Eksodha 32:11 - Bhiblia Yo Sawuleka

¹¹ Mosi a to khongela ka Mkoma, Txizimu txakwe, a txi khene: “Mkoma, ngu kutxani kuhenya kwako ku txi tura u txi wukela vathu vako, avale u nga va humisa ditikoni ka Egipta, ngu mtamo wa hombe ni dianza do tsana kani?

Eksodha 32:11 Referans Kwoze

Masalmo 106:23

Txizimu txi pimisile ku va lovisa. Aniko, Mosi, msawuleki wa Txizimu, a va kombelete, kasiku Txizimu txi kuthutha, txi si va lovisi.

Isaya 63:17

Ngu kutxani, awe Mkoma u hi mahako hi hambuka ka tinzila tako kani? U bangisela txani timbilu tathu kuva hi si ku thavi kani? Wuyisa tihunzu ta thomba yako, ngu kuranda sithumi sako.

Mitengo 16:22

Se vona va towa ngu tikhohe tawe, ve dila, va txi kha vona! Awe Txizimu! Txizimu txa mihefemulo ya nyama yotshe! Ina wa so henyela wotshe msengeletano, ngu mhaka ya txionho txa m'thu mmweyo kani?

Mitengo 11:11

Se Mosi a to khene ka Mkoma: Ngu kutxani u mahela wubihi txithumi txako kani, ngu kutxani ni si maniko dikato masoni kwako, na u ti ni rwekile mrwalo wa votshe vava vathu kani?

Eksodha 32:7

Sekoko Mkoma a to khene ka Mosi: Tsula, relela, nguko vathu vako, avale u nga va humisa ditikoni da Egipta, va onhile.

Mitengo 14:13

Se Mosi a to khene ka Mkoma: Vaegipta va ti zivile ti to ngu mtamo wako, u mahile ti to vathu vava ve huma hagari kwawe, u va tisa hawa.

1 Samuwele 15:11

Na tilaya nguku ni nga veka Sawule e maha mfumeli; nguko a lekile kulondeta sileleto sangu, kambe kha xayisa mapswi angu. Sekoko Samuwele a to henya, e dila ka Mkoma wusiku wotshe.

1 Vafumeli 8:51

Nguko ngu vona vathu vako ni thomba yako u nga yi humisa ngu ditikoni ka Egipta, hagari ka txikho txa simbi,

Nehemiya 1:10

Avava i ngadi sithumi sako, ni vathu vako, avale u nga va tirula ngu mtamo wako wa hombe, ni dianza dako da mtamo.

Jeremiya 15:1

Sekoko Mkoma a to khene kwangu: “Hambi i ti ku Mosi ni Samuwele vo ta ema masoni kwangu, mbilu yangu nga yi si sikoti kuva kumweko ni vathu vava. Va tutumise masoni kwangu.

Sidilo 2:20

Awe Mkoma, wona! U txi wonisisa ti to i mani u mmahelako tiya. Ina vamame va fanete ku ti dyela vanana va va va randako, kani? Ina vaphaxeli ni vaprofeti va dingana kudawa va txi fela ka wukhalo wako, wo sawuleka kani?

Ezekhiyele 20:9

Ati ni nga maha koko, i mhaka ya kuranda ditina dangu, kasi di si ruketelwi masoni ka vamatiko, vale va ku hagari ka vona, avo ni nga ti wonekisa ka vona, kasi ku va humisa Egipta.

Joyeli 2:17

Va na dile vaphaxeli, va thumelako Mkoma, hagari ka m'hubhe ni txiluvelo, va ne kha vona: Tsetsa vathu vako, awe Mkoma, kambe u nga ningele thomba yako tinganani, kasi ku matiko ma txi yi xakela: Nguko kutxani va no kha vona ka vathu: Txi hayi Txizimu txawe, kani?

Genesisi 18:27

Abrahamu a wombile kambe, a txi khene: “Ani na tsana ni txi womba kambe ka Mkoma wangu, ani ni ku lithulu ni dikhuma.

Eksodha 6:6

Ngu mhaka yeto, u na womba ka vanana va ka Israyeli u txi khawe: Ani ngani Mkoma, kambe ni na mi humisa ka mithumo yo nemela ya ditikoni ka Egipta, ni na mi thusa wukhumbini kwanu, kambe ni na mi tirula ngu dianza dangu da mtamo ni mthumo wa hombe wa kulamula.

Eksodha 8:8

Se Faro a to ruma kudhanwa Mosi ni Aroni, a txi khene kwawe: “Kombelani ka Mkoma kasiku e thavisa makhele ahawa kwangu, ni na leka vathu va txi huma, kasi va txi ya maha mphaxo ka Mkoma.”

Mitengo 21:7

Ngu kumaha ka eto, vathu va to ya ka Mosi, va txi ya kha vona: Athu hi onhile ngutu, nguko hi sote Mkoma, ni nawe; ngu mhaka ya eto, awe hi kombelele ka Mkoma tito, a txi thavisa minyoka yiya hagari kwathu. Koneko Mosi a to kombelela vathu.

Mitengo 27:4

Aku tate a nga mbi va ni vanana, ditina dakwe di na thaviswa hagari ka m'ti wakwe kani? Hi nigeni wukhalo wu wu no va wathu, hagari kwathu.

Dhaniyeli 9:15

Kha ditshuri, awe Mkoma, Txizimu txathu, u nga humisa vathu vako ditikoni ka Egipta ngu dianza dako da mtamo, aniko u mana ditina, i ku ti ti wonekako nyamsi, hi onhile; hi mahile kubiha.