Genesisi 22:1 - Bhiblia Yo Sawuleka

¹ Se msana keto timhaka, ku to maheka ti to Txizimu txi xola Abrahamu, txi m'gela tiya: “Abrahamu!” Ene a to orovela, a txi khene: “Niho hawa!”

Genesisi 22:1 Referans Kwoze

Vahebheru 11:17

Ngu likholo, Abrahamu, mbimo yi a nga dukwa, a ningete Isaake. A ningete mwanana wakwe wammweyo ekha ngu ku a nga amukela sithembiso,

Dhewuteronome 8:2

Alakanya yotshe nzila yi Mkoma, Txizimu txako, a nga maha ti to u txi tsimbila ngu yona, mune wa magumi a malembe, txiwulani, kasi ku kukhozisa ni ku kuduka, ti to e ziva ati ti ku mbiluni kwako, ti to mwendo u na vekisa sirumo sakwe, niku khu na mbi si vekisa.

1 Pedro 1:7

kufela ku lisima la likholo lanu, i ku tximaha txa lisima kupinda nzalama, yi yi nyivilikiswako ngu mndilo, li mana wudhumo ni kupfaliswa, mbimo yi a nota Jesu Kristu, a txi ta ti wonekisa;

Jakobe 2:21

Ina hi nga yona mithumo yi nga maha ti to tate wathu Abrahamu e va mlulami, ngukuwa a nga ningela mwanana wakwe Isaake ha txiluveloni kani?

1 Vakorinto 10:13

Kha mi nzi kuhumelelwa ngu txiduko txa kuhambana ni siduko sa vamwani vathu. Txizimu txi thembekile, kha txi na kutumela ti to mi txi dukwa ngu si si ku txitimwi ka mtamo wanu. Aniko, ngako txiduko txi txi mi tela, a na mi ninga nzila ya kupona ka txona, ni mtamo wa ku txi rwala.

Mavingu 17:3

Nyundo njo xola silivhela, se mndilo mbwo xola nzalama; kambe Mkoma a xola timbilu.

Dhewuteronome 8:16

awule a nga kudyisa manna txiwulani, aale vatate vanu va nga mbi ma ziva, na a txi mahela ku kuxanisa ni ku kuduka, kasi ku a txi ku mahela ta tinene;

Eksodha 3:4

Mkoma a woni ti to Mosi wa tenderuka kasiku eya wona. Se Txizimu txi to m'dhana txi txi kha txona: “Mosi! Mosi!” Ene a to khene: “Niho hawa.”

Genesisi 22:11

Aniko ngu nzumani yi to kwangula Ngelozi ya Mkoma yi txi kha yona: “Abrahamu! Abrahamu!” Ene a to orovela, a txi khene: “Ni ho hawa!”

Genesisi 22:7

Sekoko Isaake a to womba ka tate wakwe Abrahamu, a txi khene: “Tata wangu!” Se Abrahamu a to xamula a txi khene: “Ngani wuwa, mwanangu!” Isaake a to wotisa a txi khene: “Hi ni mndilo ni tikhuni, se txi hani txihambana txa mhamba ya kuhiswa kani?”

Isaya 6:8

Msana keto, ni to pfa dipswi da Mkoma di txi kha dona: Ni na ruma mani, i mani a no hi yela kani? Sekoko ni txi khani: Ngani wuwa, ni rume ani!

2 Makronika 32:31

Vathangeli va Bhabhilona va to rumela mitumi ka Ezekhiya, kuya wotisa ngu timhaka ta txidiwukiso a txi txi nga maheka ditikoni, Txizimu txi to mleka ve m'duka, kasi ku txi ziva totshe ti tiku mbiluni kwakwe.

Eksodha 16:4

Sekoko Mkoma a wombile ka Mosi a txi khene: “Ni na mi nisela sakudya ngu nzumani: Vathu va na huma va txi rolela mpimo wa ditshiku ni ditshiku, ni lava kuwona ti to mwendo votshe va vekisa mithetho yangu mwendo kha va vekisi.

Dhewuteronome 13:3

u nga engise mapswi a mprofeti eneyo mwendo mlori eneyo, nguko Mkoma, Txizimu txanu, ngene a mi dukako, kasi kuziva ti to ina ngu ditshuri ma randa Mkoma, Txizimu txanu, ngu yotshe mbilu yanu, ni wotshe moya wanu.

Valamuli 2:22

Kasi ku ngu ona ni duka Israyeli, mwendo va na xayisa nzila ya Mkoma, kufana ni vatate vawe va nga yi xayisa, kasi kuve tsimbila ngu yona, mwendo ku yi leka.”

2 Samuwele 24:1

Se kuhenya ka Mkoma ku to engeta kuwukela va ka Israyeli, ene a to kujetela Dhavhidha ku va wukela a txi khene: Tsula u ya bala va ka Israyeli ni va ka Judha.

Masalmo 11:5

Mkoma wa duka m'thu wo lulama ni wa kubiha, ene wa nyenya avale va dhundako wurena.

Genesisi 15:1

Msana ka totshe tiya, dipswi da Mkoma di tile ka Abramu, ngu txiwoniso, di txi kha dona: “U nga thave awe Abramu, ani ngani txitxhavangu txako, hakhelo yako yi na va ya hombe ngutu.”

Genesisi 21:11

Dipswi diya di to khuvekisa Abrahamu ngu mhaka ya Ismayeli, mwanana wakwe.

Genesisi 37:13

Israyeli a to womba ka Josefa a txi khene: “Vakomwako va tsute Sikemi, va txi ya dyisela kona mitxhambi. Ngono, ni na kuruma kwakwe.” Se Josefa a to xamula, a txi khene: “Ni ti lulamisete.”

Genesisi 46:2

Se Txizimu, amu ka txiwoniso txa wusiku, txi to m'dhana, txi txi kha txona: “Jakobe! Jakobe!” Ene a to orovela, a txi khene: “Ni ho!”

1 Samuwele 3:4

Mkoma a to dhana Samuwele, se ene a to khene: “Ngani wuwa hawa!”