Eksodha 18:12 - Bhiblia Yo Sawuleka

¹² Sekoko Jetro, msade wa Mosi, a to teka mningelo wo hiswa ni mphaxo, a txi tsula naso ka Txizimu; Aroni ni otshe madhota a ka Israyeli va tile ve ta dya mapawu kumweko ni msade wa Mosi, masoni ka Txizimu.

Eksodha 18:12 Referans Kwoze

Dhewuteronome 12:7

Se mi na ya dya masoni ka Mkoma, Txizimu txanu, mi na ya tsaka ngu wotshe mthumo wa manza anu, anu ni yotshe mimwaya yanu, mi tsakela asi Mkoma, Txizimu txanu, a no va a di mi katekisile ngu sona.

Genesisi 31:54

Jakobe a to phaxa mhamba txitimwi ka mmango, e dhana va ka kwawe ve ta dya sakudya. Vona va dyite, va txi otela kona mmangoniyo.

Eksodha 24:11

Kambe Mkoma kha guleta dianza dakwe txitimwi ka vasawuleki, hagari ka vanana va ka Israyeli; kambe va txi wonile Txizimu, va dyite, ve sela.

Eksodha 24:5

Ngu msana a to ruma mazambi okari a vanana va ka Israyeli, kasiku va txi maha miningelo yo hiswa, va txi maha miphaxo ka Mkoma ngu kudaya marole va txi dhumisa Mkoma.

1 Vakorinto 10:31

Ngu toneto, mwendo ma dya, mwendo ma sela, mwendo mi thuma tihi ni tihi, ti maheni ngu moya wa kudhumisa Txizimu.

1 Vakorinto 10:21

Kha mi na kusikota kusela digombe da Mkoma kumweko ni digombe da madhimoni. Kha mi na kusikota kukhalahatsha mi dyela ha mezani ka Mkoma ni ha mezani ka madhimoni.

1 Vakorinto 10:18

Hi ngani alakanya va ka Israyeli. Ava va dyako timhamba, ina kha va mani txyavelo txa txiluvelo, kani?

Luka 14:15

Mmweyo wa vale va nga ti ha sakudyani, ngako a txi pfa timhaketo, a to khene kwakwe: “A katekile awu a no ya dya sakudya Mfumoni ka Txizimu!”

Luka 14:1

Ngu ditshiku da Sabbata, Jesu a to wulela nyumbani ka mmweyo wa vathangeli va Vafarisi, kuya dya sakudya. Se va ti mu wonisisa ta tinene.

Dhaniyeli 10:3

Ni sidyi sakudya so dhundeka, nyama ni vhinya si si wuleli mkanani kwangu, kambe ni si toli mafura, kala kuza kuguma mavhiki mararu.

Jobe 42:11

Sekoko va to ta kwakwe votshe vanawe va txiwamna ni va txisikati, ni votshe vale va nga ti ti m'ziva ngu kale, va txi ta dya nayo dipawu m'tini kwakwe, va txi mtsetsa ni ku mthavelela, ka wotshe wubihi wule Mkoma a nga ti ti mrumete; se mmweyo ni mmweyo wawe, a to mninga male, ni tiphera ta nzalama.

Jobe 42:8

Tekani koko mtxhanu wa marole ni mambidi, ni tihamba, mi tsula ka txithumi txangu Jobe, mi txi ya ningela mphaxo wo hiswa mipune, se txithumi txangu Jobe a na mi kombelela; nguko kutilava ni nga mtumelela, kasi ku ani ni si mi tshumeteli ngu wubihi wanu; nguko anu kha ma womba ditshuri ngu ngani, kufana ni txithumi txangu Jobe.

Jobe 1:5

Ku ti ti maheka ti to, ma di pindile masiku ale a mibuso yawe, Jobe a ti ko rumisa ti to, ve sawulekiswa, se e wuka ngu mabimbi-kutxa, e ningela miphaxo, madingano ni mtengo wawe votshe; nguko Jobe a ti ti khene: Va nga nda dhuka va di onhile vanana vangu se ve ruketela Txizimu timbiluni kwawe. Jobe a ti ti mahisa toneto yotshe mbimo.

2 Makronika 30:22

Ezekhiya a to womba-womba ka votshe va ka levhi ava va ku ni wutxhari wa wunene wo ziva Mkoma; se vathu votshe ve busa mtxhanu wa masiku ni mambidi, va ningela mningelo wa kudikha va txi dhumisa Mkoma Txizimu txa vatate vawe.

2 Samuwele 9:7

Se Dhavhidha a to khene kwakwe: U nga thave, nguko ni lava ku ku mahela wuxinji ngu mhaka ya kuranda Jonatani, tate wako. Kambe ni na kutshumetela otshe mapulo a tate wako Sawule, awe u na dyela mezani kwangu masiku otshe.

Dhewuteronome 27:7

Koneyo u na ya maha mningelo wa mpatano, kambe u na ya dya u txi tsaka, masoni ka Mkoma, Txizimu txako.

Eksodha 2:20

Tate wawe Jetro a to va wotisa, a txi khene: “Ahani ene kani?” Mi mlekete txani a txi tsula eyo wamwamna kani? M'dhaneni e ta dya sakudya ni nathu.

Genesisi 43:25

Vona va to lulamisa siningo sawe, sa ku ta ninga Josefa, a nga ti fanela kubwaka ni mitshikari, nguko va ti zivile ti to va na mahelwa konaho sakudya sa dhina.

Genesisi 26:25

Sekoko Isaake a to aka txiluvelo koneho, e dhumisa ditina da Mkoma, a txi zima ditenda dakwe; se sithumi sa Isaake, si to kela txisima kona hale.

Genesisi 12:7

Se Mkoma a to humelela ka Abramu a txi ta khene: “Ditiko diya ni na di ningela ka liveleko lako.” Ngu konaho Abramu a nga akela Mkoma txiluvelo, a nga ti wonekisa kwakwe.

Genesisi 8:20

Nowa a to akela Txizimu txiluvelo, e teka sihari sokari ka sotshe so sawuleka, ni ka sotshe sinyana so sawuleka, a txi maha mningelo wo hiswa ha txiluveloni.

Genesisi 4:4

Se Abhele nene a to ningela matiwula a tinvuta ta txibalani kwakwe, to nona. Mkoma a to wona ngu kutsaka Abhele ni mningelo wakwe;

Eksodha 2:16

Se Jetro, mphaxeli wa Midhiyani a ti ni mtxhanu wa vanana ni vambidi vamahorana. Vona va to ya kuya reka mati, ve tata mikawu kasi kuninga mitxhambi ya tate wawe yi sela.

Eksodha 3:1

Mosi a ti ti dyisa mtxhambi wa tinvuta ta Jetro, msade wakwe, mphaxeli wa Midhiyani. A to gola mtxhambi wa tinvuta e ti yisa txiwulani, aha a nga ya hoka Horebhi mmangoni ka Txizimu.

Eksodha 18:13

Se ku to maheka ati to, mangwanani ka kona, Mosi a to khalahatsha kasiku e thethisa vathu; vathu va manekile va di emile masoni kwakwe Mosi a txi vathethisa, kukhukhela mixo kala di txi swa.

Eksodha 20:24

U na ni akela txiluvelo ngu mafu, txitimwi ka txona u na maha miphaxo yako yo hiswa ni ya kudhumisa, ni timhamba ta tinvuta tako ni ta tihomu tako. Kotshe amu ditina dangu di no alakanywa kona, ni nata kwako ni ta kukatekisa.

Eksodha 33:7

Se Mosi a to teka ditenda a txi ya di gwimba hahanze, kule ni wugovelo, ve di ningile ditina daku ditenda da msengeletano. Ni votshe vale va nga ti lava ku wotisa mhaka ka Mkoma, ayile yi nga ti va karata, va ti ti ya ka ditenda da msengeletano, hahanze ka wugovelo.

Mitengo 10:29

Sekoko Mosi a to khene ka Hobhabhe, mwana Reweli, mmidhiyani, tate wa Mosi ngu ka msikati wakwe: “Athu hiya ka wukhalo wule Mkoma a nga khene: Ni na mi ninga; a hi tsule hotshe, athu hi na kuxayisa kha kwati; nguko Mkoma a thembisile kumaha wunene ka Israyeli.”

Genesisi 26:30

Sekoko Isaake a to va lulamisela m'buso, se vona ve dya, ve sela.