Eksodha 33:7 - Bhiblia Yo Sawuleka

⁷ Se Mosi a to teka ditenda a txi ya di gwimba hahanze, kule ni wugovelo, ve di ningile ditina daku ditenda da msengeletano. Ni votshe vale va nga ti lava ku wotisa mhaka ka Mkoma, ayile yi nga ti va karata, va ti ti ya ka ditenda da msengeletano, hahanze ka wugovelo.

Eksodha 33:7 Referans Kwoze

Isaya 59:2

Aniko wubihi wanu wa veka muhingano hagari kwanu ni Txizimu txanu, ni sionho sanu si sisa khohe ya Txizimu kwanu, kasi ku txi si mi engisi.

Mavingu 15:29

Mkoma a kule ni vaonhi, kambe a na engisela mikombelo ya vo lulama.

2 Samuwele 21:1

Se ka masiku a Dhavhidha ku to maneka nzala mndani ka malembe mararu o londetelana; kambe Dhavhidha a to wotisa ka Mkoma, aniko Mkoma a to khene kwakwe: I mhaka ya Sawule ni nyumba yakwe ya wudayi, nguko va theketile mnoha wa Vagibheyoni.

Dhewuteronome 4:29

Sekoko kukhukhela koneyo, u na lava Mkoma, Txizimu txako, se u na ya mmana, ngako u txi mlava, ngu yotshe mbilu yako ni wotshe moya wako.

Hoseya 9:12

Hambi va txi ta wunja vanana vawe, ani ni na va tekela, ku si sali m'thu ni wammweyo; nguko dikhombo kwawe, ngako kambe vona va txi ni leka!

Masalmo 35:22

Aniko awe, Mkoma, u ti woni nawe! U nga malale! U nga ti hambanise ni nani, Mkoma!

Masalmo 27:8

“Mbilu yangu ya ni gela, yi txi kha yona: Tsula u txi ya wonana ni Mkoma;” Ina, ani ni lava ku kuwona, Mkoma!

Masalmo 10:1

Mkoma, nji txani u txi emela kule kani? Nji txani u txi sisala ka sikhati so xanisa kani?

Vahebheru 8:2

Ene i mthumeli wa wukhalo wo Sawuleka wa ditenda da ditshuri, di di nga akwa ngu Mkoma, i si nga ngu m'thu.

Eksodha 18:7

Sekoko Mosi a to huma e hingeta msade wakwe, a txi ya khizama masoni kwakwe e mpswopswa, va to khambana thenga, se ve wulela ditendani.

Eksodha 18:12

Sekoko Jetro, msade wa Mosi, a to teka mningelo wo hiswa ni mphaxo, a txi tsula naso ka Txizimu; Aroni ni otshe madhota a ka Israyeli va tile ve ta dya mapawu kumweko ni msade wa Mosi, masoni ka Txizimu.

Eksodha 33:6

Sekoko, kukhukhela mmangoni ka Horebhi, vanana va ka Israyeli va to thavisa sotshe simaha sawe sa bombo.

Eksodha 33:8

Se ku to maheka taku mbimo yile Mosi a nga ti huma eya ditendani, vathu votshe va ti ema, mmwani ni mmwani a ti maneka a di emile ha txikeni ka ditenda dakwe, va txi mlondetela ngu maso, kala Mosi e wulela ditendani.