Eksodha 19:5 - Bhiblia Yo Sawuleka

⁵ Kukhukhela ka kuwa, ngako mi txi engisa dipswi dangu, mi txi londeta mhaka ya txitumelelano txangu, hagari ka votshe vathu, sekoko mi na va mi di thomba yangu. Nguko dotshe ditiko ndangu.

Eksodha 19:5 Referans Kwoze

Dhewuteronome 14:2

Nguko anu mi vathu vo sawuleka ka Mkoma, Txizimu txanu, kambe Mkoma a mi sawute hagari ka vamwani vathu, votshe vale va kuho txitimwi ka mafu, kasi ku mi va vathu vakwe mipune.

Dhewuteronome 7:6

Nguko mbathu vo sawuleka ka Mkoma, Txizimu txako; Mkoma, Txizimu txako, a mi sawute, kasi ku mi maha vathu vo lumba ene, mi txi va mi di ngamu yakwe ene apune, hagari ka votshe vathu va kuho ha mafuni.”

Dhewuteronome 26:18

Se Mkoma a tsanisile nyamsi tito, awe u ditiko da kulumba ene apune, nga ti a nga kuthembisa tona, ni ti to u fanete kuxayisa sotshe sirumo sakwe.

Malakiya 3:17

Se vona va na va vangu, kuwomba Mkoma wa Mabutho a Tiyimbi, ka dona ditshiku dile ni no maha mthumo wangu, va na va thomba yangu; ni na va divalela, ku nga m'veleki wu a divalelako mwanana wakwe, wu a thumelako.

Eksodha 15:26

Se a txi khene: “Ngako u txi engisisa kha kwati dipswi da Mkoma, Txizimu txako, ni kumaha ti i ku to lulama masoni kwakwe, kambe u txi dingeta nzeve yako ka sirumo sakwe, ni kuvekisa sotshe sileleto sakwe, kha ni na mbi rumela malwati ni a mamwewo txitimwi kwako, ale ni nga ma veka txitimwi ka Vaegipta; nguko ani ngani Mkoma, ni ku kalamukisako.”

Masalmo 135:4

Mkoma a ti sawulete Jakobe ni va ka Israyeli kasiku ve maha thomba yakwe.

Dhewuteronome 4:20

Aniko, Mkoma a mi tekile e mi humisa ditikoni ka Egipta, ka txikho txa tisimbi, kasi ku miva vathu va mi kuthomba yakwe, ku nga ti nyamsi mi ti wonako.

Eksodha 23:22

Aniko ngako u txi engisa ngu kuthembeka u txi maha totshe atile ni no kugela, sekoko ni na va ni di mlala wa valala vako ni txi wukela avale va kuphikako.

Titosi 2:14

Ene a ti ningete ngu mhaka yathu, kufela ku hi tirula ka wotshe wubihi, kasiku ene e ti basisela ngamu yi yi no va i di yakwe, ayi yi khutalako amu ka mithumo ya yinene.

Dhewuteronome 10:14

Wona nzuma ni nzuma ya tinzuma, si lumba Mkoma, Txizimu txako, kumweko ni mafu ni sotshe si si kuho ka ona.

Eksodha 9:29

Sekoko Mosi a xamute a txi khene: “Msana ka kuva ni di humile mu didhoropani ni na nawuluta manza angu ka Mkoma; singwalangwanda si na ema, kambe kha ku na mbiswa ku txi wa mati a maralala, kasiku u txi ziva to ditiko di lumba Mkoma.

Masalmo 24:1

Mafu ma lumba Mkoma, ni sotshe si si ku ka ona; ditiko ni votshe va va hanyako ka dona.

1 Vakorinto 10:26

Mafu nga Mkoma ni sotshe si si ku txitimwi ka ona.

Jobe 41:11

I mani a nga khata e ni ninga, kasi ku ni na mtshumetela kani? Nguko asi si ku hahatshi ka nzuma, nzangu.

Dhewuteronome 5:2

Mkoma, Txizimu txathu, a mahile txitumelelano ni nathu mmangoni ka Horebhi.

Vahebheru 11:8

Ngu likholo, vakale va mani nduma ya yinene. Ngu likholo, Abrahamu, ngako a di dhanwi ngu Txizimu, a engisile a txi khukha e tsula ka ditiko di a nga ti fanela ku di amukela, di txi maha thomba yakwe, a tsute asi zivi ti to a ya hayi.

Isaya 43:1

Se konkuwa, kuwomba Mkoma, wule a nga kuvanga, awe Jakobe, kambe a nga kuwumba awe Israyeli, a khene: U nga thave, nguko ani ni ku tirute; ni kudhani ngu ditina dako; awe u wangu.

Isaya 41:8

Aniko awe Israyeli, txithumi txangu. Awe Jakobe, awe ni nga kusawula, liveleko la Abrahamu, mngana wangu.

Masalmo 25:10

Totshe tinzila ta Mkoma ndo kateka ni ditshuri, ka vale va vekisako txitumelelano txakwe ni sirumo sakwe.

1 Samuwele 15:22

Kambe Samuwele a to khene: Ina Mkoma a tsakiswa ngu miningelo ya kuhiswa ni miphaxo, kupinda kuengisa dipswi da Mkoma kani? Wonani taku kuengisa kutshuko kupinda mphaxo; ni kupfisisa kutshuko kupinda mafura a tihamba.

Joxuwa 24:24

Vathu va to womba ka Joxuwa va txi kha vona: “Athu hi na khozela Mkoma, Txizimu txathu, ni dipswi dakwe hi na di engisa.”

Isaya 1:19

Ngako mi txi tumela kuengisa, mi na dya so tshamba ha mafuni hawa.

1 Vafumeli 8:53

Nguko awe u va sawute hagri ka vathu votshe va ha mafuni ku veva thomba yako, ngako u nga womba ngu mthumo wa txithumi txako Mosi, mbimo yile u nga humisa vatate vathu ditikoni ka Egipta, awe Mkoma Txizimu.

Dhewuteronome 28:1

“Se ku na maheka taku, ngako u txi pfa dipswi da Mkoma, Txizimu txako, u vekisa sotshe sirumo sakwe, asi ni ku leletako nyamsi, Mkoma, Txizimu txako, a na kuguleta txitimwi ka yotshe mifumo ya ha mafuni.

Isaya 56:4

Nguko Mkoma a womba tiya madingano ni Mithenwa yile yi xayisako Masabbata angu, yi sawulako sile si ni tsakisako, yi xayisa txitumelelano txangu.

Eksodha 24:7

A to teka dibhuku da txitumelelano e di gonda masoni ka vathu; se vathu va to xamula, va txi kha vona: “Totshe ti Mkoma a nga ti womba athu hi na ti tumela kambe hi na ti thuma.”

Jeremiya 7:23

Aniko, ati ni nga va laya, ngu ti taku: Engisani dipswi dangu, sekoko ni na va Txizimu txanu, anu mi na va vathu vangu; tsimbilani ngu tinzila ti ni nga mi laya ngu tona, kasi ku mi na zumbiseka kwati.

Dhewuteronome 11:27

Txikatekiso, ngako mi txi xayisa sirumo sa Mkoma, Txizimu txanu, asi nyamsi ni mi leletako;

1 Vakorinto 10:28

Kambe ngako wokari a txi mi gela ku khene: Asiya i mhamba ya sizimu sa walo, konaho mi nga dyeni ngu mhaka ya eneyo, a nga mi tsunzukisa ni ngu mhaka ya livhalo.

Dhewuteronome 14:21

Mi nga dyeni ni txa tximwetxo txihari txa ku ti fela; u na txi ningela ka mluveli wu a hanyako ha txikeni kwako a txi dya, mwendo ku txi xavisa ka wa matiko, nguko anu mi vathu vo sawuleka ka Mkoma, Txizimu txako. Mi nga bhikeni txihongwana ngu masi a mame wa txona.”

Jeremiya 10:16

Awu i ku txiningo txa ka Jakobe kha fanani naso; nguko ngene mmahi wa silo sotshe; Israyeli lixaka la thomba yakwe, ditina dakwe Mkoma wa Mabutho a Tiyimbi.

Ndando ya Tindando 8:12

M'vhinya wangu na ti xayisela nipune, awe Solomoni u na va ni tisilivhele ta 1.000, se vawoneleli va mihando va na mana 200.

Vahebheru 8:9

Kha txi na mbi fana ni txitumelelano txi ni nga txi maha ni vatate vawe, ka ditshiku di ni nga va ñola ngu diwoko, ni va humisa ditikoni ka Egipta. Nguko, vona kha va vekisa txitumelelano txangu; ngu toneto, kha na va khatalela, kuwomba Mkoma.

1 Pedro 2:9

Ngu toneto, anu mi liveleko lo sawuleka, vaphaxeli va wukoma, mfumo wo sawuleka, vathu va va lumbako Txizimu, kasiku mi na tsimbila mi txi rurutela mithumo ya kuxamalisa ya Txizimu, atxi txi nga mi humisa txidemani, txi mi wuyisa liwoningoni ka txona ko xamalisa;

Genesisi 17:9

Txizimu txi wombile ka Abrahamu, txi txi kha txona: “Awe u na vekisa Txitumelelano txangu, awe ni lihunzu lako, msana kwako, kala kupinduka.

Eksodha 6:7

Ni na mi maha vathu vangu, se ani ni na va Mkoma Txizimu txanu, ni mi humisako ka mikaralo ya ditikoni ka Egipta.

Eksodha 8:22

Se ka ditshiku dile, ni na hambanisa ditiko da Goxeni, adi va zumbako ka dona vathu vangu, ti to ku si maneki koneyo mabhawu, se u na tiziva ti to ani ngani Mkoma hagari ka ditiko dotshe.

Dhewuteronome 28:9

Mkoma a na kumaha ditiko dakwe do sawuleka, nga ti ene a nga ku xambanyela, ngako u txi vekisa sirumo sa Mkoma, Txizimu txako, ni kungako u txi tsimbila ngu tinzila takwe.

1 Makronika 17:22

Se u tekile vathu va ka Israyeli kuva veva vathu vako, kala kupinduka; se awe Mkoma, uve Txizimu txawe.

Ezekhiyele 16:8

Se ni to pinda ngu ha u nga ti ti kona, ni kuwona, ni wona taku mbimo yako i ti ti mbimo ya lirando; se ni to fenengeta wumbwiri wako ngu didhamba dangu; ni to kuthembisa ni maha txixambanyo ni nawe, kuwomba Mkoma Txizimu, se awe u mahile wangu.

Amosi 3:2

Ka totshe timwaya ta ha mafuni, ni zivile anu dwe; ngu koneho, ni na mi endela ngu mhaka ya wotshe wubihi wanu.

Amosi 6:1

Dikhombo ka va va humulako Siyoni, ni va va tipfako va di zumbisekile mmangoni ka Samariya, va ku ni ditina hagari ka matiko o khata, ni vale vatako nyumbani ka Israyeli.

Eksodha 34:9

a txi khene: “Mkoma, ngako ani ni di mani kukateka masoni kwako, tsimbila kumweko ni nathu, hambiko vathu vava i ku va misungo yo banga, divalela wubihi wathu ni sionho sathu, u txi hi fuya, hi va thomba yako.”

Levhi 20:24

Ani ni mi gete ni txi khani: Anu mi na ya fumela ditiko dawe, ni na mi ninga dona di txi va i di thomba yanu, ditiko edo di khulungako masi ni wulombe. Ani ngani Mkoma, Txizimu txanu, ni nga mi thavisa hagari ka vamwani vathu.

Dhewuteronome 9:29

Aniko, vona mbathu vako ni thomba yako; awe ngawe u nga va humisa wukhumbini, ngu mtamo wako wa hombe, ni diwoko dako da wundena.

Dhewuteronome 26:19

Kasi ku a na kuguleta txitimwi ka otshe matiko awa a nga ma maha, u txi ma pala otshe ngu wudhumo ni nduma, ni kupfaliswa, u txi maha ditiko di di nga sawulekiselwa Mkoma, Txizimu txako, nga ti ene apune a nga wombisa tona.

Jobe 41:3

Ina mwendo yi nga dilela kwako kani? Mwendo yi nga kukombela ku yi tsetsa kani?

Jeremiya 13:11

Nga kule libhandi li namarelako ha txiwununi ka m'thu, ngu toneto ni mahile ti taku yotshe nyumba ya ka Israyeli ni yotshe nyumba ya ka Judha ti txi namarela kwangu, kuwomba Mkoma, kasi di txi maneka kwangu ditiko, ni ditina, ni wudhundo, ni wuhombe; aniko kha va tumela kuengisa.