Eksodha 33:11 - Bhiblia Yo Sawuleka

¹¹ Mkoma a ti ti womba-womba ni Mosi khohe ni khohe, nga m'thu a txi womba-womba ni mngana wakwe, ngu msana Mosi a ti ti tshumela a txi ya wugoveloni. Joxuwa, mwana Nune, m'vhuneteli wakwe wa dijaha, a ti si khukhi amu ditendani.

Eksodha 33:11 Referans Kwoze

Mitengo 12:8

Ene no womba-womba nayo ngu txisofu, ni ti kombisa, na i si nga kusisalani; kambe ene wa so maha ngu kuwona wutumbu wa Mkoma; ngu kutxani koko mi nga mbi thava kulenga txithumi txangu Mosi kani?”

Dhewuteronome 34:10

Ka va ka Israyeli, kha nga humelela kambe mmwani mprofeti wo fana ni Mosi, awu Mkoma a nga m'ziva, khohe ni khohe.

Eksodha 33:9

Se mbimo yile Mosi a nga ti wulela ditendani, phande ya direfu yi ti ti relela yi ta ema ha txikeni, se Mkoma e womba-womba ni Mosi.

Eksodha 24:13

Se Mosi a to khukha ni Joxuwa txithumi txakwe; se Mosi e kwela mmangoni ka Txizimu.

Dhewuteronome 5:4

Mkoma a wombawombile ni nanu khohe ni khohe, a di hagari ka mndilo, txitimwi ka mmango.

Genesisi 32:30

Wukhalo wuwa Jakobe a to wu raya ditina daku i Peniyeli, nguko ene a ti khene: “Ani ni wonani ni Txizimu, khohe ni khohe, aniko ni ngadi ni hanya.”

Jakobe 2:23

Ngu toneto, yi tatisekile mibhalo yi yi ku: “Abrahamu a khotwe ka Txizimu, se atiya ti mningile ku e maha kota mlulami, se ene a dhanwi ku i mngana wa Txizimu.”

Johani 11:11

Msana ka kuva a di wombile eto, a to va gela, a txi khene: “Lazaro mngana wathu a otete: Ani ni yela kuya mu wusa.”

Johani 3:29

Nyamne wa msikati ngu mteki, se pheleketi ya mteki yo mu bangalata ni ku mu engisa, yi tsaka ngu kutsaka ka hombe, ngako yi txi pfa dipswi da mteki: Aliya ngu lona litsako langu, lona li hetisekile.

Isaya 42:8

Ani ngani Mkoma; adiya ditina dangu; wudhumo wangu koko, kha ni na mbi ninga mmwani, hambi kudhumiswa kwangu, kha ni na mbi kuningela ka sithombe so vatwa.

Jobe 16:21

O! Iti ku waho wo phota ka Txizimu ngu mhaka ya m'thu, nga mwanana wa m'thu ngu mhaka ya mngana wakwe!

2 Makronika 20:7

Awe Txizimu txathu hi nga awe u nga tutumisa vahanyi va ditiko diya masoni ka vathu vako va ka Israyeli, u di ningela ka vanana va Abrahamu mngana wako kani?

Eksodha 32:17

Mbimo yi Joxuwa a nga engisa diguwa da vathu, va nga txi tsaka, a to pimisa ati to ndihuwa, se a to womba ka Mosi a txi khene: “Ka pfala tihuwa ta yimbi ha wugoveloni.”

Eksodha 17:9

Konako Mosi a wombile ka Joxuwa, a txi khene: “Sawula vavamna kasiku, mangwana u nata huma u txi yalwa ni Vaamaleki; ani ni na zumba txitimwi ka mmango ni ndonga ya Mkoma manzani.”

Eksodha 33:10

Se mbimo yile vathu va nga txi wona phande ya direfu yi txi ta ema ha txikeni ka ditenda, mmwani ni mmwani a txo khizama a di ha txikeni ka ditenda dakwe.

Mitengo 11:28

Se Joxuwa, mwana Nune, mthumeli wa Mosi, i ku mmweyo wa majaha akwe a nga ma sawula, a to xamula ka Mosi a txi khene: “Awe nyamne wangu Mosi, mtsimbe kuprofeta!”

Mitengo 12:7

Kambe kha ni mahi eto ka Mosi txithumi txangu; a thembekile amu nyumbani kwangu kotshe.

Dhewuteronome 31:14

Se Mkoma a to khene ka Mosi: “Masiku ako a kufa ma hafuhi; dhana Joxuwa, u txi ta nayo amu ditendani da msengeletano, kasi ku ani ni mi ninga sileleto sangu.” Sekoko Mosi ni Joxuwa, va to tsula ditendani ka msengeletano.