Eksodha 34:20 - Bhiblia Yo Sawuleka

²⁰ U na tekisa matiwula a mbongola ngu txihambana, mwendo u na yi wila thamo, u na tirula otshe matiwula a vanana vako va vafana. M'thu a nga thuke a txi humelela masoni kwangu asi nga ni txilo manzani kwakwe.

Eksodha 34:20 Referans Kwoze

Dhewuteronome 16:16

Sikhati siraru ngu dilembe votshe vavamna va fanete kuya ti kombekisa masoni ka Mkoma, Txizimu txako, ka wukhalo wule ene a nga wu sawula: Ka M'buso wa Mapawu o mbi Tshumbelwa, ni ka M'buso wa Mavhiki ni ka M'buso wa Matenda; kambe a nga ti kombekise masoni ka Mkoma a sa ñola txilo;

Eksodha 23:15

U na vekisa M'buso wa Mapawu o mbi Tshumbelwa. Amu ka mtxhanu wa masiku ni mambidi u na dya mapawu o mbi tshumbelwa, nga ti ni nga kuleletelisa tona, ka mbimo yi yi nga emiselwa, amu ka mtxima wa Abhibhi, nguko ngu wonewo mtxima u nga huma ngu wona ditikoni ka Egipta. Ni wammweyo a nga sikote kuhumelela masoni kwangu a sa ñola txilo;

Eksodha 13:13

Kambe otshe matiwula a timbongola, u na txitxisa ngu txinvutana; se ngako u si txitxisi ngu txinvutana, u na wila msungo; aniko otshe matiwula a vathu, va lixaka la ka kwanu, va na ningelwa ka Mkoma.

Mitengo 18:15

Otshe matiwula ma no tiswa ka Mkoma, a vathu ni a sihari, ma nava ako; hambiko u na tirula matiwula a vathu; ni matiwula a sihari so yila, u ma tekisa.

Eksodha 13:15

Nguko, ngako Faro a di bangisile mbilu yakwe, asi hi leki hi txi huma, Mkoma a date otshe matiwula a ditikoni ka Egipta, kukhukhela ka matiwula a vathu kala ka matiwula a sihari. Ngu toneto, hi phaxako ka Mkoma ngu matiwula otshe a txiwamna, aniko ha wukhaloni ka vanana vathu va txiwamna hi phaxa ngu sifuyo.

2 Samuwele 24:24

Kambe mfumeli a to khene ka Arawuna: Ahim-him, ni lava kuxava kwako ngu male, nguko kha ni na mbi ningela Mkoma, Txizimu txangu, miphaxo ya kuhiswa yi ni nga yi mana walo. Ngu kumaha keto, Dhavhidha a to xava txizenda ni tihomu ngu mtxhanu wa magumi a maxekele a silivhela.

Eksodha 13:10

Ngu mhaka yeto mlayo wuwa mi na wu vekisa ka mbimo yi yi nga emiselwa, ka dilembe ni dilembe.

Eksodha 22:29

U nga swele ni sile u nga khata kuelula, ni vhinya ya kona; u na ni ninga matiwula a vanana vako.

Eksodha 13:12

u na ningela ka Mkoma, votshe vanana va mazambi avale i ku matiwula, ni sifuyo sotshe sa matiwula sa vamatune si mi ku naso, nguko vanana vo khata va lumba Mkoma.