Eksodha 20:6 - Bhiblia Yo Sawuleka

⁶ Kambe na maha wumbilu kala ka liveleko la digumi da mazana, ka vale va ni randako, avale va xayisako milayo yangu.

Eksodha 20:6 Referans Kwoze

Dhewuteronome 7:9

U na ti zive koko ti to Mkoma, Txizimu txako, Njizimu, Njzimu txo thembeka, a xayisako txitumelelano ni wumbilu, kala ka 1.000 wa tiveleko, ka vale va mrandako, ni kuvekisa sirumo sakwe;

1 Johani 5:3

Nguko kuranda Txizimu ti womba kuveketa milayo ya txona; kambe milayo ya txona kha yi nemeli.

Johani 14:21

Awule a nga amukela milayo yangu a txi yi veketa, eyo ngene a ni randako; se awule a ni randako, a na randwa ngu Tate wangu. Se nani ni na mu randa, kambe ni na ti wonekisa kwakwe.”

Mithumo 2:39

Nguko awule a nga thembiswa a lumba anu ni vanana vanu, ni vale va ku kule, votshe vale va no dhanwa ngu Mkoma, Txizimu txathu.”

Dhewuteronome 5:29

Sikwawe, idiku timbilu tawe yotshe mbimo to va ni mapimo o nga toneto, veva ni txithavo, va txi vekisa ngu kusimama sotshe sirumo sangu, va ndi na zumbiseka ta tinene, vona ni vanana vawe, kala kupinduka.

Dhewuteronome 4:37

Nga ti a nga txi va randa vatate vako, e sawula liveleko lawe, msana kwawe, ene apune, a ku humisile Egipta ngu wutumbu wakwe ni mtamo wakwe wa hombe.

Johani 14:15

“Ngako mi txi ni randa, mi na veketa milayo yangu.

2 Johani 1:6

Lirando la kona ngu liya: Kuhanya ngu kuveketa sirumo sakwe. Se txirumo txo khata, nga tiya mi nga gondisa tona kukhukhela makhatoni, ngu ti to mi hanya lirandoni.

1 Johani 4:19

Athu hi na ni lirando, nguko txi khatile Txizimu txi hi randa.

Jakobe 1:12

A katekile m'thu wu a amukelako txiduko ngu kutimisela; nguko, a di gwitile kudukwa, a na amukela m'bhoti wa wutomi, awu Mkoma a nga wu thembisa ka vale va mrandako.

Eksodha 34:7

Wo tala ngu lirando la hombe, kala ka magumi a mazana a tiveleko, wo divalela wubihi, kueyisa ni sionho, aniko kha fananisi muonho ni wamnene; kambe wa tsayisa vanana ni vatukulu, kala ka liveleko la wuraru ni la wumune, ngu mhaka ya sionho sa vatate vawe.”

Mitengo 14:18

“Mkoma wa timisela kambe a tate ngu wumbilu; wa divalela sionho ni sihambunyeto; hambiko vaonhi kha va leki, ve zumba ku nga kha va na mnandu; ene wa tshumetela sionho sa vatate txitimwi ka vanana vawe kala ka liveleko la wuraru ni la wumune.

Nehemiya 1:5

Ni txi khani: Awe, Mkoma, Txizimu txa nzumani, Txizimu txa hombe txo thaviseka, awe u xayisako txitumelelano, ni kupfela wusiwana vale va ku randako, va xayisako sirumo sako!

Masalmo 103:17

Aniko lirando la Mkoma kha li nga ni magwito ka vale va m'thavako kululama kwakwe kha ku na magwito ka liveleko ni liveleko,

Mavingu 3:1

Mwanangu, u nga divale kulaya kwangu, kambe mbilu yako yi na vekete milayo yangu.

Jeremiya 32:18

Ngawe u nga mahela wumbilu magumi a mazana, u tshumeta wubihi wa vatate tikhanani ka vanana vawe msana kwawe; u wa hombe, Txizimu Nyamitamo, ditina dako u Mkoma wa Mabutho a Tiyimbi.

Dhaniyeli 9:4

Se ni to khongela ka Mkoma, Txizimu txangu, ni ti tshanza, ni txi khani: Yowe! Mkoma! Txizimu txa hombe, txo thaviseka, awe u xayisako txitumelelano ni wumbilu, ka vale va kurandako, va xayisako sirumo sakwe;