to maneka di di bihile masoni kwakwe; se a txi khene: Digumi da magumi a mazana va ningile Dhavhidha, kambe ani digumi da mazana dwe; kha ditshuri, a kelelelwa ngu txani, hi nga mfumo dwe kani?