Eksodha 33:16 - Bhiblia Yo Sawuleka

¹⁶ Hi na ti zivisa kutxani ati to ani ni vathu vako hi ni dithomo masoni kwako kani? Ina hi nga ti to awe u na tsimbila kumweko ni nathu kani? Ngu mhaka yeto hi nava hi txi woneka, ani ni vathu vako, ti to hi hambanile ni vathu votshe va mifumo ya ha ditikoni.

Eksodha 33:16 Referans Kwoze

Dhewuteronome 4:7

Nguko ngu wuhi mfumo wa hombe, awule sizimu sa kona si ku hafuhi kufana ni Mkoma, Txizimu txathu, ka sotshe sikhati sile hi mkhongelako kani?

Mitengo 14:14

Se vona va na womba ka vaaki va diya ditiko, nguko vona va engisile ti to awe Mkoma, u zumba hagari ka vava vathu, ni ti to awe wa kombisa khohe yako, ni direfu dako di zumba txitimwi kwawe, ni yimwani mhaka ta ziwa ti to ni mitshikari wa thangela masoni kwawe ngu direfu, ni wusiku kambe waho ngu kutura ka mndilo.

1 Vafumeli 8:53

Nguko awe u va sawute hagri ka vathu votshe va ha mafuni ku veva thomba yako, ngako u nga womba ngu mthumo wa txithumi txako Mosi, mbimo yile u nga humisa vatate vathu ditikoni ka Egipta, awe Mkoma Txizimu.

Matewu 1:23

“Wotuma a na mana txirumbu e veleka mwanana wa m'zambi, awu a no raywa ditina daku i Emanuweli, (Emanuweli, ati ti wombako ku ‘Txizimu txi na ni nathu.’ ”)

Eksodha 34:10

Sekoko Mkoma a xamute a txi khene: “Ni na maha txitumelelano ni nawe; masoni ka votshe vathu vako, ni na mahetela sixamaliso, sile si si ziviko kumaheka ni ka wuhi wukhalo, hambi ni ka wuhi mfumo, ni vathu vava va ku randelako se va na wona mthumo wa Mkoma, nguko simaha so thisa ni na si mahetela ngu mtamo wako.”

2 Vakorinto 6:17

Ngu toneto, “humani hagari kwawe, mi txi hambana navo. Mi nga gweseni txilo txo mbi basa, se ani ni na mi amukela, kuwomba Mkoma,”

2 Samuwele 7:23

I mani a kuho wo fana ni vathu vako, wo fana ni va ka Israyeli, vathu va i ku vokha ha mafuni, ava Txizimu txi nga va tirula ku va vathu va txona kani? Kambe a ti mahete ditina, se e mi mahela simaha sa hombe so thaviseka ditikoni kwako, masoni ka vathu vako, avale awe u nga va humisa Egipta, ngu kuthavisa matiko ni sizimu sa ona kani?

Eksodha 8:22

Se ka ditshiku dile, ni na hambanisa ditiko da Goxeni, adi va zumbako ka dona vathu vangu, ti to ku si maneki koneyo mabhawu, se u na tiziva ti to ani ngani Mkoma hagari ka ditiko dotshe.

Masalmo 147:20

Ene kha ti maha tiya ka mamwani matiko, kha ma tulela kuziva mithetho yakwe. Dhumisani Mkoma!

Dhewuteronome 4:34

Mwendo njizimu txokari txi nga duketa kuya teka vathu hagari ka vamwani vathu, ngu mithumo ni sikombiso, ni sixamaliso, ni kulwa ngu dianza do tsana, di nga guleka ni mithumo ya hombe yo thisa ku nga totshe tile Mkoma, Txizimu txako, a nga ti maha ditikoni ka Egipta, na anu mi txi ti wona kani?

Mitengo 23:9

Nguko na mmona ni di txitimwi ka marigwi, ni wonisisa ni di mmangoni, ni wona vathu va nga zumba ngu didhawa. Ava va si ti fananisiko ni vamwani vathu, va mamwani matiko.

Levhi 20:24

Ani ni mi gete ni txi khani: Anu mi na ya fumela ditiko dawe, ni na mi ninga dona di txi va i di thomba yanu, ditiko edo di khulungako masi ni wulombe. Ani ngani Mkoma, Txizimu txanu, ni nga mi thavisa hagari ka vamwani vathu.

Levhi 20:26

Mi fanete ku ti maha vo sawuleka kwangu, nguko ani Mkoma ni wo sawuleka, kambe ni mi hambanisile ni totshe tixaka ta vathu, kasiku mi va mi di vathu vangu.

Eksodha 34:9

a txi khene: “Mkoma, ngako ani ni di mani kukateka masoni kwako, tsimbila kumweko ni nathu, hambiko vathu vava i ku va misungo yo banga, divalela wubihi wathu ni sionho sathu, u txi hi fuya, hi va thomba yako.”