Eksodha 3:1 - Bhiblia Yo Sawuleka

¹ Mosi a ti ti dyisa mtxhambi wa tinvuta ta Jetro, msade wakwe, mphaxeli wa Midhiyani. A to gola mtxhambi wa tinvuta e ti yisa txiwulani, aha a nga ya hoka Horebhi mmangoni ka Txizimu.

Eksodha 3:1 Referans Kwoze

1 Vafumeli 19:8

A to wuka koko Elija, a txi dya ni kusela, se ngu mtamo wa sakudya sile, a to tsimbila mune wa magumi a wusiku ni mune wa magumi a mitshikari, kala Horebhi, mmangoni ka Txizimu.

Eksodha 17:6

Ziva ti to ani ni na va masoni kwako, txitimwi ka mmango wa Horebi; u na ya peka txiwindi ngu ndonga, mati ma na huma ngu ka txona, aawa vathu va no sela.” Mosi a to maha toneto masoni ka madhota a ka Israyeli.

Mitengo 10:29

Sekoko Mosi a to khene ka Hobhabhe, mwana Reweli, mmidhiyani, tate wa Mosi ngu ka msikati wakwe: “Athu hiya ka wukhalo wule Mkoma a nga khene: Ni na mi ninga; a hi tsule hotshe, athu hi na kuxayisa kha kwati; nguko Mkoma a thembisile kumaha wunene ka Israyeli.”

Malakiya 4:4

Alakanyani Mlayo wa Mosi, txithumi txangu, awu ni nga wu rumela kwakwe kona Horebhi ka votshe va ka Israyeli, awu i ku sileleto ni wulamuli.

Valamuli 4:11

Se Hebheri, mkeni, a ti ti hambanisile ni Vakeni-kulowe, i ku vanana va Hobhabhe, tate wa Mosi ngu ka msikati wakwe, kambe a ti ti gwimbile matenda akwe, kala mkusuni ka Zahananimi, hafuhi ni Kedhesi.

Eksodha 19:11

va txi va va di ti longisete ka ditshiku da wuraru, nguko ka ditshiku da wuraru, Mkoma a na txhika txitimwi ka mmango wa Sinayi, masoni ka vathu votshe.

Luka 2:8

Ka ditiko dile, va ti ti ho vadyisi, va nga ti zumba bhuwani, va txi xayisa sifuyo sawe ni wusiku.

Masalmo 106:19

Mmangoni ka Horebhi va mahile dirole da nzalama ve khozela txithombe txile txa simbi yo nyivilikiswa;

Dhewuteronome 4:10

Ka ditshiku dile mi nga ema masoni ka Mkoma, Txizimu txanu, mmangoni ka Horebhi, Mkoma a to khene kwangu: “Tshanganisa vathu ngu ditina dangu, kasi ku va txi engisa mapswi angu, ti to ve gonda ku ni thava yotshe mbimo ya kuhanya kwawe ha ditikoni, ni ti to ve ma gondisa ka vanana vawe.”

Dhewuteronome 1:6

“Mkoma, Txizimu txathu, a wombawombile mmangoni ka Horebhi, a txi khene: Anu mi zumbile ngutu ka wuwa mmango.”

Eksodha 24:13

Se Mosi a to khukha ni Joxuwa txithumi txakwe; se Mosi e kwela mmangoni ka Txizimu.

Eksodha 19:3

Mosi a to kwela a txi ya ka Txizimu, se Mkoma a to m'dhana a di mmangoni, a txi khene: U na ya wombisa tiya ka nyumba ya ka Jakobe, u txi huwelela ka vanana va ka Israyeli u txi khawe:

Eksodha 3:5

Txizimu txi ti kha txona: “U nga tshukete hawa; ambula tikathula mikondoni kwako, nguko wukhalo wu u ku ka wona, mafu o sawuleka.”

Eksodha 2:16

Se Jetro, mphaxeli wa Midhiyani a ti ni mtxhanu wa vanana ni vambidi vamahorana. Vona va to ya kuya reka mati, ve tata mikawu kasi kuninga mitxhambi ya tate wawe yi sela.

Amosi 1:1

Mapswi a Amosi, i ku mmweyo wa vadyisi va Tekowa, ati a nga ti wona madingano ni Israyeli, ka masiku a Uziya, mfumeli wa ka Judha, ni ka masiku a Jerobhowamu, mwana Jowasi, mfumeli wa ka Israyeli, malembe mambidi ku sinzi ku deka-deka mafu.

Eksodha 4:27

Ti di ngeto, Mkoma a wombile ka Aroni a txi khene: “Tsula u txi hingeta Mosi txiwulani.” Aroni a to khukha a txi tsula, eya manana nayo mmangoni ka Txizimu, a ha a nga mlosa ngu ku mpswopswa.

Eksodha 2:21

Mosi a to tumela kuzumba m'tini ka Jetro, awu a nga ninga Mosi, Zipora, mwanana wakwe wa dihorana kasiku e tekana nayo.

Eksodha 2:18

Vona va to tshumela ve tsula ka tate wawe, awu a nga ya va wotisa, a txi khene: “Ngu kutxani nyamsi mi kuluveta kuwuya kani?”

Mithumo 7:30

“utingako ku di pindile mune wa magumi a malembe, ngelozi yi to ti wonekisa kwakwe txiwulani, mmangoni ka Sinayi, yi di mdhikilani ka txipopo txi nga ti tura.

Eksodha 3:12

Txizimu txi ti kha txona: Ngu ditshuri ani ni na va ni nawe; ngu txiya txikombiso txi no komba ti to ani ni kurumile: Ngako u di humisile vathu vangu ngu Egipta, anu mi nata khozela Txizimu ka mmango wuwa.

Eksodha 4:18

Sekoko Mosi a to khukha a txi ya ka Jetro msade wakwe, a txi ya m'gela tiya: “Na kombela u txi ni leka ni tsula ditikoni ka Egipta, kasi kuya wona vanathu, mwendo va ngadi va txi hanya.” Jetro a mxamute a txi khene: “Tsula ngu kuthutha.”

Eksodha 18:12

Sekoko Jetro, msade wa Mosi, a to teka mningelo wo hiswa ni mphaxo, a txi tsula naso ka Txizimu; Aroni ni otshe madhota a ka Israyeli va tile ve ta dya mapawu kumweko ni msade wa Mosi, masoni ka Txizimu.

Eksodha 19:2

Ngako va di khukhile Refidhime, va to wulela txiwulani ka Sinayi. Aho va nga ya gova kona. Va ka Israyeli va to ya aka kona, masoni ka mmango.

Eksodha 33:6

Sekoko, kukhukhela mmangoni ka Horebhi, vanana va ka Israyeli va to thavisa sotshe simaha sawe sa bombo.

Dhewuteronome 1:2

Mnava wa digumi da masiku ni dimwedo a kutsimbila ngu nzila ya mmangoni ka Seyiri, kukhukhela Horebhi kala Kadhesi-Bharineya.

Mitengo 10:33

Ngu kumaha keto, va to khukha ngu mmangoni ka Mkoma, ve tsimbila masiku mararu; se dibhokiso da txitumelelano txa Mkoma, di to thangela masoni kwawe masiku mararu, kasi ku va lavela wukhalo wo humula ka wona.

1 Samuwele 16:11

Samuwele a to engeta a txi khene ka Jese: Vagumile votshe vafana vako kani? Se Jese a to khene: Ku ngadi sate mnanda wa kona, a ku kudyisani ka tinvuta. A to khene koko Samuwele ka Jese: Rumela m'thu wo ya m'dhana, nguko kha hi na mbi khalahatshi ha mezani kala kuza a txi hoka hawa.

1 Vafumeli 19:19

Elija a to khukha ngu hale, eya manela Elixa mwana Safati, a nga ti dima ngu mipatwa ya digumi ni yimbidi ya tihomu masoni kwakwe, se a ti ni mpatwa wo gwitisa. Elija a to mtshuketela e msanzeka dijasi ha makata kwakwe.