Esteri 8:10 - Bhiblia Yo Sawuleka

¹⁰ Se ma to bhalwa ngu ditina da mfumeli Asuwero, me tsaniswa ngu txitambu txa ringi ya mfumeli; mapapilo ale ma nga rumelwa ngu manza a sirumwa so tsimbila ngu mahantxhi, si nga ti ti gadha mahantxhi a txibalani ka mfumel.

Esteri 8:10 Referans Kwoze

Dhaniyeli 4:1

Mfumeli Nebhukodhonosori a to rumela mhaka ka otshe matiko, mifumo ni ka vathu va totshe tidimi, vale va nga aka kotshe ha mafuni, a txi khene: Kudikha ku na ande hagari kwanu!

Jeremiya 51:21

kambe kumweko ni nawe ni phatulela dihantxhi ni m'gadhi wa dona; kambe kumweko ni nawe ni na phatulela txikotxikani ni wule a ku ka txona;

Jeremiya 2:23

U nga wombisa kutxani ku khawe, kha na nyenyeziswa, kha na londisela Bhahali kani? Hi nga wona nzila yako mreleloni, alakanya ti u nga maha; awe u dikameli da mazambo di tutumelako hale ni hale.

Isaya 66:20

Se va na wuyisa votshe vananu, va hagari ka otshe matiko, kasi kumaha mningelo ka Mkoma, na va di txitimwi ka mahantxhi, ni mu ka sikotxikani, ni mu ka misingo, ni txitimwi ka mamula, ni txitimwi ka mibhedhu, mmangoni kwangu ko sawuleka, kona Jerusalema, kuwomba Mkoma, kufana ni kuva vanana va ka Israyeli va txi tisa miningelo yawe ngu ka siya so basa, Nyumbani ka Mkoma.

Isaya 60:6

Mitxhambi yo tala ya makamelu yi na ku fenengeta, a kuta ngu Midhiyani ni Efa; yotshe yi nata ngu Sabha, ya nata ni nzalama ni dibaselo, ve nuwela wudhumo wa Mkoma.

Ekleziyaste 8:4

Nguko dipswi da mfumeli di ni mtamo; se i mani wu a no khene kwakwe: U maha txani kani?

Jobe 9:25

Masiku angu ma tutuma ngutu kupinda nyalivilo; ma tutumile, kha ma zivi ka nga wona wunene.

2 Makronika 30:6

Ku to rumelwa mitumi ka dotshe ditiko da Israyeli ni da Judha, yi di ni mapapilo awa ma nga bhalwa ngu dianza da mfumeli ni vathangeli vakwe madingano ni kuruma ka Mkoma a txi khene: Vanana va Israyeli, hundulukelani ka Mkoma, Txizimu txa Abrahama, ni Isaake, ni Israyeli, kasi ku ni txona txi tshumelela kwanu mi nga huluka manzani ka vafumeli va Asiriya.

1 Vafumeli 21:8

Sekoko Jezabheli a to bhala mapapilo ngu ditina da Akabe, se a txi ma lema ngu txitambu txakwe, e rumela mapapilo ale ka madhota ni vahombe va nga ti ti ho didhoropani kwakwe, kambe va nga ti zumba ni Nabhote.

1 Vafumeli 4:28

Va ti heleketa kumweko ni sevhadha, ni mwasi wa kudyisa mahantxhi o ndinda sikotxikani sa yimbi, ni hani ha a nga ti maneka kona mfumeli, madingano ni sileleto sa kona.

Esteri 8:8

Bhalani koko Vajudha, madingano ni ti mi ti wonako i di ta tinene masoni kwanu, ni madinano ni ditina dangu, se tsanisa ngu txitambu txa ringi ya mfumeli; nguko mibhalo yile yi bhalwako ngu ditina da mfumeli yi tsaniswa ngu txitambu txa ringi ya mfumeli, kha yi dingani kutxitxwa.

Dhaniyeli 6:8

Konkuwa koko, awe mfumeli, tsanisa txileleto, u sayina mibhalo, kasiku txi si txitxwi, madingano ni mlayo wa Vamedhi ni wa Vapersa, wu si dinganiko kutxitxwa.