Eksodha 6:8 - Bhiblia Yo Sawuleka

⁸ Ngu msana ani ni na mi yisa ka ditiko di ni nga thembisa ngu txixambanyo ka Abrahamu, ka Isaake ni ka Jakobe; kambe ni na mi ninga di txi maha thomba yanu; ani ngani Mkoma.

Eksodha 6:8 Referans Kwoze

Genesisi 26:3

U nga sikota kuaka ka ditiko diya, ani ni na va ni nawe, kambe ni na kukatekisa. Nguko otshe matiko awa ni na kuninga awe ni liveleko lako, ni txi hetisa txixambanyo txi ni nga txi maha ka Abrahamu, tate wako.

Genesisi 15:18

Ka donedo ditshiku, Mkoma a to maha Txitumelelano ni Abramu, a txi khene: “Ni ningete ditiko diya ka liveleko lako, kukhukhela mnamboni ka Egipta, kala ka mnambo wa hombe, wa Ewufrate.

Ezekhiyele 20:42

Se mi na tiziva taku ani ngani Mkoma, mbimo yile ni no mi maha mi tshumelela ditikoni ka Israyeli, ka ditiko dile ni ngadi gulela dianza, kasi ku di ninga vatate vanu.

Genesisi 14:22

Aniko Abramu a xamute ka mfumeli wa Sodhoma, a txi khene: “Na xambanya ngu kugula dianza dangu masoni ka Txizimu Nyatxitimwi, i ku M'vangi wa nzuma ni mafu,

Ezekhiyele 47:14

Se di na va thomba yanu, a kheno ni kheya; nguko ni gute dianza txitimwi ka dona, kasi ku di ningela ka vatate vanu; ngu kumaha keto, edo ditiko, di na va thomba yanu.

Dhewuteronome 32:40

Ani na guleta dianza dangu di komba nzumani, ni xambanya ni txi khani: Ngani wu ni hanyako kala kupinduka!

Eksodha 32:13

Khumbula sithumi sako Abrahamu, Isaake ni Israyeli, avale u nga xambanya kwawe u txi khawe: Ni na andisa liveleko lanu li txi nga tinyeleti ta nzumani, kambe ni na ningela dotshe ditiko diya ka vanana vanu adile ni ngadi womba, kasi ku dimaha thomba yawe, kala kupinduka.”

Genesisi 35:12

Ani na kuninga ditiko di ni nga ninga Abrahamu ni Isaake, ni ka liveleko lako; ali li no maneka msana kwako.”

Genesisi 28:13

Ngu txitimwi ka dinera Mkoma a ti emile, se, a txi khene: “Ani ngani Mkoma, Txizimu txa Abrahamu, tate wako, ni Txizimu txa Isaake. Ditiko di u nga otela ka dona, ani ni na di ningela kwako ni ka liveleko lako.

Ezekhiyele 36:7

Ngu konaho, Mkoma Txizimu a khene: Ni guletile dianza, kasi ku vamatiko vale va nga mi randela, ve rwala tingana tawe vapune.

Ezekhiyele 20:28

Nguko a kule ni nga ti ti va wuleta ka ditiko dile ni nga guleta dianza, kasi kuvaninga, vona va to wonetela ka sotshe simangwana, ni ka yotshe mindonga yo txhuma, kambe va ningete koneho miphaxo yawe, ve kombisa kona hale ku ni henyisa kwawe ngu miningelo yawe, va txi veketela ni sa kubhumula, se va txi ningela miningelo ya sa kusela.

Ezekhiyele 20:23

Kambe ni va guletete dianza amu txiwulani, kasi ku va hangalasa hagari ka matiko, ni ku va theketa ha mafuni;

Ezekhiyele 20:15

Hambi keto ni guletile dianza txitimwi kwawe, amu txiwulani, kasi ni si va leki ve wulela ka ditiko dile ni nga ti ti va ningile, dile di khulungako masi ni wulombe, kambe i ku wudhundo wa matiko otshe.

1 Samuwele 15:29

Kambe awule i ku Mtamo wa va ka Israyeli kha hembi mwendo kutilaya; nguko hi nga m'thu waku a na tilaya.

Mitengo 23:19

Txizimu kha txi na makuhu nga m'thu. Lambi, txona hi nga mwanana wa m'thu wo txitxa-txitxa. Txizimu hi nga txo womba dwe txi si mahi, ina kha txi mahi ti txi nga womba kani? Kasi hi nga txo womba ti txi tatiseka kani?

Eksodha 6:6

Ngu mhaka yeto, u na womba ka vanana va ka Israyeli u txi khawe: Ani ngani Mkoma, kambe ni na mi humisa ka mithumo yo nemela ya ditikoni ka Egipta, ni na mi thusa wukhumbini kwanu, kambe ni na mi tirula ngu dianza dangu da mtamo ni mthumo wa hombe wa kulamula.

Eksodha 6:2

Txizimu txi wombile kambe ka Mosi txi txi kha txona: “Ani ngani Mkoma!”

Mtuletelo 10:6

Yi txi xambanya ngu wule a hanyako ka kwa mbi na magwito, a nga vanga nzuma ni sotshe siya si ku ka yona; mafu ni sotshe siya si ku ka ona; linene ni sotshe si si ku ka lona, yi txi kha yona: “Kha ku nga ngadi ni mbimo!

Eksodha 13:5

Ngako Mkoma a di mi hokisile ditikoni ka Vakanana, da Vaheti, da Vaamori, da Vahevhi ni da Vajebhusi, adi a nga xambanya ku di ningela ka vatate vanu, ditiko di dikhulungako masi ni wulombe, ditshiku diya mi na di vekisa, ka wona wuwa mtxima.

Mitengo 14:30

Lambi, kha mi na mbi wulela ka ditiko di ni nga xambanya ti to mi aka ka dona; hahanze ka Kalebhi mwana Jefoni, ni Joxuwa, mwana wa Nuni.

Joxuwa 24:13

Ni mi ningile ditiko di mi nga mbi di thumela ni madhoropa aale mi nga mbi ma aka, aale mi zumbako ka ona, mivhinya ni miolivha ayile mi nga mbi yi phaya, ayile se mi dyako mihando ya kona.”

Nehemiya 9:15

Se u va ningile sakudya sa nzumani kasi kuve mana kumalata nzala yawe, ni mati o huma dirigwini kasi ku tima ditora dawe. Kambe u va leleta kuve wulela ve teka ditiko dile u ngadi gulela dianza u txi khawe u na va ninga.

Eksodha 6:4

Kambe ni emisile txitumelano txangu navo, kasi kuvaninga ditiko da Kanana, ditiko di va nga zumba ka dona kota valuveli.

Mitengo 10:29

Sekoko Mosi a to khene ka Hobhabhe, mwana Reweli, mmidhiyani, tate wa Mosi ngu ka msikati wakwe: “Athu hiya ka wukhalo wule Mkoma a nga khene: Ni na mi ninga; a hi tsule hotshe, athu hi na kuxayisa kha kwati; nguko Mkoma a thembisile kumaha wunene ka Israyeli.”

Mitengo 11:12

Ina ngani ni ku tate ni mame wa ngamu yiya yotshe kani? Ina ngani ni nga va veleka, aha ka kuza u ni gela ku khawe: “Va beleke ha msana kwako, nga txikhonje txi belekako mwanana ha msana, u txi va yisa ka ditiko u nga thembisa ngu txixambanyo ka vatate vathu kani?”

Dhewuteronome 4:31

Nguko Mkoma, Txizimu txako, Njizimu txa wumbilu, kha na mbi mi leka, kambe kha na mbi mi lovisa, nguko kha na mbi divala txitumelelano txi ene a nga xambanyelana ni vatate vanu.