Eksodha 19:9 - Bhiblia Yo Sawuleka

⁹ Se Mkoma a to ni gela ku khene: “Wona taku ani ni nata kwako ngu mu ka direfu do phumela, kasi ku vathu va txi ni engisa ni txi womba-womba ni nawe, kasiku kambe va txi kholwa ngu ha ku si gwitiko.” Aha Mosi a nga txhamusela ka Mkoma mapswi a vathu votshe,

Eksodha 19:9 Referans Kwoze

Dhewuteronome 4:36

Ene Mkoma a mahile ti to u txi engisa dipswi dakwe a di nzumani, kasi ku a txi kugondisa. Ene a mahile ti to u txi wona mndilo wakwe wa hombe kona ha mafuni, ni kuengisa mapswi akwe ma txi huma ngu hagari ka mndilo.

Eksodha 19:16

Kutxani ka ditshiku da wuraru, ku to maheka singwalangwanda ni tinyangafula ni direfu da mtima di to fenengeta mmango, se kudhuma ka mtamo ka mpundu ku to pfala ngutu. Dibutho da vathu di nga ti wugoveloni di to dhudhumela.

Matewu 17:5

Ene a di ngadi a txi womba tiya, ku to humelela direfu do woninga, di nga va fenengeta, se direfuni mule ku to pfala dipswi, di di nga womba tiya: “Awuwa i Mwanana wangu wo randeka ngutu, awu ni tsakiswako ngutu ngu ngene. Mu engiseni!”

Masalmo 97:2

Mkoma a randetwe ngu marefu ni txidema; ditshina da mfumo wakwe ngu kululama ni fanelo.

Eksodha 20:21

Vathu va to zumbela kule; Mosi a txi tshuketa aha ka direfu, mtemani, ahale Txizimu txi nga ti kona.

Eksodha 14:31

Mbimo yi vanana va ka Israyeli va nga wona txitsayiso txa hombe txi Txizimu txi nga txi maha ka Vaegipta, va to thava Mkoma, ve kholwa kwakwe ni ka Mosi txithumi txakwe.

Mtuletelo 1:7

Ndiyo wata a di txitimwi ka marefu. Maso a votshe vathu ma na mu wona, hambi vona va va nga m'daya ngu ditxhari: Totshe tihunzu ta ha mafuni ti na dila ngu ku mu wona. Ina! Amen!

Luka 10:16

Awu a mi engisako a engisa ani; awu a mi nyenyako, a nyenya ani; se awu a nyenyako ani, a nyenya wu a nga ni ruma.”

Marku 9:7

Sekoko, ku to humelela direfu, adi di nga ta va fenengeta ngu mtsudi wa dona, se ngu ka dona ku to pfala dipswi di txi kha dona: “Awuwa i Mwanana wangu ni mu randako. Mu engiseni!”

Isaya 19:1

Mahungu a Egipta. Wonani, Mkoma a gadhile direfu do hehuka, se a nata kona Egipta; sithombe sa Egipta si na dhudhumela masoni kwakwe, ni timbilu ta Vaegipta ti na nyunguluka hagari kwawe.

Isaya 7:9

Hambi keto, m'zinda ka Efrayime, ngu Samariya, ni msungo wa Samariya, i mwana Remaliya; ngako mi si kholwi, lambi kha mi na mbi tsana.

2 Makronika 20:20

Se magwanani ka kona, va to wuka ni mixo veya txiwulani ka Tekowa; Mbimo yi va nga ti ti tsula, Josafati a to va ngela ku khene: Ni engiseni anu va ka Judha, ni nanu vazumbi va Jerusalema: Thembani Mkoma Txizimu txanu kasi ku mi na tsana; thembani vaprofeti vakwe mi na xula.

2 Makronika 6:1

Sekoko Solomoni a to khene: Mkoma wu ti khawe u na zumba txidemani.

1 Vafumeli 8:12

Sekoko Solomoni a to khene: Mkoma a ti khene a na zumba txidemani.

Eksodha 4:5

“Kasi kuve kholwa taku a wonekile kwako Mkoma, Txizimu txa vatate vako, Txizimu txa Abrahamu, Txizimu txa Isaake, ni Txizimu txa Jakobe.”

Eksodha 4:31

Se athu va to kholwa; se kambe va tsakile ngu kuziva ti to Mkoma a alakanyile vanana vakwe va ka Israyeli, ngu kuwona ti vona va xanisekisako tona. Va to khizama va txi khozela Mkoma.

Eksodha 34:5

Mkoma a to relela ngu mu direfuni a txi maneka hafuhi kwakwe, se Mosi a to huwelela ditina da Mkoma.

Mitengo 12:5

Sekoko Mkoma a to txhika ngu ka phande ya direfu, a txi ta ema ha txikeni ka ditenda; msana keto, a to dhana Aroni ni Miriyamu, se va to huma ngu wumbidi wawe.

Masalmo 99:7

Txizimu txi wombawombile navo txi di mndani ka marefu; vona va ti ti xayisa sileleto ni milayo yi txi nga va ninga.

Dhewuteronome 4:10

Ka ditshiku dile mi nga ema masoni ka Mkoma, Txizimu txanu, mmangoni ka Horebhi, Mkoma a to khene kwangu: “Tshanganisa vathu ngu ditina dangu, kasi ku va txi engisa mapswi angu, ti to ve gonda ku ni thava yotshe mbimo ya kuhanya kwawe ha ditikoni, ni ti to ve ma gondisa ka vanana vawe.”