Eksodha 29:20 - Bhiblia Yo Sawuleka

²⁰ U na yi wila mkolo hamba, u teka mnoha wa wudotho u txi wu tota ha tshokani ka tinzeve ta txinene ka Aroni ni ka vanana vakwe, u na tota kambe aha ka titiho ta vanyagotwe ta mikondo yawe ya txinene; ngu mnoha wu wu no sala, awe u na wu xwayela ha txiluveloni, ngu ka madhawa otshe.

Eksodha 29:20 Referans Kwoze

Isaya 50:5

Mkoma Txizimu a ni tute tinzeve, se kha na mueyisa; kha ni tshumeleli msana.

1 Pedro 1:2

i ku va va nga sawulwa madingano ni makungo a kale a Txizimu Tate, ve sawulekiswa ngu Moya, kasi kuve engisa Jesu Kristu ni kuamukelwa ngu mnoha wakwe: Kateko ni kuthutha si nave ni nanu ngu wungi wa sona.

Vahebheru 12:24

ni ka Jesu muemeli wa txitumelelano txa Txiphya, ni ka mnoha wa kuxwayela, wu wu ku ni lisima lo pinda mnoha wa Abhele.

Vahebheru 10:22

Ngu toneto, ahi tshuketeleni hi di ni mbilu yo lulama, na hi di tate ngu likholo, hi di ni mbilu yi yi nga basiswa ka wotshe wubihi wa livhalo, ni mmidi wo kuwulwa ngu mati o basa.

Marku 7:33

Ngako a di mu humisile hagari ka dibutho, a txi ya nayo phuho, a to wuleta titiho takwe tinzeveni ka diphanzeve, e thura lure, e mu gwesa lidimi ngu lona lure.

Isaya 52:15

Ngu kumaha keto, a na xamalisa matiko o tala, ni vafumeli va na pwata ni txo ngu mhaka yakwe, nguko va na wona ni ti va sinziko kuziviswa, se ni tile va nga mbi tipfa, va na ti pima.

Levhi 16:19

A na xwayela ngu mnoha mtxhanu wa sikhati ni simbidi ha txiluveloni, e txi basisa ni ku txi sawulekisa ka wubihi wa va ka Israyeli.

Levhi 14:16

se e beta litiho lakwe la dianza da txinene, amu ka mtona wu wu ku ka dianza da txibhabha, a txi xwayela ngu lona litiho liya li ku ni mtona, amu ka mtxhanu wa sikhati ni simbidi, masoni ka Mkoma.

Levhi 14:14

Aniko mphaxeli a na teka mnoha wa mningelo wa mhamba ya kudivalelwa ka minandu, e tota ngu wona tshokani ka nzeve ya txinene ya wule a sawulekiswako, ka litiho la nyagotwe la dianza da txinene, ni ka litiho la nyagotwe la mkondo wakwe wa txinene.

Levhi 14:7

Se a na xwayela mtxhanu wa sikhati ni simbidi ngu sona ka wule a basiswako ka mtungu wa tshekela, e m'gela ti to a basile, ngu msana e leka txinyana txo hanya txi puruma txiya txitingani.

Levhi 8:24

Kambe a to maha ti to vanana va Aroni ve tshuketa hafuhi, aha a nga tota ngu mnoha wa kona wa wudotho tshokani ka tinzeve tawe ta txinene, ka vanyagotwe va manzani ka txinene ni vanyagotwe va mikondoni ka txinene, ka mmweyo ni mmweyo wawe, se ngu mnoha wa kona a to xwayela ngu wona madhawani kotshe ka txiluvelo.

Eksodha 29:19

Ngu msana ka kona u na teka hamba ya wumbidi, Aroni ni vanana vakwe va na sanzeka manza awe txitimwi ka msungo wa hamba.

Eksodha 29:21

Sekoko u na teka mnoha wu wu ku ha txiluveloni, u txi teka mtona wa kutotwa ko gwitisa, u txi si xwayela ka Aroni ni syambalo sakwe, ka vanana vakwe ni syambalo sawe; a na va a di sawulekisile ene ni syambalo sakwe, vanana vakwe ni syambalo sawe ni vona.

Levhi 8:23

se Mosi a to wila thamo ya hamba; mnoha wa kona wa wudotho, a to tota ha tshokani ka nzeve ya txinene ya Aroni ni ka litiho la nyagotwe la mkondoni ka txinene.

Levhi 14:17

Ngu mtona wu wu nga sala amu ka dianza dakwe, mphaxeli a na tota ngu wona aha ka tshoka ya nzeve ya txinene, ya ene wule a basiswako, ni ka litiho la nyagotwe la dianza da txinene, ni litiho la nyagotwe la mkondo wa kona wa txinene, kona mule a nga gwesa kukhatani ngu mnoha wa txihari txa mningelo wa mhamba.

Levhi 14:25

Sekoko a na wila thamo ya txinvhutana txa mhamba ya minandu, ni mnoha wa txona, e gwesa ngu wona tshokani ka nzeve ya txinene ya wule a sawulekiswako, ni ka litiho la nyagotwe la dianza da txinene, ni nyagotwe wa mkondo wakwe wa txinene.

Levhi 14:28

Ngu wonewo mtona a na gwesa tshokani ka nzeve ya txinene ya wule a sawulekiswako, ni ka litiho la nyagotwe la dianza da txinene, ni litiho la nyagotwe la mkondo wa txinene, kona hale a nga gwesa kukhatani ngu mnoha wa mhamba ya minandu.