Ezra 10:11 - Bhiblia Yo Sawuleka

¹¹ Sekoko, anu ti soleni masoni ka Mkoma, Txizimu txa vatate vanu, mi maha kuranda ka txona; hambanani ni vathu va matiko, ni vasikati va matiko.

Ezra 10:11 Referans Kwoze

Varoma 12:2

Mi nga xengetelweni ngu sa ditiko diya, aniko phindukani amu ka mapimo anu, kasiku mi ziva kuranda ka Txizimu: Ati i ku ta tinene, a ti ti mtsakisako, ni ti i ku ta kuhetiseka.

Mavingu 28:13

Awule a sisako sihambunyeto sakwe, kha na mbi dhuka e humelela; aniko awule a ti solako ni ku si leka, a na mana wumbilu.

Ezra 10:3

Konkuwa koko, a hi maheni txitumelelano ni Txizimu txathu, txaku hi na tshumeta votshe vasikati ni vanana vawe, madingano ni txilayelo txa Mkoma, ni txirumo txa Txizimu txathu; ti mahwa madingano ni Mlayo.

Joxuwa 7:19

Sekoko Joxuwa a to khene ka Akane: “Mwanangu, na ku kombela, dhumisa Mkoma, Txizimu txa ka Israyeli, u txi ti sola masoni kwakwe; womba kwangu kona kuwa ati u nga maha, u nga ni sisele.”

Vakolosa 1:10

ti to mi txi tsimbila ngu tifanelo ti ti lavekako masoni ka Mkoma, mi txi mtsakisa ka totshe timhaka, mi txi veka mihando ngu kuthuma mithumo ya yinene, mi txi kula amu ka kuziva Txizimu,

2 Vakorinto 6:17

Ngu toneto, “humani hagari kwawe, mi txi hambana navo. Mi nga gweseni txilo txo mbi basa, se ani ni na mi amukela, kuwomba Mkoma,”

Jeremiya 3:13

U fanete kutumela wubihi wako dwe, ti taku u lekile Mkoma, Txizimu txako, na u txi tutuma ka madhawa otshe uya ka sizimu sa vamatiko, hahatshi ka mindonga yotshe yo nyuka, kha ma engisa dipswi, kuwomba Mkoma.

Isaya 56:4

Nguko Mkoma a womba tiya madingano ni Mithenwa yile yi xayisako Masabbata angu, yi sawulako sile si ni tsakisako, yi xayisa txitumelelano txangu.

Masalmo 32:5

Ni ti tshanzile kwako sionho sangu, kha na sisa wubihi wangu, ni txi khani: “Ni na ti tshanza ka Mkoma, sihambunyeto sangu”; se u divalete mnandu wa txionho txangu.

Nehemiya 13:3

Ku to maheka koko taku va di pfite mlayo wuwa, va to thavisa ka Israyeli totshe tixaka ti ngadi patanelani.

Ezra 9:1

Na ti di gwitile totsheto, va tile kwangu madhota ma txi ta kha ona: Vathu va ka Israyeli ni vaphaxeli, ni Valevhi, kha va zivi ku ti hambanisa ni vathu va matiko awa, ngu kulondisela sinyenyeko sa Vakanana, Vaheti, Vaferezi, Vajebhusi, Vaamoni, Vamowabhi, Vaegipta, ni Vaamori,

Vahebheru 13:21

Mkoma wathu Jesu, txi na mi longisele sotshe si i ku sa sinene, kasi ku si mi vhuna kumaha kuranda ka txona; txona Txizimu txi na thume kwathu ati ti txi tsakisako, ngu Jesu Kristu, awu a fanelako kupfaliswa ngu malembe ni malembe.

Johani 9:24

Ka wumbidi, va to engeta ve m'dhana m'thu wule i nga ti dibhofu, va txi kha vona kwakwe: “Dhumisa Txizimu! Athu ha tiziva ti to eyo m'thu muonhi!”

2 Makronika 30:22

Ezekhiya a to womba-womba ka votshe va ka levhi ava va ku ni wutxhari wa wunene wo ziva Mkoma; se vathu votshe ve busa mtxhanu wa masiku ni mambidi, va ningela mningelo wa kudikha va txi dhumisa Mkoma Txizimu txa vatate vawe.

Ezra 10:10

Sekoko a to khukha Ezra, i ku mphaxeli, e va gela tiya: Anu mi hambunyetile, ngu kuteka vasikati va mamwani matiko, mi andisa kuhotela ka Israyeli.

Ezra 10:12

Se wotshe msengeletano wu to xamula ngu mapswi o guleka wu txi kha wona: Ti na maheke; madingano ni mapswi ako, eto ta hi dingana kumaha.

Nehemiya 9:2

Se liveleko la ka Israyeli li to ti hambanisa ni votshe vamatiko, se ve ema ve ti tshanza ngu mhaka ya sionho sawe ni wubihi wa vatate vawe.

Jeremiya 7:3

Mkoma wa Mabutho a Tiyimbi, Txizimu txa ka Israyeli, a khene: Txhukwatisani mahanyelo anu ni mithumo yanu, sekoko ni na mi tumela kusimamisa mi aka ka wuwa wukhalo.

Ezekhiyele 18:30

Ngu kumaha keto, ani ni na mi lamula, mmweyo ni mmweyo ngu tinzila takwe, awe nyumba ya ka Israyeli, kuwomba Mkoma Txizimu; ngonani, hundulukani ka sotshe sihambunyeto sanu, se wubihi kha wu na mbi mi humba.