Genesisi 17:8 - Bhiblia Yo Sawuleka

⁸ Ni na kuninga awe, ni lihunzu lako, msana kwako, ditiko diya u zumbako ka dona, dotshe ditiko da Kanana di na va ditiko danu, ngu hale ku si gwitiko, kambe ni na va Txizimu txanu.”

Genesisi 17:8 Referans Kwoze

Levhi 26:12

Ni na va hagari kwanu, ani ni na va Txizimu txanu, nanu mi na va vathu vangu.

Masalmo 105:11

mbimo yi a nga womba a txi khene: “Ni na kuninga ditiko da Kanana, di maha thomba yi yi kulumbako.”

Eksodha 6:7

Ni na mi maha vathu vangu, se ani ni na va Mkoma Txizimu txanu, ni mi humisako ka mikaralo ya ditikoni ka Egipta.

Genesisi 12:7

Se Mkoma a to humelela ka Abramu a txi ta khene: “Ditiko diya ni na di ningela ka liveleko lako.” Ngu konaho Abramu a nga akela Mkoma txiluvelo, a nga ti wonekisa kwakwe.

Dhewuteronome 29:13

kasi ku nyamsi a txi mi maha ngamu yakwe, ni ti to ene apune, a txi va i di Txizimu txanu, nga ti a nga womba a txi xambanya ka vatate vanu, Abrahamu, Isaake ni Jakobe.

Dhewuteronome 26:18

Se Mkoma a tsanisile nyamsi tito, awe u ditiko da kulumba ene apune, nga ti a nga kuthembisa tona, ni ti to u fanete kuxayisa sotshe sirumo sakwe.

Dhewuteronome 14:2

Nguko anu mi vathu vo sawuleka ka Mkoma, Txizimu txanu, kambe Mkoma a mi sawute hagari ka vamwani vathu, votshe vale va kuho txitimwi ka mafu, kasi ku mi va vathu vakwe mipune.

Genesisi 13:15

Dotshe ditikodo u di wonako, ni na kuninga, awe ni lotshe liveleko lako, kala kupinduka.

Masalmo 105:9

Txitumelelano txi a nga txi maha ni Abrahamu, txixambanyo txi a nga txi maha ka Isaake.

Dhewuteronome 4:37

Nga ti a nga txi va randa vatate vako, e sawula liveleko lawe, msana kwawe, ene apune, a ku humisile Egipta ngu wutumbu wakwe ni mtamo wakwe wa hombe.

Genesisi 28:4

Txizimu txi na ku ninge awe ni liveleko lako, kateko ya Abrahamu, kasiku u txi teka ditiko di u nga zumba ka dona, di maha dako, adi Txizimu txi nga ninga Abrahamu.”

Genesisi 13:17

Konkuwa, khukha u txi dhawula ditiko diya u wona kulapha ka dona ni kuanama ka dona, nguko ni na kuninga dona.”

2 Samuwele 23:5

Hambi ku nyumba yangu yi si nga ya mamahelo eyo ka Txizimu, kambe txi mahile txitumelelano txa kwa mbi guma ni nani, txi ka sotshe txi no leletelwa ni kuvekiswa. kotshe kuhulukiswa kwangu ni kutsaka kwangu si na va ka txona, hambi ku asi se kumilisa.

Dhewuteronome 32:8

Mbimo yi Nyatxitimwi a nga txi abanisela tithomba ka matiko, mbimo yi a nga hangalasela vanana va Adhamu, ene a vekile mihingano hagari ka vathu vakwe, madingano ni mtengo wa vanana va Txizimu.

Mitengo 25:13

Ku nava kwakwe ni ka liveleko lakwe, msana kwakwe ku nava ni txitumelelano txa wuphaxeli wa kala kupinduka, nguko a khutate ka Txizimu txakwe, e mahela vanana va ka Israyeli, mphaxo wo va tekisa.

Eksodha 40:15

u na va tota nga ti u nga totisa tona tate wawe, se va na va vaphaxeli va mthumo wangu; ngu kutotwa kwawe, wuphaxeli wu na va wawe mbimo yotshe, ngu liveleko ni liveleko.”

Genesisi 48:4

txi txi ni gela tiya: Ani ni na maha ti to u txi anda, ngu ngawe ani ni na tumbulukisa tihunzu ta tingi ta vathu, ditiko diya ni na di ningela ka liveleko lako, di txi va thomba ya lona kala kupinduka.

Genesisi 23:4

“Hagari kwanu ani ni muwuyi, ni mluveli, ni kombela wukhalo, kasi ku nave mathithani ko ni lumba, tito, ni na tshotsha kona mfi wangu.”

Vahebheru 9:15

Ngu toneto, Ene i muemeli wa txitumelelano txa txiphya. Kufa kwakwe ku mahekile, kasi ku sionho si txi basiswa si si nga nga mahwa ka mbimo ya txitumelelano txo khata; se avale va nga dhanwa, va amukela thomba yo mbi guma, ayi va nga thembiswa.

Masalmo 103:17

Aniko lirando la Mkoma kha li nga ni magwito ka vale va m'thavako kululama kwakwe kha ku na magwito ka liveleko ni liveleko,

Levhi 16:34

Se atxiya i nava txileleto txo mbi gwita, kasi kuthavisa sionho sa vanana va ka Israyeli, ka sotshe sionho sawe, kumweko ngu dilembe. Se Aroni a to mahisa tona ti Mkoma a nga rumisa tona ka Mosi.

Eksodha 21:6

Sekoko nyamne wakwe a na mtisa masoni ka Txizimu, a na mkhigetelisa aha ka ditimba mwendo aha ka msasimo, a na mthola nzeve ngu linyonzi, se a na va i di khumbi yakwe ngu yotshe mbimo.

Mithumo 7:5

Aniko kha txa mninga thembwe kona hambi wukhaloanyana wu wu dinganako ku kandwa ngu mkondo; txi to mu thembisa dwe ti to txi na mninga dona, di maha thomba yakwe ni ya vatukulu vakwe msana kwakwe, hambiko a nga ti sanzi kuva ni mwanana.

Mtuletelo 21:7

Awu a no xula a na amukela thomba yiya, se ani ni na va Txizimu txakwe, ene a na va mwanana wangu.

Genesisi 26:24

Se Mkoma a to woneka kwakwe ka wona wusiku wule, e m'gela tiya: “Ani ngani Txizimu txa Abrahamu, tate wako; u nga thave txilo, nguko ani nipune ni ni nawe. Ani ni na kukatekisa, ni na andisa liveleko lako, ngu mhaka ya Abrahamu txithumi txangu.”

Genesisi 36:7

Vona va ti ni tithomba ta tingi, ti si koteki ti to va nga aka wukhalo wumwewo, nguko ditiko di va nga ti akile ka dona di ti si eneli, ngu mhaka ya tithomba tawe, ta tingi.

Genesisi 37:1

Josefa a to zumba ditikoni ka Kanana, amu tate wakwe a nga ti akile kona.

Eksodha 13:11

Ka mbimo yi Mkoma a no mi hokisa ditikoni ka Vakanana, nga ti a nga xambanya kwanu ni ka vatate vanu, ngako a di mi ningile,

Eksodha 29:45

Ni na va ni txi aka hagari ka vanana va ka Israyeli kambe ni na va ni di Txizimu txawe.

Eksodha 32:13

Khumbula sithumi sako Abrahamu, Isaake ni Israyeli, avale u nga xambanya kwawe u txi khawe: Ni na andisa liveleko lanu li txi nga tinyeleti ta nzumani, kambe ni na ningela dotshe ditiko diya ka vanana vanu adile ni ngadi womba, kasi ku dimaha thomba yawe, kala kupinduka.”

Dhewuteronome 9:5

Hi nga ngu mhaka ya kululama kwako, kambe hi nga ngu mhaka ya wunene wa mbilu yako, aku u ngaza u wulela, u teka ditiko dawe, aniko Mkoma a tutumisa matiko awa masoni kwako, ngu mhaka ya kubiha ka ona; ni ti to a maha tiya, kasi kutsanisa dipswi di ene a nga xambanya ka vatate vako, Abrahamu, Isaake, ni Jakobe.

Jeremiya 25:5

Va txi kha vona: Hundulukani mmweyo ni mmweyo ka nzila yakwe yo biha, kuva mi zumba ka ditiko diya Mkoma a nga mi ninga ni vatate vanu, kukhukhela kaleko kala kupinduka.

Jeremiya 31:1

Ka yona yile mbimo, kuwomba Mkoma, ni na va Txizimu txa totshe tihunzu ta ka Israyeli, vona va na va vathu vangu.

Genesisi 35:27

Se Jakobe a to ta ka Isaake tate wakwe, kona Mambre, aniya Kiriyate-Aribhe, i ku Hebroni, ahale va nga ti akile kona, Abrahamu ni Isaake.

Eksodha 6:4

Kambe ni emisile txitumelano txangu navo, kasi kuvaninga ditiko da Kanana, ditiko di va nga zumba ka dona kota valuveli.

Levhi 14:34

Anu mi na wulela ka ditiko da Kanana, adi ani ni lavako ku mi ninga, di txi maha thomba yanu. Ngako mi di koneyo, se ni txi thuka ni humelelisa mtungu wa tshekela ka dimwedo da maseta a nyumba yanu,

Mitengo 10:29

Sekoko Mosi a to khene ka Hobhabhe, mwana Reweli, mmidhiyani, tate wa Mosi ngu ka msikati wakwe: “Athu hiya ka wukhalo wule Mkoma a nga khene: Ni na mi ninga; a hi tsule hotshe, athu hi na kuxayisa kha kwati; nguko Mkoma a thembisile kumaha wunene ka Israyeli.”

Mitengo 27:12

Msana keto, Mkoma a ti khene ka Mosi: Kwela ka mmango wa Abharime u wona ditiko diya ni nga ninga vanana va ka Israyeli.

Dhewuteronome 32:49

“Kwela ka mmango wuwa wa Abharimu, txitimwi ka mmango wa Nebho, ditikoni ka Mowabhi, masoni ka Jeriko, kambe wonisisa ditiko da Kanana, adi ani ni di ningelako di txi lumba vanana va ka Israyeli.

Dhewuteronome 34:4

Se Mkoma a to m'gela a txi khene: Adiya, ditiko di ni nga thembisa ngu txixambanyo ka Abrahamu, ka Isaake, ni ka Jakobe, ni txi khani: “Ani ni na di ningela ka liveleko lako! Ani ni di kombisile kwako, kasi ku u na di wona ngu maso ako, kambe awe khu na mbi wulela ka dona.”

Joxuwa 1:2

“Mosi, txithumi txangu, a fite; konkuwa, khukha koko, txhatuka mnambo wa Jordhani, awe ni votshe vathu vava, mi txi ya ka ditiko di ni ningako vanana va ka Israyeli.

1 Makronika 16:18

a txi khene: Ni na kuninga ditiko da Kanana, di maha thomba yanu.

Ezekhiyele 11:20

kasi kuva txi na tsimbila ngu sileleto sangu, va txi xayisa silayelo sangu ni ku si maha; se vona va na va vathu vangu, ani ni na va Txizimu txawe.

Ezekhiyele 33:24

Awe mwanana wa m'thu, ava va zumbako ka makhalo awa a siwula, va womba-womba va txi kha vona: “Abrahamu i ti ti ene ekha nyamne wa mafu awa; kambe athu hi vangi; hi ningilwe ditiko diya ku va thomba yathu.”

Zakariya 8:8

se ni na va wuyisa ve ta zumba hagari ka Jerusalema; va na va vathu vangu, aniko ani ni na va Txizimu txawe, ngu ditshuri ni kululama.