Eksodha 25:30 - Bhiblia Yo Sawuleka

³⁰ Se txitimwi ka meza u na veka mapawu a mhamba, ma txi va i di txikombiso masoni kwangu, ka yotshe mbimo.

Eksodha 25:30 Referans Kwoze

Matewu 12:4

Ti to ene a wulelisite kutxani nyumbani ka Txizimu, e dya mapawu a mphaxo, aawa ma nga ti si faneli kudyiwa ngu ngene ni va a nga ti navo, kambe ma ti fanela kudyiwa ngu vaphaxeli vokha, kani?

Eksodha 39:36

meza ni sotshe simaha sa kona ni mapawu a mphaxo;

Malakiya 1:12

Aniko anu ma di nyenyezisa, ngako mi txi khanu: Meza ya Mkoma yi nyenyezile, ni siya sa yona, sakudya sa kona, sa eyiseka.

Malakiya 1:7

Mi ningela sakudya sa nzabwa ka txiluvelo txangu, se mi txi khanu: Hi ku nyenyezisile ngu txani kani? Ka ti mi wombako mi txi khanu: Meza ya Mkoma ya eyiseka.

2 Makronika 13:11

Mixo ni minova va hisela Mkoma mningelo wo hiswa, ni dibaselo do bhumula, ve veka ni mapawu a mhamba txitimwi ka meza yo basa, ni minova va layitha ni dilambu da nzalama, nguko athu hi xayisa mithumo ya Mkoma Txizimu txathu, atxi anu mi nga txi leka.

1 Makronika 23:29

i ku wuwa: Kuxayisa mapawu a miphaxo, ni mpupu wo tshura, ni mningelo wa sakudya, ni tximbwanda txa kwa mbi tshumbelwa, ni so katingwa, ni so yokwa, ni yotshe mipimo yo pima kutala ni wuhombe;

1 Makronika 9:32

Se vamwani ka vanana va Vakowati, va vanawe, ku ti ni vokari va nga ti vekilwe ka mthumo wo lulamisa mapawu a mphaxo, ka yotshe Masabhata.

1 Samuwele 21:6

Sekoko mphaxeli a to mninga dipawu do sawuleka, nguko ku si ngani dimwani dipawu, hahanze ka mapawu a mhamba, ale ma nga thavisa masoni ka Mkoma, kasi kuveka dipawu do hisa, ka ditshiku di va thavisako dile da kale.

Mitengo 4:7

Ni txitimwi ka meza ya mningelo wo tshumbelwa va na gwimba nguwo ya mkuxe; ayile txitimwi ka yona ku no vekwa timbiya, ni so hisela ka sona dibaselo, ni magombe, ni sikadyana; kambe ku nava ni dipawu da mphaxo wa yotshe mbimo, txitimwi ka kona.

Eksodha 35:13

meza ni mipakato ya kona, ni sotshe simaha sa kona, ni mapawu a txikombiso.

Vahebheru 9:2

Nguko, ku akilwe ditenda: Ditenda do khata di dhanwako ku wukhalo wo sawuleka, amuwa ku nga ti vekilwe dilambu, ni meza ni mapawu a miphaxo.

Eksodha 40:4

U na wuletisa meza u txi veka txitimwi ka yona dibhokiso da txitumelelano ni sotshe siya sa kona. U na tisa phande ya malambu, se u na lumekela malambu a kona.

Eksodha 40:23

a to veketela mapawu ngu ku ma txhatxhameta masoni ka Mkoma, nga tona ti Mkoma a nga leletisa tona ka Mosi.

1 Samuwele 21:4

Se mphaxeli a to xamula Dhavhidha, a txi khene: Kha ni na dipawu manzani do dyiwa ngu wuhi ni wuhi; kambe kova dipawu do sawuleka, ngako majaha ako ma di ti basisile ka vavasikati.

1 Vafumeli 7:48

Kambe Solomoni a to mahetela sotshe siya si nga ti fanela Nyumbani ka Mkoma: Txiluvelo txa nzalama, ni meza ya nzalama, eho ku nga ti ni mapawu o mbi tshumbelwa,

2 Makronika 2:4

Wonani ku ni lava kuakela nyumba ditina da Mkoma, Txizimu txangu, kasi ku ni na mu dhumisa, ni ku m'hisela dibaselo do bhumula, ni kuveka dipawu da masiku otshe, ni mningelo wo hiswa wa mixo ni wa mitshikari, ni wa Masabhata, ni wa mitxima ya yiphya, ni mibuso ya Mkoma Txizimu txathu; i ku fanelo ya va ka Israyeli ya mbimo yotshe.

Ezekhiyele 41:22

Txiluvelo txa mapulango i ti ti txa kudemba ka mikono yiraru, kulapha ka txona i ti ti ka mikono yimbidi, kambe txi ti ti ni makhona a kona; se txitsaniso ni maseta a kona i ti ti sa mapulango; se a to ni gela ku khene: Ayiya i meza yi yi ku masoni ka Mkoma.

1 Samuwele 21:5

Se Dhavhidha a to xamula ka mphaxeli, a txi khene: Ina, hi ni masiku mararu hi di hambani ni vavasikati; mbimo yi ni nga khukha nyatulo mimidi ya majaha yi ti sawulekile; ngu mamahelo okari dipawu da wihi ni wihi, ngutu-ngutu nyamswi di na sawuleka ka yimwani mimidi.

2 Makronika 2:3

Solomoni a to rumela dipswi ka Hiramu, mfumeli wa Tiro, a txi khene: Ngako u nga rumela tate wangu mikedhari yo aka ngu yona nyumba yo e zumba ka yona, ni mahele toneto nani.