Eksodha 19:10 - Bhiblia Yo Sawuleka

¹⁰ Mkoma a to khene kambe ka Mosi: “Tsula u txi ya sawulekisa vathu nyamsi ni mangwana, va txi kuwula syambalo sawe,

Eksodha 19:10 Referans Kwoze

Vahebheru 10:22

Ngu toneto, ahi tshuketeleni hi di ni mbilu yo lulama, na hi di tate ngu likholo, hi di ni mbilu yi yi nga basiswa ka wotshe wubihi wa livhalo, ni mmidi wo kuwulwa ngu mati o basa.

Levhi 11:25

Awule a rwalako txirumbi txa sihari soneso, a fanete kukuwula syambalo sakwe, e zumba a txi yila, dotshe ditshiku.

Genesisi 35:2

Sekoko Jakobe a to womba ka ngamu yakwe yotshe ni ka votshe vale a nga ti navo, a txi khene: “Tshotshani hahanze sotshe sithombe sa sizimu sa vamatiko, asi si ku hagari kwanu, ti basiseni mi txitxa ni syambalo sanu.”

1 Vakorinto 6:11

Vamwani kwanu i ti vo nga toneto, aniko se mi kuwutwe, mi sawulekisilwe, mi mahilwe valulami ngu ditina da Mkoma wathu Jesu Kristu ni Moya wa Txizimu txathu.

Mitengo 8:21

Valevhi va to ti basisa, ve kuwula tinguwo tawe; Aroni a to va ningela kasi kumaha mningelo wa kundiwitela, masoni ka Mkoma, se a to va mahela mphaxo wa txionho kasi kubasiswa.

Levhi 15:5

Awule a gwesako ahale ene a nga otela kona, a na kuwula syambalo sakwe, e samba mmidi wakwe, se e zumba a txi yila ka dotshe ditshiku donedo.

Joxuwa 3:5

Joxuwa a to khene kambe ka vathu: “Ti sawulekiseni, nguko mangwana Mkoma a na maha sidiwukiso hagari kwanu.”

Mitengo 8:7

Ati u no mahisa tona kasi ku va basisa ngu tiya: U na xwayela txitimwi kwawe mati o thavisa sionho, msana keto va na ti yola wotshe mmidi wawe ngu limo, ve kuwula syambalo sawe.

Mtuletelo 7:14

Ani ni to angula ni txi khani: “Mkoma wangu, awe ngawe u ti zivako.” Se ene a ti khene: “Avava, ngu va va tako ngu kuxanisekani ka hombe; va nga kuwula syambalo sawe, ve si basisa ngu mnoha wa Txinvutana.

Joxuwa 7:13

Khukha u txi ya sawulekisa vathu, u txi khawe kwawe: Ti sawulekiseleni ditshiku da mangwana, nguko Mkoma, Txizimu txa Israyeli, a womba tiya: Kurukwa kuho hagari kwanu va ka Israyeli; kha mi na mbi sikota kutsana masoni ka valala vanu, kala kuza mi txi thavisa txiruko hagari kwanu.

2 Makronika 29:5

Se a to khene kwawe: Ni engiseni anu va ka Levhi! Ti basisani, mi basisa ni Nyumbani ka Mkoma, Txizimu txa vatate vanu, mi thavisa yotshe nzambwa ha wukhaloni ko sawuleka.

Mitengo 31:24

Kambe mi na kuwula syambalo sanu ngu ditshiku da wutxhanu ni mambidi, kasi ku mi txi na basa; se msana keto mi na wulela dizumboni.

Jobe 1:5

Ku ti ti maheka ti to, ma di pindile masiku ale a mibuso yawe, Jobe a ti ko rumisa ti to, ve sawulekiswa, se e wuka ngu mabimbi-kutxa, e ningela miphaxo, madingano ni mtengo wawe votshe; nguko Jobe a ti ti khene: Va nga nda dhuka va di onhile vanana vangu se ve ruketela Txizimu timbiluni kwawe. Jobe a ti ti mahisa toneto yotshe mbimo.

2 Makronika 29:34

Vaphaxeli i ti ti va dotho se va txi tandeka ku sunduwulela sotshe sihari sa mningelo wo hiswa. Se va to vhunetwa ngu vanawe va ka Levhi kala ku wotshe mthumo wu txi guma, ni kala ku vaphaxeli vamwani ni vona ve txi ti basisa, ngu ku Valevhi va ti ni timbilu to lulama kupinda vaphaxeli.

1 Samuwele 16:5

Se ene a to khene: Ni ta ngu kudikha; ni tete ku ta phaxela ka Mkoma. Ti sawulekiseni mi tsula ni nani mphaxoni. Se a to sawulekisa Jese ni vanana vakwe, e va ramba ku veya mphaxoni.

Mtuletelo 22:14

Va katekile avale va kuwulako tinguwo tawe kasiku ve mana txyavelo ka mndonga wa wutomi, ni kusikota kuwulela didhoropani ngu ha sikeni ka dona.

Mitengo 11:18

Se u na gela vathu u txi khawe: Ti basiseni, nguko mangwana mi na khata kudya nyama, nga ha mi nga txi yi dilela tinzeveni ka Mkoma, mi txi khanu: “I mani a no hi ninga nyama hi txi dya, nguko hi ti ti zumbisekile ditikoni ka Egipta.” Se Mkoma a na mi ninga nyama mi txidya;

Mitengo 19:19

Se m'thu wu a nga basa, a na xwayela ka wu a nga mbi basa ngu ditshiku da wuraru, ni ditshiku da wutxhanu ni mambidi a txi msawulekisa; kambe a na kuwula syambalo sakwe, e samba amu ka mati, ni minova ya kona e ti basile.

2 Samuwele 19:24

Mexibhoseti mwana Sawule, a to relela nene e hingeta mfumeli, a to tsula a sa samba minenge, hambi kuwila maletu akwe, hambi kukuwula syambalo sakwe, kukhukhela ka ditshiku di mfumeli a nga khukha ngu dona kala ka ditshiku di mfumeli a nga wuya ngu kudikha.

Mitengo 31:23

sotshe sile si tsanako ha ka mndilo, mi na si pindisa ngu ha mndiloni, kasi ku si basa; hambi keto, si na kuwulwa ngu mati o sawuleka; aniko sotshe si si tsaniko ka mndilo, mi na si kuwula ngu mati.