Genesisi 24:42 - Bhiblia Yo Sawuleka

⁴² Ngako ni di bwakile ha txisimani nyamsi ni khongete ni txi khani: “Mkoma, Txizimu txa nyamne wangu Abrahamu, ngako u di katekisile mhaka yangu, ayi ni endelako yona konkuwa,”

Genesisi 24:42 Referans Kwoze

Nehemiya 1:11

O! Mkoma, ti na pfisise koko tinzeve tako mkombelo wa txithumi txako, ni mkombelo wa sithumi sako si si thavako ditina dako; humelelisa txithumi txako nyamsi, u txi ninga kukateka masoni ka wamwamna wuwa. Sekoko ani ni ti ti mtheleli wa sa kusela sa mfumeli.

Varoma 1:10

na kombela yotshe mbimo mikhongeloni kwangu tito, ngako i di kuranda ka Txizimu, ni mana dithomo da kuta kheyo kwanu.

Masalmo 90:17

Wu nate txitimwi kwathu wunene wa Mkoma, Txizimu txathu. Tsanisa Mkoma, mithumo ya manza athu, ina, tsanisa mithumo ya manza athu!

Masalmo 37:5

Ningela nzila yako ka Mkoma; themba kwakwe, se ene a na maha totshe.

Ezra 8:21

Sekoko ni to huwelela kutitona hafuhi ni mnambo wa Ahavha, kasi hi txi ti namisa masoni ka khohe ya Txizimu txathu, hi txi txi kombela nzila ya yinene yathu, ya vanana vathu, ni ya totshe tithomba tathu.

Mithumo 10:22

Vona va to xamula, va txi kha vona: “Korneliyo, mthangeli wa dizana, awu i ku wamwamna wo lulama, a di ni txithavo ka Txizimu, awu a dhumiswako ngu dotshe ditiko da Judha, a leletilwe ngu ngelozi ya kusawuleka ya Txizimu, ku ta kudhana u ya m'tini kwakwe, kasi kuya engisa ti u no ya mu gela tona.”

Genesisi 39:3

Nyamne wakwe a to khata ku ti wona ti to Mkoma a ti ti kumweko ni Josefa, ni ti to wa mninga mathomo ka totshe ti a ti mahako.

Genesisi 24:31

A txi ya m'gela ku khene: “Wulela awe u nga katekiswa ngu Mkoma. U zumbela txani hahanzeho kani? Ni ku lulamisete nyumba ni wukhalo wa makamelu.”

Genesisi 24:11

Awule wa txithumi a to khizamisa makamelu, me humula hahanze ka didhoropa, hafuhi ni txisima, ni minova, ka mbimo yi vavasikati va humako va txi ya reka mati.

Genesisi 24:27

a txi khene: “A na dhumiswe Mkoma, Txizimu txa Abrahamu, nyamne wangu, nguko ene Mkoma kha leka kukomba wunene wakwe ni kuthembeka kwakwe ka nyamne wangu, a txi ni heleketa ngu nzila yo lulama m'tini ka maxaka a nyamne wangu.”

1 Samuwele 1:13

nguko Ana a ti womba-womba mbiluni kwakwe, na a txi dekadekisa txisofu txakwe dwe, aniko di ti si pfali dipswi dakwe; se Eli e mwonisa ku nga a to leva.

1 Samuwele 9:6

Aniko ene a to m'gela tiya: Wona taku, ku ni m'thu wa Txizimu ka didhoropa diya, kambe mbwa mwamna wa wudhumo; totshe ti a wombako ta maheka, kha ti tandeki. Hi tsimbile konkuwa kwakwe, kutilava a na ya hi komba nzila yi hi felako kutsimbila ngu yona.