Ezra 10:1 - Bhiblia Yo Sawuleka

¹ Se mbimo yile Ezra a nga khongela, e ti sola, e dila, e ti namisa masoni ka Nyumba ya Mkoma, vathu va msengeletano wa hombe wa va ka Israyeli, vavamna ni vavasikati, ni vanana, va to ta patana nayo, na va txi dila, ngu huwa ya hombe.

Ezra 10:1 Referans Kwoze

Dhaniyeli 9:20

Ni txi ngadi ni womba-womba ni kukombela, ni titshanza sionho sangu, ni sionho sa vathu vangu va ka Israyeli, ni txi veka kudila kwangu masoni ka Mkoma, Txizimu txangu, ngu mhaka ya mmango wo sawuleka wa Txizimu txangu,

Masalmo 119:136

Mirongo yangu ya khulunga nga mnambo, nguko mlayo wako kha wu xoniphwi.

Varoma 9:2

Na pfa kuxaniseka ka hombe ni kupandiseka ko mbi guma mbiluni kwangu.

1 Vafumeli 8:30

Engisa kudila ka txithumi txako ni ka vathu vako va ka Israyeli, mbimo yi va khongelako ka wuwa wukhalo; kambe awe engisa, ka wukhalo wu u zumbako ka wona nzumani, engisa kambe divalela.

Luka 19:41

Ngako a di hafuhi, a to wona didhoropa e di dilela.

Nehemiya 8:9

Se Nehemiya, wu i nga ti mfumeli ni mphaxeli Ezra, mabhalani, ni Valevhi vale va nga ti gondisa vathu va to kha vona ka votshe vathu: Ditshiku diya di sawulekile ka Mkoma Txizimu txanu, ngu toneto mi nga titsetseni, hambi ku ti dilela. Nguko votshe vathu va to dila va txi pfa mapswi a Mlayo.

Zakariya 12:10

Se ni na thela Moya wa wumbilu ni wa mikombelo txitimwi ka nyumba ya ka Dhavhidha, ni txitimwi ka vaaki va Jerusalema; va na wonetela kwangu, ani va nga ni thola; kambe va na m'dilela ku nga vo dilela mwanana wammweyo dwe; kambe va na dila ngu txiviti ngu mhaka yakwe, kufana ni tile ku diliswako tona mwanana wa matiwula.

Nehemiya 10:28

Se vamwani vathu, vaphaxeli, ni Valevhi, ni va vawoneleli va sike, ni vaembeleli, vanetine ni votshe va va nga ti hambanisa ni vathu va matiko ka Mlayo wa Txizimu, vasikati vawe, vanana vawe va vafana, ni vanana vawe vamahorana, totshe titxhari, ni vale va nga ti ti ni mtamo wo pfisisa

2 Makronika 20:9

Hi txi humelelwa ngu to biha, ti yimbi, mitungu mwendo nzala, athu i naya ema masoni ka nyumba yiya ni masoni kwako; nguko ditina dako di nyumbani muwa; hi nata huwelela tixaniso tathu se awe u na hi engisa u txi hi hulukisa.

Hoseya 14:2

Wombani mapswi anu, se mi hundulukela ka Mkoma, mi txi khanu: Thavisa wotshe wubihi, u amukela wunene; se hi na kuninga mphaxo wa sisofu sathu ku nga marole.

Jeremiya 13:17

Aniko mi si engisi, ni na dila txihunjani ngu mhaka ya wugwili wanu, maso angu ma na dila ngutu, me humisa mirongo, nguko vathu va Mkoma va yiswa wukarawani.

Jeremiya 9:1

I ti ku msungo wangu ka Txizimu wo hinduka wu ve mati, ni maso angu kuva txibuka txa mirongo, sekoko ni ndi na va dila wusiku ni mitshikari, vafi va mwanana wa txisikati wa vathu vangu!

Masalmo 32:5

Ni ti tshanzile kwako sionho sangu, kha na sisa wubihi wangu, ni txi khani: “Ni na ti tshanza ka Mkoma, sihambunyeto sangu”; se u divalete mnandu wa txionho txangu.

1 Vafumeli 9:3

Se Mkoma a to m'gela ku khene: Ni pfite mkombelo wako ni kudila kwako, u nga dila masoni kwangu; ni sawulekisile nyumba yi u nga yi aka, kasi u veka kona mule ditina dangu yotshe mbimo; se maso angu ni mbilu yangu si na va kona mule otshe masiku.

Mithumo 21:5

Kambe ngako ma di gumile masiku ale, hi to longela kasiku hi khukha. Hi khukhile na hi txi heleketwa ngu vavasikati ni sivananana. Ngako hi di humile hahanze ka didhoropa, hi to khizama mabambe ka mati hi khongela.

Mithumo 10:30

Se Korneliyo a to xamula, a txi khene: “Kupindile masiku mararu kala konkuwa, ni ti maneka ni txi khongela nyumbani kwangu, ngu txikhati txa wutxhanu ni mune. Konako ni to wona m'thu a di emile masoni kwangu, na a di ambate tinguwo to phatima, a txi khene:

2 Makronika 20:13

Vavamna votshe va ka Judha va to ema masoni ka Mkoma kumweko ni vanana vawe ni vasikati vawe.

Dhewuteronome 31:12

Tshanganisa vathu, vavamna ni vavasikati, vanana ni valuveli vale va ku madhoropani kwano kasi kuva txi engisa ni kugonda kuthava Mkoma, Txizimu txanu, ve khutala kuxayisa otshe mapswi a Mlayo wuwa.

Matewu 3:6

Va txi bhabhatiswa ngu ngene mnamboni ka Jordhani, va txi ti tshanza sionho sawe.

Ezra 10:6

Se Ezra a to khukha ngu masoni ka Nyumba ya Txizimu, e wulela ka txibhiya txa Jehohanani, mwana Eliyasibhe, a di hokile, kha ngadya dipawu, kambe kha sela mati, nguko a ti pandisekile ngu sihambunyeto sa vale va wukhumbini.

Nehemiya 1:4

Se ku to maheka taku, mbimo yile ni nga pfa mapswi eyo, ni to khalahatsha ni dila, ni karateka mndani ka masiku okari; ni to titona sakudya, ni kombela masoni ka Txizimu txa nzumani.

Nehemiya 1:6

Ti na pfisise koko tinzeve tako, ni maso ako ma na tuleke, kasi ku u engisa mkombela wa txithumi txako, awu ni wu mahako masoni kwako, wusiku ni mitshikari, ngu vanana va ka Israyeli, sithumi sako; kambe na ti veka hahatshi ngu mhaka ya sionho sa vanana va ka Israyeli, si hi nga kuonhela ngu sona; hambi ani ni nyumba ya tate wangu hi onhile.

Joxuwa 7:6

Sekoko Joxuwa a to vharula syambalo sakwe, a txi namisa khohe yakwe ha mafuni, masoni ka dibhokiso da Mkoma, kala ni minova, ene ni madhota a ka Israyeli; kambe va to ti vhungela dikhuma ha misungoni kwawe.

Joxuwa 8:35

Kha ka maneka ni dipswi ni da dimwedo, ka totshe tile Mosi a nga ti leletile, di nga mbi gondwa ngu Joxuwa masoni ka wotshe msengeletano wa ka Israyeli, ni ka vavasikati, ni ka vafana, ni ka valuveli vale va nga ti ti hagari kwawe.