Eksodha 35:21 - Bhiblia Yo Sawuleka

²¹ Ni votshe avale va nga ti ni kunavela ka ditshuri ni timbilu to lulama va to tsula se va txi ya teka miningelo yawe kasi ku ta ningela ka Mkoma yi txi maha miningelo ya simaha sa wuaki wa ditenda da msengeletano ka mthumo ni ka syambalo so sawuleka.

Eksodha 35:21 Referans Kwoze

Eksodha 25:2

“Gela vanana va ka Israyeli va txi tisa msengo. Ni na amukela msengo wa m'thu ni m'thu awu mbilu yakwe yi rumako ku ti maha.

1 Makronika 29:14

Nguko ngani mani ani, ni vathu vangu mba mani, vaku hi nga sikota kuninga simaha so fana ni siya, ngu kuranda kwathu kani? Nguko sotshe sita ngu kwako, se ha si ningela manzani kwako.

Eksodha 35:29

Votshe vanana va ka Israyeli, vavamna ni vavasikati, avale va nga ti ni kunavela kumaha mningelo wuhi ni wuhi kasi kukulisa mthumo awu Mkoma a nga ruma Mosi kasiku e wu maha, m'thu ni m'thu a to heleketa ngu kuranda ka mbilu mningelo ka Mkoma.

Eksodha 35:26

Vavasikati votshe avale va nga ti txharihile ni timbilu to tsakela kuthuma, va to luka matoya a tiphongo.

Eksodha 35:5

Thavisani txokari aha ka tithomba tanu, kasi kumaha mningelo ka Mkoma! M'thu wule a ti lavako ngu mbilu yakwe, a fanete kumaha mningelo ka Mkoma ngu nzalama, ni silivhela, ni koporo;

Eksodha 36:2

Mosi a to dhana Bhezaleli ni Oholiyabhe ni votshe vathu va wutxhari avale Mkoma a nga va ninga wuzivi, votshe avale timbilu tawe ti nga va ruma ti to ve ti ningetetela amu ko maha yotshe mithumo.

Eksodha 35:22

Vavamna ni vavasikati, votshe avale va nga txi ti lava ngu mbilu, va to kombisa, va txi heleketa masinda, singeda, tiphera, tiketani sotshe simaha sa nzalama; mmwani ni mmwani a to maha mningelo wa nzalama, awule a nga wu longisela kuva wa Mkoma.

2 Vakorinto 9:7

M'thu a na ningele kota nga ti a xuvisako tona mbiluni kwakwe, asi karateki mwendo kukurumetwa, nguko Txizimu txi randa awu a ningelako ngu litsako.

2 Vakorinto 8:12

Nguko, ngako ku diho kuxuva kuhumisa misengo, sa amukeleka asi m'thu a ku naso; kha ku nga ni mhaka ya si a ku si nga naso.

Matewu 12:34

Lixaka la timamba, mi nga sikotisa kutxani kuwomba ditshuri, na mi di vabihi kani? Nguko txisofu txi womba-womba ti ti nga tala mbiluni.

Jeremiya 30:21

Mthangeli wawe a na huma ngu ka vona vanyamne, ni mfumeli wawe, a na huma hagari kwawe vapune. Ni na mtshuketisa, a nata kwangu; nguko i mani a khalako kutshuketa kwangu kani? Kuwomba Mkoma.

Mavingu 4:23

Txitimwi ka sotshe si si dinganako kuxayiswa, xayisa mbilu yako, nguko tita ngu ka yona tinzila ta wutomi.

Masalmo 110:3

Vathu vako va nata kwako ngu kutsaka, ngako u txi xoma matxhari a kuya yimbini. Mazambi ma nata kwako ma di ambate syambalo sa bombo, nga txiandela txa mixo.

Ezra 7:27

A na dhumiswe Mkoma, Txizimu txa vatate vathu, a nga thela timhaka tongeto mbiluni ka mfumeli, kuva hi tshurisela Nyumbani ka Mkoma, kona Jerusalema.

1 Makronika 29:9

Se vathu va to tsaka ngu kule va nga ninga ngu kuranda kwawe, nguko va ningete ka Mkoma ngu mbilu to hetiseka; nene mfumeli Dhavhidha, a to tsaka ngu kutsaka ka hombe.

1 Makronika 29:3

Se ngu kudhunda kwangu Nyumba ya Txizimu txangu, ni na ningela nzalama ni silivhela, ni si ningela Nyumbani ka Txizimu txangu, hahanze ka sotshe siya ni nga lulamisela nyumba yo sawuleka.

1 Makronika 28:9

Se awe mwanangu Solomoni, ziva Txizimu txa tate wako, u txi thumela ngu mbilu ya yinene, ni mhefemulo wo txhatxheka; nguko Mkoma wa xola totshe timbilu, ni kupfisisa totshe timhaka ta mialakanyo; se ngako u txo mlava, u na mmana; kambe ngako u txi mleka, a na kulamba kala kupinduka.

1 Makronika 28:2

Se mfumeli Dhavhidha a to khukha a txi ema, a txi khene: Ni engiseni vanathu, anu vathu vangu: Ni ti ni makungo mbiluni kwangu o aka nyumba yo humula ka yona dibhokiso da txitumelelano txa Mkoma, ni ya txikhigetelo txa mikondo ya Txizimu txathu, se ani ni ti ti lulamisete kuaka.

2 Samuwele 7:27

Nguko awe, Mkoma wa Mabutho a Tiyimbi, Txizimu txa Israyeli, u wombile tinzeveni ka txithumi txako, u txi khawe: Ni na kuakela nyumba. Ngu kumaha keto, txithumi txako txi mani mtamo wo maha mkombelo wuwa mbiluni ka txona.

Valamuli 5:12

Wuka, wuka awe Dhebhora, wuka, wuka u txi thula ndando; khukha, awe Bharake, u txi thangela ava va nga ti ku ñote, awe mwana Abhinowami!

Valamuli 5:9

Mbilu yangu yi bonga vathangeli va ka Israyeli, a vale va nga ti ningela ngu kuranda kwawe kasi kuthumela ditiko. Dhumisani Mkoma!

Valamuli 5:3

Anu vafumeli engisani! Anu vathangeli engisani! Ani ni na dhumisa Mkoma ngu kuembelela, Ni na embelela tindando, ni dhumisa Mkoma, Txizimu txa Israyeli!

Eksodha 35:20

Sekoko konako wotshe msengeletano wa vanana va ka Israyeli wu to khukha masoni ka Mosi wu txi huma.

1 Makronika 29:8

Se ava va nga maneka va di ni marigwi a lisima, va to ma ningela kuva thomba ya Nyumbani ka Mkoma, manzani ka Jeyeli, mugerisoni.

Ezra 2:68

Se vamwevo va vathangeli ka vatate vawe, va tile Nyumbani ka Txizimu, kona Jerusalema, ve tisa siningo ngu kuranda kwawe, kasi ku yi tsanisa ka wukhalo wa yona.