Eksodha 21:13 - Bhiblia Yo Sawuleka

¹³ kambe ngako a ti m'date ngu phango, na Txizimu i di txona txi nga mningela manzani kwakwe, ani ni na kukomba wukhalo wu a fanelako kuthavela ka wona.

Eksodha 21:13 Referans Kwoze

1 Samuwele 24:18

Nyamsi awe wu ni kombile wumbilu wu wu ku nawo ni nani; nguko Mkoma a ti ni ningete manzani kwako, kambe awe khu ya ni daya.

1 Samuwele 24:10

Nyamsi u ti woni upune ti to Mkoma a ku ningete manzani kwangu ka diphala diya, vamwani va ni kuzetete ti to ni kudaya; kambe ni ku divalete, nguko ni ti khani: Kha ni na mbi nawuluta diwoko dangu ni wukela nyamne wangu, nguko mbo totwa wa Mkoma.

1 Samuwele 24:4

Sekoko vathu va Dhavhidha va to m'gela ku kha vona: Adiya ngu dona ditshiku di Mkoma a ngadi womba, a txi khene: Wona taku ni na ningeta mlala wako manzani kwako, u na maha kwakwe kuranda kwako. Se Dhavhidha a to khukha ngu kunyanimela eya wila tshoka ya txyambalo txa Sawule.

Mika 7:2

Vathu vavanene va nyamalate ha mafuni, kambe kuwalo ni wammweyo wo lulama hagari ka vathu; votshe va ti longisela kutheketa mnoha; mmwani ni mmwani a riyela mwanawe ngu likoka.

Isaya 10:7

hambiko ene a singako ni mhaka nito, hambi mbiluni kwakwe, kha alakanyeli eto; Aniko mbilu yakwe yi navela kuhoxota, ni kulovisa matiko o tala.

2 Samuwele 16:10

A to khene kambe mfumeli: I txani ni ku natxo ni nanu, anu vanana va Zeruiya kani? Mlekeni e ni ruketela, nguko Mkoma a m'gete ku khene: Ruketela Dhavhidha, nguko i mani a no womba ku khene: U maha txani toneto kani?

Joxuwa 20:1

Mkoma a to womba kambe ka Joxuwa a txi khene:

Mitengo 35:6

Ka madhoropa ale koko mi no ma ningela ka Valevhi, ku nava ni mtxhanu wa madhoropa ni dimwedo a wuthavelo, aawa mi no ningela, kasi ku awu a dayako e zumba ka ona; mi na va ninga kambe mune wa magumi ni mambidi a madhoropa.

Dhewuteronome 19:14

U nga txitxe muhingano wa muakelani wako, awu vahombe vanu va nga wu bhanda amu ka thomba yi u no yi mana ka ditiko di Mkoma, Txizimu txako, a no kuninga di txi maha dako.