Genesisi 24:53 - Bhiblia Yo Sawuleka

⁵³ Se awu wa txithumi a di humisile siya sa silivhela, ni sa nzalama, ni tinguwo, a to si ningela ka Rebheka; e ninga kambe ndiyakwe Labhani ni mame wakwe, sihiwa sa lisima la hombe.

Genesisi 24:53 Referans Kwoze

Genesisi 24:22

Mbimo yi makamelu ma nga gwita kusela mati, wamwamna a to teka txikurufu txa nzalama, txa hafu ya dixekele kunemela ka txona, a txi mnameka ha thonvuni, ni masinda mambidi, a digumi da maxekele kunemela ka ona, a txi mu ambalisa mawokoni kwakwe.

Genesisi 24:10

Txithumi txi to teka digumi da makamelu ka mtxhambi wa makamelu a nyamne wa txona, se txi txi teka simaha ka sotshe sa sinene, asi nyamne wakwe a nga ti naso manzani kwakwe; txi tsula naso Mesopotamiya, ka didhoropa da Nahori.

Eksodha 12:35

Vanana va ka Israyeli va to maha nga ti Mosi a nga ti wombile, va to kombela ka Vaegipta siya sa silivhela, siya sa nzalama ni syambalo.

Eksodha 11:2

Ngu mhaka yeto, gela vathu ti to wamwamna a na kombele ka muakelani wakwe, wamsikati a na kombele ka muakelani wakwe, siya sa silivhela ni sa nzalama.”

Eksodha 3:22

Nguko wamsikati mmwani ni mmwani a na kombela ka mwakelani wakwe ni ka mmuyi wakwe, siya sa silivhela ni siya sa nzalama, hambi ni syambalo si mi no ambeka vanana vanu va majaha ni vanana vanu vamahorana; se mi na handa Egipta.

Isaya 39:2

Se Ezekhiya a to va amukela ngu kutsaka, eya va komba nyumbani ya thomba yakwe, ni silivhela ni nzalama, ni makha, ni mafura o bhumula kha kwati, ni txisangala txakwe txa matxhari, ni sotshe sile si ngadi sisangalani kwakwe; kha ka maneka ni txa tximwetxo txi Ezekhiya a nga mbi va komba, hambi txa nyumbani kwakwe mwendo txa wukoma wakwe wotshe.

Ndando ya Tindando 4:13

Kuthunga kwako kufana ni thembwe ya maromani, yi ku ni mihando ya yinene: I ku sipresite ni nardhu.

Ezra 1:6

Se votshe vale va zumbako madhawani kwawe va to va vhuna ngu siya sa silivhela ni sa nzalama, ni siya, sifuyo, ni simwani so tshura, ni sotshe sile si nga ningwa ngu lidhundo.

2 Makronika 21:3

Kambe tate wawe a va ningile tithomba tatingi, ta silivhela, ni ta nzalama, ni simwani simaha sa lisima, ni madhoropa a mikhokhola ya va ka Judha, se wukoma a to ninga Jehoramu, nguko ngene matiwula.

Ndando ya Tindando 1:10

Mathama ako ma tsurisetwe ngu siketiketi, ni thamo yako ngu wusekenya.