Eksodha 8:27 - Bhiblia Yo Sawuleka

²⁷ Hi leke hi tsula, hi txi tsimbila mnava wa masiku mararu txiwulani, ngu kona hi no ya phaxa Mkoma, nga ti ene a nga hi gelisa tona.”

Eksodha 8:27 Referans Kwoze

Eksodha 3:18

Se vona va na engisa dipswi dako; u na tsula awe ni madhota a ka Israyeli ka Faro, mfumeli wa Egipta, u txi ya m'gela tiya: Mkoma, Txizimu txa Vahebheru, a tile kwathu. Konkuwa hi leke hi txi teka dipfhumba da masiku mararu hi txi tsula txiwulani, kasi hi txi ya phaxa ka Mkoma Txizimu txathu.

Eksodha 3:12

Txizimu txi ti kha txona: Ngu ditshuri ani ni na va ni nawe; ngu txiya txikombiso txi no komba ti to ani ni kurumile: Ngako u di humisile vathu vangu ngu Egipta, anu mi nata khozela Txizimu ka mmango wuwa.

Levhi 10:1

Nadhabhi ni Abhiyu, vanana va Aroni, mmwani ni mmwani a to teka txikadyana txakwe, e veka kona makala a mndilo, se ngu txitimwi ka ona e veka dibaselo, a txi ya ningela masoni ka Mkoma, ve leka mthetho wu Txizimu txi nga ti va ningile.

Eksodha 34:11

Xayisa ati nyamsi ni ku leletako, ni na tutumisa masoni kwako Vaamori, Vaheti, Vaferezi, Vahevhi ni Vajebhuzi.

Eksodha 10:26

Ni sona sifuyo sathu hi na tsula naso; kha ku na mbi sala hambi ni txala txathu, nguko hi na ya thavisa koneyo asi hi felako kukhozela ngu sona Mkoma, Txizimu txathu, hambi athu hi fanete kuya thavisa ka sona asi Mkoma a ku ni fanelo yo mahelwa mphaxo ngu sona, ngako hi di hokile koneyo.”

Eksodha 5:1

Ngu msana ka totshe Mosi ni Aroni va to tsula va txi ya wonana ni Faro, va txi ya kha vona: “Mkoma, Txizimu txa ka Israyeli, a womba tiya: Leka vathu vangu ve tsula, kasiku va txi ya ni mahela m'buso txiwulani.”

Matewu 28:20

mi txi va gondisa kuvekisa totshe tiya ni nga mi leleta tona. Se wonani, ni ni nanu yotshe mbimo, kala kugumani ka mafu.”

Eksodha 5:3

Vona va wombile va txi kha vona: “Txizimu txa Vahebheru txi tile kwathu. Ngu mhaka yeto hi leke hi txi teka dipfhumba da masiku mararu hi txi tsimbila mu txiwulani, kasi ku hi txi ya phaxa ka Mkoma, Txizimu txathu, kasi txi si hi dayi ngu mtungu ni ditxhari!”