Eksodha 15:13 - Bhiblia Yo Sawuleka

¹³ Ngu wunene wako, u hulukisile ni kutsimbitisa ngamu yako ngu mtamo wako, u va tsimbitisile va txi ya ditikoni kwako ko sawuleka.

Eksodha 15:13 Referans Kwoze

Masalmo 77:20

U tsimbitisile vathu vako kota m'dyisi wa mtxhambi, ngu manza a Mosi ni Aroni.

1 Pedro 1:5

anu mi vhikelwako ngu mtamo wa Txizimu, ni likholo la kuhanyiswa kuwa hi ku hafuhi ni ku kuwona ka masiku o gwitisa.

Jeremiya 2:6

Se kha va kha vona: “Ahani Mkoma, awu a nga hi humisa ditikoni ka Egipta kani? Awu a nga hi thangela amu txiwulani, ditikoni ka sigwangwa ni maphala, ditikoni ka kuoma kumweko ni mtsudini wa kufa Ditiko di nga ti si nga ni vapindi ni vaaki.”

Masalmo 106:9

Txizimu txi kawukile Linene lo Bhilivila, se linene li txi phwa. Txi va txhatukisile ngu ha kuetani ka linene, va txi nga vo tsimbila txiwulani.

Vaefesu 2:4

Kambe Txizimu, txi nga tala ngu wumbilu ni lirando la hombe, ali txi nga hi randa ngu lona athu,

Masalmo 80:1

Awe m'dyisi wa ka Israyeli, hi engise u kombisako nzila ka liveleko la ka Josefa kota mtxambi wako, hi engise, awe u ku ha txikhaloni txitimwi ka makerubhima, ti wonekise!

Genesisi 19:16

Ngako a nga ti ti kana-kana, vavamna vale va to mñola ngu diwoko, kumweko ni msikati wakwe, ni vanana vakwe vavambidi vamahorana, nguko Mkoma a ti ni wumbilu ngu vona. Vona va to mu humisa veya m'veka hahanze ka didhoropa.

Nehemiya 9:12

Se u va kombile nzila ni mitshikari ngu direfu, ni wusiku u va kombile nzila ngu phande ya mndilo, kasi kuwoninga nzila yi va no tsimbila ngu yona.

Eksodha 6:6

Ngu mhaka yeto, u na womba ka vanana va ka Israyeli u txi khawe: Ani ngani Mkoma, kambe ni na mi humisa ka mithumo yo nemela ya ditikoni ka Egipta, ni na mi thusa wukhumbini kwanu, kambe ni na mi tirula ngu dianza dangu da mtamo ni mthumo wa hombe wa kulamula.

Eksodha 15:16

Kuxamala ni kuthava ku na wa txitimwi kwawe; ngu wuhombe wa diwoko dako, va na maha siduma nga marigwi, kala vathu vako va txi txhatuka, awe Mkoma, kala va txi txhatuka vathu vale u nga va tirula.

Eksodha 15:17

Awe u na va wuleta ni ku va phaya ka mmango wu i kuthomba yako, wukhalo wule awe, Mkoma, u nga ti lulamisela kuzumba kona; wukhalo wo sawuleka Mkoma, wo akwa ngu manza ako.

Eksodha 20:2

“Ani ngani Mkoma Txizimu txako, awule a nga kuhumisa ditikoni ka Egipta, amu ka nyumba ya wukhumbi.

2 Samuwele 15:25

Sekoko mfumeli a to khene ka Zadhoki: Tshumeta dibhokiso da Txizimu didhoropani; kambe ni txi na mana mathomo masoni ka Mkoma, a na ni tshumetela eya ni komba dona ni nyumba ya dona.

Masalmo 74:2

Alakanya vathu vako, ava u nga va sawula kukhukhela ka kale, vathu va tihunzu ti u nga ti tirula kasiku ti txi kulumba, alakanya mmango wa Siyoni, aha u zumbako kona.

Masalmo 78:35

Sekoko va ti ti khumbula ti to Txizimu i m'vhikeli wawe, ni ti to Txizimu Nyatxitimwi i ti mtiruli wawe.

Isaya 51:10

Ina hi ngawe u nga omisa linene, i ku mati a kuhokoma ka hombe kani? Kambe u nga dola nzila kutshimani ka linene, kasi kuve tshawunyeta vale va nga tirulwa kani?

Isaya 57:15

Nguko a womba tona eto Nyatxitimwi, wa Kuthaviseka, a zumbako kupindukani, eyo ditina dakwe i ku Kusawuleka: Ni zumba ka wukhalo wo guleka ni kusawuleka, kumweko ni kuxaniseka, ni kukarateka moyani, kasi kuwusa moya wa vale vo karateka, ni kuwusa timbilu ta vaxaniseki.

Isaya 63:9

Ka kotshe kuxaniseka kwawe, ngene a nga xaniswa, se Ngelozi yile yi ku masoni kwakwe yi to va huanyisa; ngu lirando lakwe ni wumbilu wakwe, a to va tirula, se e va teka ni ku va tsimbitisa ka otshe masiku a kaleko.