Genesisi 28:15 - Bhiblia Yo Sawuleka

¹⁵ Ani ni ni nawe, kambe ni na kuxayisa hani ni hani u no maneka u di kona, ni na ku wuyisa ka ditiko diya, nguko kha ni na mbi kuleka na ni sinzi kumaha ati ni nga kugela.”

Genesisi 28:15 Referans Kwoze

Joxuwa 1:5

Ni wammweyo kha na mbi tsana masoni kwako, otshe masiku a kuhanya kwako; kufana ni kule ni nga va ni Mosi, ngu toneto, ni na va ni nawe; kha ni na mbi kuleka, hambi ku kusiya.

Isaya 41:10

u nga thave, nguko ani ni ni nawe; u nga gume mtamo, nguko ani ni Txizimu txako; na kutsanisa, kambe na kuvhuna, na kuseketela ngu dianza dangu da txinene da kululama.

Jeremiya 1:19

Va na lwa ni nawe, aniko kha va na mbi kuxula; nguko ani ni kumweko ni nawe, kasi ku kuhulukisa, kuwomba Mkoma.”

Dhewuteronome 31:6

Tsanani miva ni mtamo; mi nga thaveni txilo, kambe mi nga dhudhumeleni masoni kwawe, nguko Mkoma, Txizimu txanu, ngene a thangelako masoni kwanu; kha na mbi mi tshotsha, kambe kha na mbi mi leka!”

Genesisi 26:24

Se Mkoma a to woneka kwakwe ka wona wusiku wule, e m'gela tiya: “Ani ngani Txizimu txa Abrahamu, tate wako; u nga thave txilo, nguko ani nipune ni ni nawe. Ani ni na kukatekisa, ni na andisa liveleko lako, ngu mhaka ya Abrahamu txithumi txangu.”

Genesisi 31:3

Mkoma Txizimu a wombile ka Jakobe, a txi khene: “Tshumela u txi tsula ditikoni ka vatate vako, mwani kwanu, ani ni na va ni nawe.”

Genesisi 26:3

U nga sikota kuaka ka ditiko diya, ani ni na va ni nawe, kambe ni na kukatekisa. Nguko otshe matiko awa ni na kuninga awe ni liveleko lako, ni txi hetisa txixambanyo txi ni nga txi maha ka Abrahamu, tate wako.

Matewu 24:35

Nzuma ni mafu si na pinda, kambe mapswi angu kha ma na mbi pinda.”

Matewu 18:20

Ina, nguko ahawa va nga tshangana vambidi mwendo vararu, ngu ditina dangu, ani ni ho hagari kwawe.”

Isaya 43:2

Ngako u txi txhatuka matini, ni na va ni nawe, hambi u txi txhatuka minambo, kha yi na mbi kumita; ngako u txi pinda ngu ha mndiloni, khu na mbi hya, hambi m'dhikila kha wu na mbi kuhisa.

1 Vafumeli 8:57

Mkoma, Txizimu txathu a nave ni nathu, nga tile a nga maha ka vatate vathu; u nga hi tsukule kambe u nga hi leke,

Masalmo 46:7

Mkoma wa Mabutho a Tiyimbi ana ni nathu Txizimu txa Jakobe ngu txona i ku wuthavelo wathu.

Matewu 28:20

mi txi va gondisa kuvekisa totshe tiya ni nga mi leleta tona. Se wonani, ni ni nanu yotshe mbimo, kala kugumani ka mafu.”

1 Timoti 4:8

Nguko ku ti toloveta ka mithumo ya mmidi kuvhuna ka kudotho, kasi ku ti toloveta ka mithumo ya wukhongeli kuvhuna ka totshe, nguko ku na ni txithembiso txa wutomi wa konkuwa ni wa mbimo yi yi tako.

Mitengo 23:19

Txizimu kha txi na makuhu nga m'thu. Lambi, txona hi nga mwanana wa m'thu wo txitxa-txitxa. Txizimu hi nga txo womba dwe txi si mahi, ina kha txi mahi ti txi nga womba kani? Kasi hi nga txo womba ti txi tatiseka kani?

Genesisi 48:21

Msana keto, Israyeli a wombile ka Josefa, a txi khene: Ani ni hafuhi ni kufa, kambe Txizimu txi na va ni nanu, txona txi na mi tshumeta mi tsula ditikoni ka vakokwani vanu.

Isaya 8:10

Sungani motshe txikungo, aniko kha txi na mbi maheka, wombani dipswi, kambe kha di na mbi tsana; nguko Txizimu txi ni nathu.

Isaya 7:14

Ngu toneto, Mkoma apune, a na mi ninga txikombiso: Wonani taku, wotuma a na mana txirumbu e veleka mwanana wa m'zambi, se ditina dakwe i Emanuweli.

Valamuli 6:16

Se Mkoma a to mxamula a txi kha ene: “Ani ni na va ni nawe, kambe awe u na va xula Vamidhiyani, ku txi nga u to xula m'thu wammweyo.”

Judha 1:1

Judha, txithumi txa Jesu Kristu, mwanawe Jakobe, ka vale va nga dhanwa, va randekako ka Txizimu Tate, ni kuveketwa ngu Jesu Kristu:

Masalmo 46:11

Mkoma wa Mabutho a Tiyimbi ana ni nathu Txizimu txa Jakobe ngu txona i ku wuthavelo wathu!

Genesisi 39:21

Mkoma a ti ti kumweko ni Josefa, a txi telwa ngu wumbilu ngu ngene, a txi maha ti to e mana mathomo, masoni ka mxayisi wa mkora.

Genesisi 39:2

Mkoma a ti ti ni Josefa, ngu mhaka yeto, totshe takwe ti ti tsimbila kha kwati, e zumba a txi thumela nyumbani ka nyamne wakwe wa Muegipta.

Eksodha 3:12

Txizimu txi ti kha txona: Ngu ditshuri ani ni na va ni nawe; ngu txiya txikombiso txi no komba ti to ani ni kurumile: Ngako u di humisile vathu vangu ngu Egipta, anu mi nata khozela Txizimu ka mmango wuwa.

Genesisi 48:16

Ngelozi yi yi nga ni hulukisa ka to biha, yi na katekisa vafana vava, ngu konaho kwakwe ditina dangu di na simame di txi ya masoni, kumweko ni ditina da Abrahamu ni Isaake, i ku vatate vangu; vafana vava va na kule va txi anda ha mafuni.

Genesisi 32:9

Jakobe a to khene kambe: Txizimu txa tate wangu Abrahamu, Txizimu txa tate wangu Isaake, awe Mkoma, u nga ni gela u txi khawe: “Tshumela u tsula ditikoni kwanu, amu u nga velekelwa kona, ni na kuxayisa ta tinene.”

Genesisi 46:4

Ani ni na relela ni nawe ditikoni ka Egipta, ni na ya maha ti to u tshumela u txi wuya, se Josefa ngene a no vhala maso ako, mbimo yi u no fa.”

Genesisi 21:20

Txizimu txi ti kumweko ni mfana wule, ene a to kula a txi aka txiwulani, ahawa a nga ziva kufula ngu wulaho.

Genesisi 31:5

a to ta va gela tiya: “Ni wona ti to tate wanu khaswi a txi ni tsakela kufana ni kale, aniko Txizimu txa tate wangu txi ni nani.”

Genesisi 31:13

Ani ngani Txizimu txa Bheteli, ahale u nga thela mafura ka phande u ni mahela txixambanyo. Konkuwa khukha, huma ka ditiko diya u txi tshumelela ditikoni mu u nga velekelwa kona.”

Genesisi 35:3

Se a hi khukheni hi kwela kuya Bheteli; ni na ya aka kona txiluvelo ka Txizimu, atxi txi nga ni emela mbimo yi ni nga ti ti pandiseka, kambe txi ni pangalatile, ka nzila yi ni nga yi tsimbila.

Eksodha 13:11

Ka mbimo yi Mkoma a no mi hokisa ditikoni ka Vakanana, nga ti a nga xambanya kwanu ni ka vatate vanu, ngako a di mi ningile,

Mitengo 6:24

Mkoma a na ku katekise, a txi kuxayisa,

Dhewuteronome 7:9

U na ti zive koko ti to Mkoma, Txizimu txako, Njizimu, Njzimu txo thembeka, a xayisako txitumelelano ni wumbilu, kala ka 1.000 wa tiveleko, ka vale va mrandako, ni kuvekisa sirumo sakwe;

Dhewuteronome 30:3

Sekoko Mkoma, Txizimu txako, a na kuhumisa ka wukhumbi wako, a txi ku mahela wumbilu; a na ku engisa, a txi ku tsanisa, u huma ngu ka otshe matiko ale a nga ti ku hangalisete ka ona.

Dhewuteronome 31:8

Mkoma koko a na thangela masoni kwako ene a na va ni nawe; kha na mbi kuleka, kambe kha na mbi kutshotsha; u nga thave txilo, kambe u nga dhudhumele.”

Genesisi 30:25

Mbimo yi Rakeli a nga veleka Josefa, a to khene kha Jakobe ka Labani: “Ni tumelele ni txi tshumelela mwani kwathu, i ku ditikoni kwathu.

Levhi 26:42

hambi ani ni na alakanya txitumelelano txangu ni Jakobe, ni txitumelelano txangu ni Isaake, ni txitumelelano txangu ni Abrahamu, ni na ti alakanya, kambe ni na alakanya ditiko diya.

Levhi 26:45

Ngu mhaka ya vona ni na khumbula txitumelelano txangu, atxile ni nga txi maha ni vatate vawe, avale ni nga va humisa ditikoni ka Egipta, masoni ka mifumo yotshe, kasiku ni txi va ni di Txizimu txawe. Ani ngani Mkoma!

Masalmo 91:11

Nguko Mkoma a na rumela tingelozi takwe kwako, kasi ku ta ku wonelela ka totshe tinzila tako.

Jeremiya 16:15

Aniko va na kha vona: Mkoma a hanyako, awu a nga humisa vanana va ka Israyeli ngu ditikoni ka Wuphemba, ni ka otshe matiko awa a nga ti va tutumisete ka ona. Ni na va wuyisa kambe ditikoni kwawe adi ni nga ninga vatate vawe!