Eksodha 23:12 - Bhiblia Yo Sawuleka

¹² Amu ka mtxhanu wa masiku ni dimwedo u na maha mithumo yako; se ka ditshiku da wutxhanu ni mambidi u na humula, kasiku homu yako ni mbongola yako si mana kuhumula, kasiku mwanana wa khumbi yako a txi mana ku hefu, kumweko ni mluveli wako.

Eksodha 23:12 Referans Kwoze

Luka 13:14

Kambe mthangeli wa disinagoga a to henya, nguko Jesu a nga hanyisa m'thu ngu Sabbata. Se e gela vathu a txi khene: “Ku na ni masiku a mtxhanu ni dimwedo, ayawa vathu va tumelelwako kuthuma ngu ona; ngonani ngu ona mi ta hanyiswa, i si nga ngu ditshiku da Sabbata.”

Eksodha 35:3

Minga dhiveleni mndilo tinyumbani kwanu, ngu ka ditshiku da Sabbata.”

Isaya 58:3

Va txi kha vona: Se hi titonela txani sakudya, na u si hi woni kani? Hi txanisela txani muhefemulo wathu, na awe u si ti zivi kani? Wonani taku, ditshiku di mi ti tonako sakudya, mo mana ku ti tsakisa mipune, kambe mi lwela wotshe mthumo wanu.

Eksodha 34:21

U na thuma amu ka mtxhanu wa masiku ni dinwedo aniko ngu ditshiku da wutxhanu ni mambidi u na humula, hambi i di ditshiku da mbimo ya txidimo mwendo mbimo yo elula.

Marku 2:27

Se a txi khene kwawe: “Sabbata yi mahetwe m'thu, hi nga m'thu a nga mahelwa Sabbata.

Eksodha 16:23

Ene a va gete a txi khene: “Ngu toneto, Mkoma a nga womba ku khene: Mangwana ditshiku do humula, i Sabbata yo sawuleka ya Mkoma. Bhikani si mi si lavako kubhika, mi katinga si mi lavako kukatinga, ni si si salako, si veketeni kala mangwana.”

Eksodha 23:11

aniko ka dilembe da wutxhanu ni mambidi, u na leka mafu ma txi humulela u si dimi, ni silo sa kona u na si leka si txi va sa sisiwana sa vathu vako, se asi si salako si na dyiwa ngu sihari. U mahisa eto ngu thembwe ya mivhinya ni ya miolivha.

Eksodha 35:2

Amu ka mtxhanu wa masiku ni dimwedo mndani ka divhiki, mi nga sikota kuthuma totshe, aniko ngu ditshiku da wutxhanu ni mambidi di na va do sawuleka, i Sabbata ya kuhumula ka Mkoma. Awule a manekako a txi thuma ka ditshiku donedo a na dawa.

Levhi 23:3

Mi na maha mithumo mu ka mtxhanu wa masiku ni dimwedo, aniko ditshiku da wutxhanu ni mambidi, i Sabbata yo humula, msengeletano wo sawuleka; kha mi na mbi maha mthumo ni wawumwewo; i Sabbata ya Mkoma kotshe mu mi zumbako kona.

Nehemiya 13:16

Kambe vathu va Tiri vale va nga ti akile Jerusalema, va ti tisa sihaka ni thundu yotshe, ku ta xavisa ngu Sabbata, ka vanana va ka Judha, ni Jerusalema.