Genesisi 34:27 - Bhiblia Yo Sawuleka

²⁷ Vafana va Jakobe va to handa simaha sa vale va nga va dayela, va txi ya handa kambe didhoropani, kufela kupharela mhaka ya kunyenyeza, ayi va nga yi maha ka Dhina, ndiyawe.

Genesisi 34:27 Referans Kwoze

1 Timoti 6:10

Nguko kuranda ngutu male, ngu wona mkoloti wa totshe tixaka ta wubihi; ngu mhaka ya kona kunavela kuwa ko mbi na mpimo, vamwani va hambani ni likholo, ve ti nemeta vapune ngu kuvilela ko tala.

Esteri 9:16

Kambe Vajudha vamwani vale va nga ti ti maneka ka matiko a hombe a mfumeli va to sengeletana kasi kuve lwela wutomi wawe, se va to humula kuxaniswa ngu valala vawe; va date 75.000 wa valala vawe; kambe kha va handa txilo.

Esteri 9:10

Digumi da vanana va Hamani, mwana Hamedhata, mlala wa Vajudha, va datwe; kambe kha va handa txilo.

Joxuwa 7:21

Mbimo yile ni nga wona dijasi do tshura hagari ka sile so handwa, ni 200 wa maxekele a silivhela, ni dibwinzi da nzalama ya mtxhanu wa magumi a maxekele, ni to si navela ni txi si teka, wona taku, ni si sisile hahatshi ka mafu, hagari ka ditenda dangu, se silivhela yi ngu hahatshi ka sotshe.”

Joxuwa 7:13

Khukha u txi ya sawulekisa vathu, u txi khawe kwawe: Ti sawulekiseleni ditshiku da mangwana, nguko Mkoma, Txizimu txa Israyeli, a womba tiya: Kurukwa kuho hagari kwanu va ka Israyeli; kha mi na mbi sikota kutsana masoni ka valala vanu, kala kuza mi txi thavisa txiruko hagari kwanu.

Joxuwa 7:1

Aniko vanana va ka Israyeli va to ti mahela mnandu, ngu kunavela asi si nga yiliswa; nguko Akane, mwana Karimi, mwana Zabhedhi, mwana Zera, wa lihunzu la ka Judha, a to teka simaha si si nga yiliswa, se kuhenya ka Mkoma ku to vhutuka, a txi wukela vanana va ka Israyeli.

Eksodha 2:14

Ene a to xamula a txi khene: “I mani a nga kuveka kumaha wa hombe, ni mthethisi hagari kwathu kani? Se u lava ku ni daya nani, nga kule nyamnova u nga daya Muegipta kani?” Sekoko Mosi a to dhuka, a txi khene: “Mhaka yi zivilwe!”

Genesisi 34:31

Vona va to womba, va txi kha vona: “Ina ndinene kutekwa ndiyathu e mahwa digelegele kani?”

Genesisi 34:2

Sikemi mwana Hamori, muhevhi, mfumeli wa ditiko, mbimo yi a nga mu wona, a to mñola, a txi otela nayo ngu kummahisa.

Genesisi 34:26

Va to daya ngu ditxhari nene Hamori ni Sikemi mwanakwe, ve teka Dhina ndiyawe, amu nyumbani ka Sikemi, ve tsula nayo.

Genesisi 34:28

Va to teketela tinvuta tawe, ni tihomu tawe, ni timbongola tawe, ni sotshe asi si nga ti didhoropani ni si si nga ti tithembweni kwawe.

Ezekhiyele 39:10

Kambe kha va na mbi tisa tikhuni ngu txitingani, hambi kuganga txipoponi, aniko va na turisa mndilo ngu matxhari; va na pa ka vale va nga va pela, ni kuhanda ka vale va nga va handa. Kuwomba Mkoma Txizimu.

Amosi 3:11

Ngu toneto, Mkoma Txizimu a khene: Ku na humelela txigevenga txi no randela ditiko dako, txi na hoxota dikhokhola ni tinyumba ta wukoma ti na handwa.