Genesisi 32:16 - Bhiblia Yo Sawuleka

¹⁶ Ene a to abanisa sifuyo siya ngu mitxhambi, e si ningela ka sithumi sakwe, a txi gela sithumi, a txi khene: “Thangelani masoni kwangu, mi dhawukisa mtxhambi ni mtxhambi, ku txi va ni wukhalo hagari ka yona.”

Genesisi 32:16 Referans Kwoze

Matewu 10:16

“Wonani, ni mi ruma nga tinvuta hagari ka maxolwa; ngu toneto, txharihani nga minyoka, mi txi va vo mbi na wukhuxu kufana ni situvane.

Isaya 28:26

Txizimu txakwe txa m'gondisa, ni ku mkomba ati a dinganako kumaha.

Mavingu 2:11

U na vekiswa ngu mialakanyo ya yinene, ni wutxhari wu na kuxayisa;

Masalmo 112:5

A katekile m'thu wu a pfelako wusiwana e lombisa a tsimbitisako mabhindu ngu kululama ni ditshuri;

Genesisi 32:20

Mi na m'gela ku khanu: “Jakobe txithumi txako, ene apune wata msana kwathu.” Jakobe a ti khene: “Ni na mthuthisa ngu txiningo txi ni txi thangetisako; se ngu msana, ni na hoka ni txi ya ti kombisa kwakwe, mwendo a na ni amukela.”

Genesisi 32:15

magumi mararu a makamelu a mikati, ni vanana va ona, mune wa magumi a tihomu ta vamakati, ni madhuna a digumi, magumi mambidi a timbongola ta mikati, ni digumi da timbongola ta vamatune.

Genesisi 32:17

Ka wule a nga ti thangete masoni, a mgete ku khene: “Ngako mkomwangu Esawu a txi kumana, e ku wotisa ku khene: U lumba mani kani? U ya hani kani? Sifuyo si si ku masoni kwako si lumba mani kani?”

1 Samuwele 25:19

a txi khene ka vafana vakwe: Thangelani masoni kwangu, ni nata ngu msana. Kambe eto kha gela mwamna wakwe Nabhali.