Eksodha 7:11 - Bhiblia Yo Sawuleka

¹¹ Konako Faro a to ramba titxhari ni vanyamsorwo. Se tona titxhari ta ditikoni ka Egipta ti to maha toneto ngu wutxhari wa tona.

Eksodha 7:11 Referans Kwoze

Eksodha 7:22

Kambe titxhari ta Egipta, ni tona, ngu wutxhari wa tona ti to maha nga toneto; mbilu ya Faro yi to banga txima kha va engisa, nga ti Mkoma a nga ti wombile.

2 Timoti 3:8

Kufana ni kuwa Janesi ni Jambresi va nga eyisa Mosi, ngu toneto ni vona vava va kanetako ditshuri. I vathu va va nga onheka mapimo, va likholo lo mbi tsana.

Eksodha 8:18

Ti di ngeto, titxhari ta Egipta, ngu wutxhari wa tona, ti mahile ni tona, kasiku ti txi humisa tithwala, aniko kha ta sikota. Se ku to maneka tithwala ka vathu ni ka sihari.

Eksodha 8:7

Sekoko titxhari ta ditiko da Egipta, ngu wutxhari wa tona, ti to humisa makhele ma txi hangalaka txitimwi ka dotshe ditiko da Egipta.

2 Vatesalonika 2:9

Kuta ka m'bihi ku na kombiswa ngu mithumo ya Sathani, a na va ni mitamo yotshe, ni sikombiso, ni sidiwukiso sa makuhu.

Dhaniyeli 2:2

Se mfumeli a to dhana titxhari, ni vahuti, ni vanyatixolwe, ni va Vakaldheya kasiku ve ta txhamusela mfumeli, mloro wakwe; se vona va to ta tikombisa masoni ka mfumeli.

Genesisi 41:8

Se ku to maheka taku, ni mixo, mbilu ya Faro yi maneka yi di ha kukaratekani ka hombe, se e dhana votshe vanyamsoro ni vanyatixolo va ditiko da Egipta, e va xawutela miloro yi a nga va nayo, aniko ni wammweyo kha sikota ku yi txhamusela.

Vaefesu 4:14

Kasiku hi si swi hi maha vanana va va pengiswako ngu mavimbi, ve pepulwa ngu timoya ta gondo ya kukanganyisa ka vathu, ni marindi awe ma hi timetako.

Dhaniyeli 5:7

Mfumeli a to ruma, ngu mtamo, ti to kudhanwa tiñanga, ni Vakaldheya, ni vahuti; mfumeli a to womba ka titxhari ta Bhabhilona, a txi khene: “Awule a no gonda mibhalo yiya, e ni gela txhamuselo ya kona, a na ambekwa nguwo yo bhilivila, ni liketani la nzalama mkoloni kwakwe, se a na maha mfumeli wa wuraru amu ka mfumo wangu.”

Vagalatiya 3:1

Oh! Vagalatiya, maphuphulunu, i mani a nga mi xenga, anu vava Jesu Kristu a nga txhumayelwa masoni kwanu, nga mi to mu wona a txi gogotelwa ha txihambanoni, kani?

Matewu 24:24

Nguko va na humelela vamesiya va makuhu ni vaprofeti va makuhu, ava va no maha sixamaliso ni sidiwukiso sa hombe, ahawa koza, idiku to koteka, hambi vasawuleki va ndi na timetwa.

Dhaniyeli 5:11

Mfumoni kwako ku ni wamwamna wokari, a ku ni moya wa sizimu so sawuleka; eyo ka masiku a tate wako ku manekile kwakwe liwoningo, mapimo, ni wutxhari wo fana ni wutxhari wa sizimu. Se mfumeli Nebhukodhonosori, tate wako, ina, tate wako, awe mfumeli, a to m'veka kuva mthangeli wa titxhari, tiñanga, Vakaldheya ni vahuti.

Dhaniyeli 2:27

Dhaniyeli a to xamula masoni ka mfumeli, a txi khene: Txihunja txi mfumeli a txi lavako, kha ku na titxhari, mwendo vahuti, hambi tiñanga, va nga sikotako kutxhamusela ka mfumeli.

Mtuletelo 19:20

Kambe txikalani txi to ñolwa kumweko ni mprofeti wa makuhu, awu, ngu kuthumela txikalani, a nga ti mahile sixamaliso so kanganyisa ngu sona vale va nga amukela txixambanyo txa txikalani, ve khozela txithombe txa txona: Txikalani ni mprofeti wa makuhu va to rinzwa, va txi hanya, digovani ka mndilo, wu turako ngu txivavula.

2 Timoti 3:9

Kambe vona kha va na mbi ya kule ngutu, nguko wuphukuphuku wawe wu na ti kombisa ka votshe, kufana ni wuphukuphuku wa vona vale vavambidi.

Eksodha 7:12

Nguko mmwani ni mmwani a to rinza hahatshi ndonga yakwe, se tona ti to hinduka ti txi maha ni tona minyoka. Aniko ndonga ya Aroni yi to ti khadamulela tindonga tile tawe.

1 Samuwele 6:2

Vafilista va to dhana vaphaxeli ni tiñanga, va txi kha vona: Hi na maha txani athu ngu dibhokiso da Mkoma kani? Hi geleni ti hi no di tshumetisa tona di txiya ka wukhalo wa dona.

Dhaniyeli 4:6

Ani ni to veka m'thetho waku kudhanwa totshe titxhari ta Bhabhilona, kasiku ti ta ni txhamusela mloro wangu.

Eksodha 8:3

Mnambo wu na tala ngu makhele, ona ma na kwela ma txi wulela mu nyumbani kwako, mu txibhiyani kwako ko otela kona, txitimwi ka m'bhedhu wako, ni mu tinyumbani ka mahalamu ako ni ka ngamu yako yotshe, ni mu sikhoni kwako, ni mu timbiyani kwako.