Genesisi 24:3 - Bhiblia Yo Sawuleka

³ kasi ku ni txi ku xambanyisa ngu Mkoma, Txizimu txa nzuma ni mafu, ti to u nga thuke u txi lowolela msikati mwanana wangu, hagari ka mahorana a Vakanana, ava ni nga zumba hagari kwawe;

Genesisi 24:3 Referans Kwoze

1 Vakorinto 7:39

Wamsikati wa kutekwa a sungilwe ka mwamna wakwe, a di ngadi a txi hanyelwa ngu mwamna. Ngako mwamna wakwe a txi fa, wamsikati a txhatxhekile, kasiku e tekana ni wu a mlavako, ti txi nga tsimbila ngu mlayo wa Mkoma.

Nehemiya 13:25

Se ni to ya lwisana navo, ni va ruketela, vamwani kwawe ni va peka, ni va dulela misisi, se ni va xambanyisa ka Txizimu ni txi khani: Mi nga lowoliseni kambe vanana vanu vamahorana ka vanana vawe va majaha, mi nga tekeni kambe vanana vawe vamahorana m i ninga vanana vanu va majaha, hambi ku ti tekela anu mi pune.

Genesisi 28:8

Esawu a ti zivile kambe ti to mahorana a Kanana kha ma tsakisi tate wakwe Isaake.

Jeremiya 10:11

Mi na va gelisa tiya, mi txi khanu: Sizimu si si nga mbi maha nzuma ni mafu, si na mwalala ditikoni, ni hahatshi ka nzuma.

2 Vafumeli 19:15

A to khongela masoni ka Mkoma a txi khene: Awe Mkoma, Txizimu txa ka Israyeli, u zumbako hagari ka Makerubhima, awe upune ngawe wekha u ku Txizimu txa yotshe mifumo ya ha mafuni; awe u vangile tinzuma ni mafu.

Eksodha 34:16

Kambe u nga thuke u txi wuta hagari ka vanana vawe vamahorana, vasikati kasi kulowota vanana vako va vafana, va nga hambukisa vanana vako va txi maha wugango ni sizimu soneso.

Nehemiya 9:6

Awe ngawe wekha u ku Mkoma, ngawe u nga maha nzuma, nzuma ya tinzuma ni dotshe dibutho da yona, mafu ni sotshe si si ku ka ona, ni minambo ni sotshe si si ku ka yona; sotshe ngawe u si hanyisako, ni dibutho da nzumani da kukhozela.

2 Makronika 2:12

Hiramu a to womba kambe a txi khene: Kukateka ku nave ka Mkoma Txizimu txa Israyeli, txi nga maha nzuma ni mafu, txi nga ninga Dhavhidha, mwanana wa wuzivi, wa wutxhari wa hombe ni kupfisisa, a na ake Nyumba ya Mkoma ni ya mfumo wakwe.

Joxuwa 2:12

Konkuwa koko, na mi kombela, ni xambanyeleni ngu Mkoma Txizimu, ngako ni nga mi mahela wumbilu, na nanu mi na mahela wumbilu nyumba ya tate wangu, se ni ningeni txikombiso txa ditshuri,

Dhewuteronome 10:20

Thava Mkoma, Txizimu txako, u txi mkhozela ene ekha, kambe namarela kwakwe u txi xambanya ngu ditina dakwe.

Dhewuteronome 6:13

U na thava Mkoma, Txizimu txako, u txi mkhozela, ni kuxambanya ngu ditina dakwe.

Mitengo 5:21

sekoko, mphaxeli a na gela wu wamsikati e maha txixambanyo txa hombe e m'gela tiya: Hagari ka vathu vakakwanu, Mkoma a na kutisela dikhombo ni kukuruketela, e maha taku ti txi oma tinyonga tako, ni kusimba mrumbu wako,

Eksodha 23:13

Londetani ngu kukhatala totshe timhaka ti ni mi gelako, kambe mi nga thukeni mi khumbuka ditina da simwani sizimu, kha kulaveki di txi pfala sisofuni kwanu.”

Eksodha 20:7

U nga sakane ngu ditina da Mkoma Txizimu txako, nguko Mkoma kha na mbi mleka asi m'khawulisi awule a sakanako walo ngu ditina dakwe.

Genesisi 50:25

Se Josefa a mahile ti to vanana va ka Israyeli ve xambanya, a txi khene: “Mbimo yi Txizimu txi no mi endela, mi na thavisa marambu angu ka wuwa wukhalo mi tsula nawo.”

Genesisi 27:46

Rebheka a to womba ka Isaake, a txi khene: “Na dyiswa mihumbo kuhanyani kwangu, ngu mhaka ya vavasikati va Vaheti. Ngako Jakobe a txi teka msikati wa Muheti, ka dona ditiko diya, wo fana ni vona vava, ni nga va ni txi hanyela txani kani?”

Genesisi 21:23

Konkuwa, xambanya ngu Txizimu kwangu kona hawa, ti to khu na mbi womba makuhu, hambi ni mwanana wangu, mwendo mtukulu wangu; aniko u na thembeka kwangu ni ka dona ditiko diya u ku muwuyi ka dona, nga kule nani ni nga wona kuthembeka kwako.”

Genesisi 14:19

Ene a to katekisa Abramu, a txi khene: “A na katekiswe Abramu ngu Txizimu Nyatxitimwi, M'vangi wa nzuma ni mafu!

Genesisi 6:4

Ka yona yile mbimo, ha mafuni ku ti ti ni vanyasihakate va nga velekwa, mbimo yi vanana va Txizimu va nga tekana ni mahorana, ya i ku vanana va vathu, ve veleka vanana. Ngu vonevo tindena ta nduma ta mbimo ya kale.

Genesisi 6:2

vanana va mazambi va Txizimu, ngu kuwona ti to vanana vamahorana va vathu va tshurile, va to langa vale va nga va navela, va txi maha vasikati vawe.

Vahebheru 6:16

Vathu va xambanya ngu ditina da wu i ku wa hombe kwawe, kotshe kukanetana kuguma ngu kuxambanya ko tsana.

Zefaniya 1:5

ni va va khizamelako dibutho da nzuma va di txitimwi ka tinyumba; ni vale va namako ve xambanya ka Mkoma, ni kuxambanya ngu Malikami;

Jeremiya 12:16

Ngako va di gondile tinzila ta vathu vangu, ti taku va txi xambanya ditinani kwangu, va txi kha vona: Mkoma a hanyako; nga ku va nga gondisa vathu vangu kuxambanya ngu Bhahali, sekoko va na maneka hagari ka vathu vangu.

Jeremiya 4:2

Se u na xambanya, u txi khawe: Mkoma a hanyako, ngu ditshuri, ka kulamula ni ka wululamo; matiko ma na ti katekisa ngu ngene, ni kutikulisa ngu ngene.”

Isaya 65:16

Se awule a katekiswako ha mafuni a na katekiswa ngu Txizimu txa ditshuri; ni wule a xambanyako ha mafuni, a na xambanya ngu Txizimu txa ditshuri; Nguko sixaniso sa kale si divatwe, kambe si fenengetilwe masoni kwangu.

Isaya 48:1

Engisani tiya, anu va nyumba ya ka Jakobe, anu mi ti dhanako ngu ditina da Israyeli, mi nga huma ngu ka lihunzu la ka Judha, mi xambanyako ngu ditina da Mkoma, kambe mi dhumisako Txizimu txa ka Israyeli, aniko i si nga ngu ditshuri, hambi ngu kululama.

Isaya 45:23

Ni xambanya ngu ngani nipune; di humile ngu txisofuni kwangu dipswi do lulama, kambe kha di na mbi tshumelela msana: Ati to masoni kwangu, ma na khizama otshe mazolo, se totshe tidimi ti na xambanya ngu ngani.

Masalmo 115:15

Mkoma, a nga va nga mafu, a na mi katekise, anu motshe!

1 Samuwele 20:17

Se Jonatani a to xambanyisa Dhavhidha kambe, nguko a ti mdhunda; nguko a ti mranda ngu lotshe lirando la mbilu yakwe.

Levhi 19:12

Mi nga xambanyeni makuhu ngu ditina dangu, nguko mi nga nyenyezisa ditina da Txizimu txanu. Ani ngani Mkoma!

Eksodha 22:11

sekoko ku na vaho txixambanyo masoni ka Txizimu hagari kwawe vavambidi, txa ti to kha pa txilo ka thomba ya mwakelani wakwe; se nyamne wa kona a na tumela, awule mmwani kha na mbi diha.

Genesisi 14:22

Aniko Abramu a xamute ka mfumeli wa Sodhoma, a txi khene: “Na xambanya ngu kugula dianza dangu masoni ka Txizimu Nyatxitimwi, i ku M'vangi wa nzuma ni mafu,

Genesisi 24:7

Mkoma, Txizimu txa nzuma, awu a nga ni teka nyumbani ka tate wangu ditikoni mu ni nga velekelwa kona, awu a nga ni gela ngu kuxambanya a txi khene: Ni na ningela ditiko diya ka liveleko lako, ene a na ruma ngelozi yakwe masoni kwako, se u na ya lowolela kheyo msikati mwanana wangu.

Genesisi 28:1

Se Isaake a to dhana Jakobe, e mkatekisa a txi mninga mthetho wa ku khene: “U nga lowole msikati hagari ka vanana va Vakanana.

Genesisi 47:31

Aniko tate wakwe a to engeta, a txi khene: Xambanya masoni kwangu. Josefa a xambanyile. Se Israyeli a to nama misungoni ka m'bhedhu.

Valamuli 14:3

Aniko tate wakwe ni mame wakwe, va to kha vona kwakwe: “Ina kha ku nga wamsikati hagari ka vanana vamahorana a vananu, hambi hagari ka votshe vathu vangu, aha koza awe u txi ya lava msikati ka Vafilista, ka vona vale va kwa mbi ya wukwerani kani?” Aniko Samusoni a to khene ka tate wakwe: “Ni lowoleleni wuwa, nguko ngene a ni tsakisako.”

Masalmo 136:26

Dhumisani Txizimu txa tinzuma; nguko lirando lakwe nda kala kupinduka!

Genesisi 34:9

Ngu mhaka yeto, a hi pfananeni: Anu mi na hi ninga vanana vanu vamahorana, se nanu mi na teka vanana vathu vamahorana, va txi maha vasikati vanu.

Genesisi 38:2

Koneyo Judha a to ya wona dihorana dimwedo, mwanana wa mkanana, a nga ti dhanwa ku i Suwe; ene a to mteka e maha msikati wakwe, e zumba nayo.

1 Samuwele 30:15

Se Dhavhidha a to khene kwakwe: Ina u nga relela, u ni heleketa ka mtxawa ewo wa masotxhwa kani? Se a to khene: Xambanya ka Txizimu ti to khu na mbi ni daya, hambi ku ni ningela manzani ka nyamne wangu, se ni na relela ni kuheleketa ka mtxawa ewo wa masotxhwa.

Ezra 5:11

Vona va hi xamute va txi kha vona: Athu hi sithumi sa Txizimu txa nzuma ni mafu, ho aketa nyumba yi yi nga akwa kale ka malembe; nguko mfumeli wokari wa hombe wa ka Israyeli a yi akile e heta.

Jeremiya 29:6

Tekani vasikati, mi txi veleka sizambzana ni sihoranana; lowotani vafana vanu vasikati, ni kuningela mahorana anu ma txi tekwa ngu vavamna; va txi veleka sizambzana ni sihoranana; andani kheyo, mi nga hungulekeni.