Eksodha 28:3 - Bhiblia Yo Sawuleka

³ U na womba kambe ka votshe vale va timbilu to txhariha, avale ni nga va tata ngu moya wa wutxhari, ti to va txi mahela syambalo Aroni, kasi ku mkatekisa, a ni thumela amu ka wuphaxeli.

Eksodha 28:3 Referans Kwoze

Vaefesu 1:17

Na kombela ka Txizimu txa Mkoma wathu Jesu Kristu, Tate wa wudhumo, ngu wuzivi wa txona, txi mi ninga moya wa wutxhari ni mtuletelo;

Isaya 11:2

Se Moya wa Mkoma wu na zumba txitimwi kwakwe Moya wa wuzivi ni wutxhari, Moya wawudhota ni mtamo, Moya wa kualakanya ni kuthava Mkoma.

Jakobe 1:17

Sotshe sihiwa sa lisima, sotshe siningo sa kuhetiseka, si ta ngu txitimwi, si txi txhika ngu ka Tate wa liwoningo, awu a ku si nga ni kutxitxa, awu kuwoninga kwakwe ku ku si nga ni kutxitxa ku txi maha txidema.

Dhewuteronome 34:9

Joxuwa, mwana Nune, a to tala ngu moya wa wutxhari, nguko Mosi a ti msanzekile manza akwe. Ni vanana va ka Israyeli va to mu engisa, va txi maha totshe madingano ni ti Mkoma a nga leleta Mosi.

Mavingu 2:6

Nguko Mkoma wa ninga wutxhari, kambe wuzivi ni mapimo sita ngu txisofuni kwakwe.

Eksodha 35:35

a va ningile wutxhari wo maha totshe tixaka ta mithumo ya kuwumba ni ya kuvata; ya kurunga ko tshurisela aha ka tinguwo ta mkungu, ni to bhilivila, ni ta mkuxe ni ta linyu, kasiku va txi ziva kumaha mithumo yotshe ni kutumbula yimwani.

Eksodha 35:30

Msana keto, Mosi a to khene ka vanana va ka Israyeli: “Zivani taku Mkoma a dhani ngu ditina Bhezaleli, mwana Uri, mwana Huri, wa lihunzu la ka Judha.

Eksodha 35:25

Se votshe vavasikati vo txhariha va zivako kuluka tinguwo, va to luka ngu manza awe vapune, ve wuyisa tinguwo ta mkungu, ni to zirila, ni to bhilivila, ni ta linyu yo tshura.

Eksodha 35:31

A mningile Moya wa Txizimu, a txi mninga wutxhari, ni wuzivi, ni mapimo, ka totshe tixaka ta mithumo;

Eksodha 36:1

Bhezaleli, Oholiyabhe, ni votshe vale va nga ningwa wutxhari ngu Mkoma, va txi va ni wuzivi ni mapimo, va to ta va ta maha mithumo yotshe ya mu nyumbani ko sawuleka, madingano ni sileleto si va nga ningwa ngu Mkoma.”

1 Vafumeli 7:14

Awuwa i ti ti mwanana wa wamsikati wa noni, wa lihunzu la ka Naftali, tate wakwe i ti ti wa Tiro i nga ti ti txhari ya koporo; i ti ti tate ngu wuzivi, ni mapimo, ni wutxhari wo maha yotshe mithumo ya koporo; ene a tile ka mfumeli Solomoni e ta maha yotshe mithumo yakwe.

Eksodha 35:10

Votshe vavamna vo txhariha hagari kwanu va nata ve ta thuma totshe ati Mkoma a nga leleta,

Eksodha 36:2

Mosi a to dhana Bhezaleli ni Oholiyabhe ni votshe vathu va wutxhari avale Mkoma a nga va ninga wuzivi, votshe avale timbilu tawe ti nga va ruma ti to ve ti ningetetela amu ko maha yotshe mithumo.