Eksodha 29:38 - Bhiblia Yo Sawuleka

³⁸ Ngu siya u no ningela ha txiluveloni, sihambana simbidi sa tanga ya dilembe dimwedo, ngu ditshiku ni ditshiku, yotshe mbimo.

Eksodha 29:38 Referans Kwoze

1 Makronika 16:40

kasi kuve ningela miphaxo ya kuhiswa, ka Mkoma, txitimwi ka txiluvelo txa miphaxo ya kuhiswa, ya yotshe mbimo, wusiku ni mitshikari; se ni to madingano ni tile ti nga bhalwa amu ka Mlayo wa Mkoma, wu wu nga leletelwa va ka Israyeli.

Dhaniyeli 12:11

Se kukhukhela ka mbimo yi mphaxo wa ditshiku ni ditshiku wu no thaviswa wu txi vekwa ka makhalo o nyenyeza, ku nava ku di pindile 1.290 wa masiku.

2 Makronika 31:3

A to katekisa txyavelo txa thomba ya mfumeli txi maha mhamba yo hiswa mixo ni minova, ni mhamba yo hiswa ngu m'longiso ni m'buso wa kumekani ka mtxima, madingano ni ti ti nga bhalwa amu ka Mlayo wa Mkoma.

2 Makronika 13:11

Mixo ni minova va hisela Mkoma mningelo wo hiswa, ni dibaselo do bhumula, ve veka ni mapawu a mhamba txitimwi ka meza yo basa, ni minova va layitha ni dilambu da nzalama, nguko athu hi xayisa mithumo ya Mkoma Txizimu txathu, atxi anu mi nga txi leka.

2 Makronika 2:4

Wonani ku ni lava kuakela nyumba ditina da Mkoma, Txizimu txangu, kasi ku ni na mu dhumisa, ni ku m'hisela dibaselo do bhumula, ni kuveka dipawu da masiku otshe, ni mningelo wo hiswa wa mixo ni wa mitshikari, ni wa Masabhata, ni wa mitxima ya yiphya, ni mibuso ya Mkoma Txizimu txathu; i ku fanelo ya va ka Israyeli ya mbimo yotshe.

Dhaniyeli 9:27

Aniko ene a na tsanisa txitumelelano ni votala ngu divhiki dimwedo; se ka hafu ya divhiki a na emisa miphaxo ni miningelo ya sakudya; muhoxoti a nata ngu tibhapini ka vanyenyeki, kambe eto ngu ha ku sigwitiko; ni sile si nga emiswa si na theketwa txitimwi ka muxaseli.

Ezra 3:3

Se va to tsanisa txiluvelo aha ka sitsikareto sa kona, nguko kuthava ku ti ti txitimwi kwawe, ngu mhaka ya vathu va matiko; kambe va to ningela kona miphaxo yo hiswa ka Mkoma, miphaxo yo hiswa mixo ni minova.

1 Pedro 1:19

aniko, mi tirutwe ngu mnoha wa lisima wa Kristu, wu wu fanako ni wa Txinvutana txo mbi na wulima mwendo txibawa;

Vahebheru 7:27

Kwakwe kha kulaveki ti to ditshiku ni ditshiku a txi wuyelela kuphaxa mhamba ya sionho sakwe kukhata, ngu msana a txi tshumela e phaxa yimwani mhamba ya sionho sa vathu, nga ti va mahako vamwani vaphaxeli vahombe. Ene a to phaxa mhamba yimweyo dwe ya kuenela, ngu hawa a nga ti ningela ene apune.

Johani 1:29

Mangwanani ka kona, Johani a to wona Jesu, a nga txi ta kwakwe, se a txi khene: “Wonani Txinvutana txa Txizimu atxi txi kuwulako sionho sa ditiko.

Dhaniyeli 9:21

ni txi ngadi ni womba-womba mkombeloni, wamwamna Gabriyele, awule ni nga mu wona amu ka txiwoniso txangu do khata, a tota a txi puruma ngu kukuluveta, e ta ni gwesa ngu mbimo ya mphaxo wa minova.

Genesisi 22:7

Sekoko Isaake a to womba ka tate wakwe Abrahamu, a txi khene: “Tata wangu!” Se Abrahamu a to xamula a txi khene: “Ngani wuwa, mwanangu!” Isaake a to wotisa a txi khene: “Hi ni mndilo ni tikhuni, se txi hani txihambana txa mhamba ya kuhiswa kani?”

Eksodha 40:29

a vekile txiluvelo txa mningelo wo hiswa, ha txikeni ka nyumba yo sawuleka, ya ditenda da msengeletano, se a to maha kona mningelo wo hiswa ni mningelo wa sakudya, nga tonti Mkoma a nga leletisa tona ka Mosi.

Levhi 3:5

Se vanana va Aroni, va na si hisa sothseso ha txiluveloni, kumweko ni mningelo wo hiswa, wu wu no hiswa txitimwi ka tikhuni. Awu mningelo wu na hiswa kasi kudhumisa Mkoma, yi txi maha mhamba ya ku mtshakisa.

Levhi 6:9

Laya Aroni ni vanana vakwe u txi khawe: Mlayo wa mningelo wo hiswa ngu wuwa: Mningelo wu na hiswa ha txiluveloni wotshe wusiku kala ni mixo, se wu na turiswa ngu mndilo ha txiluveloni.

Mitengo 29:6

Hahanze ka mphaxo wa kuhiswa wa mtxima, ni mningelo wa kona wa sakudya, ni mphaxo wa kuhiswa wa yotshe mbimo, ni mningelo wa kona wa sakudya, ni sa kusela sa kona, madingano ni sileleto sa kona, mphaxo wo bhumula, mningelo wo hiswa, ka Mkoma.

2 Makronika 8:13

e ningela mphaxo wa ditshiku ni ditshiku, madingano ni sirumo sa Mosi, ngu milongiso, ni ka mtxima wa wuphya, ni ya mibuso yo mahwa kuraru ngu dilembe ni m'buso wa dipawu do mbi tshumbelwa, ni m'buso wa Mavhiki, ni ka m'buso wa matenda.

Ezra 3:5

se msana keto, kusimama mphaxo wo hiswa, ni yile ya kumeka ka mtxima, ni ya yotshe mipipi yo sawuleka ka Mkoma, hambi ya ni wuhi a nga ningela ka Mkoma, ngu kuranda kwakwe.

Levhi 9:17

A ningete kambe mningelo wa mpupu, awu a nga wela dianza do tala, ti to e wu hisa ha txiluveloni, kumweko ni mningelo wa mhamba yo hiswa, ni mixo.

2 Makronika 2:3

Solomoni a to rumela dipswi ka Hiramu, mfumeli wa Tiro, a txi khene: Ngako u nga rumela tate wangu mikedhari yo aka ngu yona nyumba yo e zumba ka yona, ni mahele toneto nani.

2 Makronika 29:7

Va to vhala matimba a m'hubhe, ve tima ni malambu, ve leka kuhisa dibaselo, kha va ningela mningelo wo hiswa ha wukhaloni ko sawuleka ka Txizimu txa Israyeli.

Ezekhiyele 46:13

Se u na lulamisa txinvutana txa dilembe dimwedo, txa kwa mbi na txibawa, ku va mningelo wa kuhiswa ka Mkoma, ditshiku ni ditshiku; u na maha eto mixo ni mixo.

Ezekhiyele 46:15

Ngu kumaha keto, mi na lulamisa txinvutana, ni mningelo wa sakudya, ni mtona, mixo ni mixo, i ku mningelo wa kuhiswa wo simama.