Genesisi 17:10 - Bhiblia Yo Sawuleka

¹⁰ Txitumelelano txangu atxiya mi fanelako ku txi xayisa hagari kwangu ni nawe, awe ni lihunzu lako, msana kwako, ngu txiya: Otshe mazambi anu ma fanete kuyiswa wukwerani.

Genesisi 17:10 Referans Kwoze

Mithumo 7:8

Se Txizimu txi to mninga txitumelelano txa wukwera. Ngu konaho, Abrahamu, a di velekile Isaake a mu yisile wukwerani ngu ditshiku da wutxhanu ni mararu. Isaake a mahisile toneto ka Jakobe, se Jakobe nene e mahisa toneto ka vanana vakwe i ku vanyampande va tihunzu ta digumi ni timbidi ta Israyeli.”

Vafilipiya 3:3

Ava va nga ya wukwerani ngu ngathu, hi khozelako Txizimu ngu Moya wa txona; hi ti pfalisa ngu ka Jesu Kristu, hi si veki kuthemba kwathu ka nyama,

Varoma 3:30

Nguko Txizimu njimwetxo dwe, atxiya txi no ninga wululami ava i ku va wukwera ngu mhaka ya kukholwa, ni va i ku makhutu na va txi kholwa ni vona.

Joxuwa 5:2

Ka yona yile mbimo, Mkoma a to khene ka Joxuwa: “Maha timesa ta marigwi, u txi sinyisa kambe wukwera vanana va ka Israyeli.”

Genesisi 17:11

Mi na yisa wukwerani m'thu, ngu kuwila didhowo da magwito ka nyama yakwe, etxo txi na va txikombiso txa Txitumelelano txangu ni nanu.

Vaefesu 2:11

Ngu konaho, anu mi ku si nga majudha, mi dhanwako ku mi makhutu ngu vale va ti wombako ku “nzithiva” ngu mhaka ya tile ti nga thumwa ngu manza ha mmidi kwawe,

Vagalatiya 6:12

Avale va lavako ku ti maha vavanene masoni ka vathu, evo ngu vona va mi kurumetako kuyiswa wukwerani. Va maha eto kufela ku va si xaniswi ngu mhaka ya txihambano txa Kristu;

Dhewuteronome 30:6

Mkoma, Txizimu txako, a na kulisa mbilu yako ngu wukwera ni mbilu ya liveleko lako, kasi ku u txi sikota kuranda Mkoma, Txizimu txako, ngu yotshe mbilu yako, ni wotshe moya wako, kasi ku u na mana kuhanya.

Vagalatiya 3:28

Kha kuswi ku di ni Mujudha mwendo Mugriki, kha ku na khumbi mwendo mthuseki, kha ku na wamwamna mwendo wamsikati, nguko motshenu mi vamwevo ngu ka Kristu Jesu.

Varoma 3:28

Ngu toneto, hi pimisa ti to m'thu a mahwa mlulami ngu likholo, i si nga ngu mithumo ya mlayo.

Varoma 3:25

awu txona txi nga m'sikela ti to a na va i di mhamba ya kudihela sionho ngu mnoha wakwe, ka wule a kholwako kwakwe; Txizimu txi mahile tiya kasiku kombisa kululama ka txona ngu kuva txi di divalete sionho si si nga mahwa kale,

Varoma 2:28

M'judha wa ditshuri hi nga wule wa kutikomba hahanze dwe, ni wona wukwera wa ditshuri hi nga wule wu wonekako hahanze ha nyamani dwe;

Johani 7:22

Mosi a mi ningile wukwera (na i si nga ti to wukwera wu khatilwe ngu Mosi, aniko wu huma ka vakokwani), se ma yisa wukwerani m'thu ngu Sabbata.

Jeremiya 4:4

Mahani Sithiva ka Mkoma, mi thavisa didhowo da timbilu tanu, anu vavamna va ka Judha, ni vaaki va Jerusalema. Kasi kuhenya kwangu ku si vhutuki nga mndilo, wu turako ha kaku wu si timwi, ngu mhaka ya kubiha ka mithumo yanu.

Joxuwa 5:4

Mhaka yiya Joxuwa a nga va sinyisa ngu yona wukwera, ngu yiya: Votshe vathu vale va nga ti humile ngu Egipta, vavamna, votshe vavamna va yimbi, va ti ti fite txiwulani, hanzila, msana ka kuva va di humile ngu Egipta.

Dhewuteronome 10:16

Yisani wukwerani timbilu tanu, mi si bangisi tithamo tanu.

Eksodha 12:48

Kambe ngako mluveli wokari wu a hanyako kumweko ni nanu, a txi lava kudya m'buso wa Pasika ya Mkoma, vavamna votshe va nyumba yakwe, va fanete kusinyiswa wukwera; ngu msana a na va a txi sikota kudya nene m'buso wa Pasika, kambe a na va a txi balwa taku njivelekwa txanu; ni wammweyo awu i ku dikhuna, kha na mbi dya m'buso wa Pasika ya Mkoma.

Eksodha 4:25

Sekoko Zipora a to teka dirigwi do hinda, e wila ngu dona mxuvo wa mwanana wakwe wa mfana, a to gwesa ngu wona minenge ya Mosi, na a txi khene: “Ngu ditshuri awe u mwamna wangu wa mnoha.”

Genesisi 34:15

Hi na tumela dwe ngako hi txi pfana ka yiya mhaka: Mi fanete kutumela, ti to votshe vavamna hagari kwanu ve sinyiswa wukwera, kufana ni nathu,

Genesisi 17:23

Sekoko Abrahamu a to teka Ismayeli, mwanana wakwe, ni votshe vavamna vale va nga velekwa m'tini kwakwe, ni votshe vale va nga xawa ngu male, votshe va mazambi, ava va kuho m'tini kwakwe, a to va yisa wukwera, ka donedo tshiku, nga ti Txizimu txi nga mleletisa tona.

Genesisi 17:27

ni otshe mazambi a nyumbani kwakwe, vanana va nyumbani, mwendo vale va nga xawa ngu male ka vamatiko, va to yiswa wukwera kumweko nayo.

Genesisi 21:4

Abrahamu a to yisa wukwera mwanana wakwe Isaake mbimo yi a nga va ni mtxhanu wa masiku ni mararu, nga ti ti nga leletiswa tona ngu Txizimu.

Genesisi 34:22

Aniko vathu vava, va tumela dwe kuzumba ni nathu va txi maha vamwevo ni nathu, ngako votshe vavamna va hagari kwathu va txi sinyiswa wukwera, nga ti ni vona va nga sinyiswa wukwera.