Eksodha 15:11 - Bhiblia Yo Sawuleka

¹¹ Awe Mkoma, i mani a fanako ni nawe, hagari ka sizimu kani? I mani wo nga awe i ku wa hombe ni kusawuleka nga awe, wo thaviseka ni wudhumo, wo maha sixamaliso kani?

Eksodha 15:11 Referans Kwoze

1 Vafumeli 8:23

a txi khene: O Mkoma, Txizimu txa ka Israyeli, kha ku nga ni Txizimu txo ngawe, txitimwi nzumani, hambi hahatshi ha mafuni, u xayisako txitumelelano ni wunene, ka sithumi sako si tsimbilako ngu mbilu yawe yotshe masoni kwako;

1 Samuwele 2:2

Kha ku na wo sawuleka kufana ni Mkoma; nguko kuwalo mmwani hahanze kwako; kha ku na dirigwi ni da dimwedo do fana ni Txizimu txathu.

2 Samuwele 7:22

Ngu toneto, u wa hombe ngutu, awe Mkoma Txizimu, nguko kha ku na wo fana ni nawe, kambe kha ku na tximwani Txizimu, hahanze kwako dwe, madingano ni totshe ti hi nga tipfa ngu tinzeve tathu.

Mtuletelo 4:8

Sivangwa siya sa mune, tximwani ni tximwani txi ti ni mtxhanu wa mabhapi ni dimwedo, na si di tate ngu maso, otshe makhalo, mndani ni hahanze. Se wusiku ni mitshikari, sivangwa sile sa embelela si si malali, si txi kha sona: “Msawuleki, msawuleki, msawuleki! Mkoma Txizimu txa mtamo wotshe. Awule a nga ti ho, Awule a kuho ni wule a tako.”

Isaya 6:3

Se ma txi kwangula dimwedo ka dimwani, ma txi kha ona: Msawuleki, Msawuleki, Msawuleki ngene Mkoma wa Mabutho a Tiyimbi; Otshe mafu ma tate ngu wudhumo wakwe.

Dhewuteronome 3:24

“Mkoma Txizimu, se u khatile kukombisa ka txithumi txako, wuhombe wako ni dianza dako da mtamo; nguko njizimu muni txi kuho nzumani ni mafuni, txi nga sikotako kumaha mithumo yo nga yako, ngu mtamo wo fana ni wako kani?

Masalmo 86:8

Kha si nga ho sizimu si si dinganako ni nawe, Mkoma; kuwalo wu a sikotako kumaha ati awe u mahako.

Masalmo 77:14

Awe u Txizimu txi txi mahako sidiwukiso; u wonekisile mtamo wako ka votshe vathu.

Mtuletelo 15:4

Mkoma, i mani a no mbi thava ni kupfalisa ditina dako, kani? Ina! Ngawe dwe u ku msawuleki! Yotshe mifumo yi nata khizama masoni kwako, nguko mithumo yako ya kululama yi ha kubasani.”

Isaya 40:25

Mi na ni fananisa ni mani koko, kasi ku ni txi fana nayo kani? Kuwomba Msawuleki.

Dhewuteronome 33:26

Awe Jesurumi kha nga ho wa kufana ni Txizimu, a tako a di gadhile tinzuma kasi ku ta ku vhuna, a tako ni wuhombe wakwe txitimwi ka marefu!

Masalmo 77:19

U tute nzila yako hagari ka linene; u tsimbila ngu hagari ka mati o khulunga, aniko ni wammweyo kha nga wona mkondo wako.

Isaya 40:18

Mi nga txi fananisa ni mani koko Txizimu, mwendo mi nga txi fananisa ni txani kani?

Masalmo 35:10

Ngu yotshe mbilu yangu ni na womba ni txi khani: “Kha txi nga ho tximwani Txizimu hahanze kwako Mkoma! Awe wa hulukisa sisiwana ni sikulungu ka vale i ku va mtamo ngutu kupinda sona, avale va si dyelelako!”

Eksodha 8:10

Faro a to womba a txi khene: “Mangwana.” Se Mosi a txi khene: “Ti na maheke nga kuwomba kwako, kasiku u tiziva tito, kha ku nga ho mmwani wo fana ni Mkoma, Txizimu txathu.”

Masalmo 66:5

Ngonani mi ta wona mithumo ya Txizimu, sidiwukiso si txona txi nga si maha masoni ka vathu.

Jeremiya 49:19

A na woneka sixaxani Jordhani nga ngonyamo, a txi lwisa wukhalo wa mtamo; nguko, ngu mbimwanyana, ni na mtutumisa hale; niku i mani ni no msawula ni txi m'veka txitimwi kwakwe kani? Nguko i mani a fananako ni nani! I mani a no ni vekela mbimo kani? I mani m'dyisi wu a no ni tsiveta kani?

Isaya 57:15

Nguko a womba tona eto Nyatxitimwi, wa Kuthaviseka, a zumbako kupindukani, eyo ditina dakwe i ku Kusawuleka: Ni zumba ka wukhalo wo guleka ni kusawuleka, kumweko ni kuxaniseka, ni kukarateka moyani, kasi kuwusa moya wa vale vo karateka, ni kuwusa timbilu ta vaxaniseki.

Masalmo 145:17

Mkoma a lulamile ka totshe tinzila takwe, ni kusawuleka ka yotshe mithumo yakwe.

Jeremiya 10:16

Awu i ku txiningo txa ka Jakobe kha fanani naso; nguko ngene mmahi wa silo sotshe; Israyeli lixaka la thomba yakwe, ditina dakwe Mkoma wa Mabutho a Tiyimbi.

Masalmo 119:120

Mmidi wangu wa dhudhumela ngu dizowa masoni kwako, ngu txithavo txi ni ku natxo ka mithetho yako!

Luka 12:5

Aniko ni na mi kombisa awu mi fanelako ku mu thava. Thavani awu, msana ka kudaya mmidi, a ku ni mtamo wa kutshotsha m'thu mndiloni. Ina, ani na mi gela, thavani eneyo.”

Masalmo 90:11

I mani a sikotako kuziva mtamo wa kuhenya kwako kani? I mani asi thaviko wurena wa kuhenya kwako kani?

Levhi 19:2

Womba ka wotshe msengeletano wa vanana va ka Israyeli, u txi khawe: Mahani vathu vo sawuleka, nguko ani, Mkoma, Txizimu txanu, ni wo sawuleka.

Isaya 30:11

vayilelani nzila, mi huma amu ka txinzilana; mahani ti to Msawuleki wa Israyeli asi maneki hagari kwanu.

Masalmo 89:18

Nguko Mkoma m'vhikeli wathu. Kambe Msawuleki wa ka Israyeli, i ku ene Mfumeli wathu!

Mtuletelo 13:4

vathu ve khozela mwamilambo, nguko a nga ningela wukoma ka txikalani, ngu msana ve khozela txikalani, va txi kha vona: “I mani a fanako ni txikalani kani, i mani a sikotako kulwa natxo kani?”

Eksodha 3:20

Ngu mhaka yeto, ni na nawuluta dianza ni txi peka ngu dona ditiko da Egipta, ngu sixamaliso sotshe ni no si maha kwawe; msana ka toneto ngu kona ene a no mi leka mi txi tsula.

Eksodha 9:14

Nguko, ka mbimo yiya, ni na ruma makhombo otshe kwako, ni ka mahalamu ako, ni ka votshe vathu vako, kasiku u txi tiziva ti to kha ku nga ho mmwani wo fana ni nani ha ditikoni kotshe.

Eksodha 18:11

Se konkuwa na tiziva ati to Mkoma mbwa hombe kupinda sotshe sizimu, nguko a mahile ti to kotshe kubiha ku txi wa txitimwi kwawe.”

Eksodha 20:3

U ngave ni simwani sizimu masoni kwangu.

2 Makronika 2:5

Se nyumba yi ni ku na yi aka yi na va ya hombe, nguko Txizimu txathu nja hombe kupinda sizimu sotshe.

2 Makronika 6:14

A txi khene: O Mkoma, Txizimu txa Israyeli, kha ku nga ni Txizimu txo ngawe, txitimwi nzumani, hambi hahatshi ha mafuni, u xayisako txitumelelano ni wunene, ka sithumi sako si si tsimbilako ngu mbilu yotshe masoni kwako.

Masalmo 22:23

“Anu mi thavako Mkoma, m'dhumiseni! Li na m'dhumise lotshe liveleko la Jakobe! Li na mxoniphe lotshe liveleko la Israyeli!

Masalmo 113:5

I mani a fananako ni Mkoma, Txizimu txathu, txi zumbako txitimwi ngutu.

Masalmo 136:4

Awule i ku ene ekha a mahako sixamaliso sa hombe; nguko lirando lakwe nda kala kupinduka!

Mika 7:18

I mani wo fana ni nawe, u divalelako wubihi u divala ni wueyisi wa miboti ya thomba yako kani? Mkoma kha veki kupandiseka kwakwe yotshe mbimo, nguko a tsakiswa ngu wumbilu amu ka wunene.

Eksodha 8:6

Aroni a to guleta dianza dakwe txitimwi ka mati a ditiko da Egipta, makhele ma to huma ma txi tata ditiko da Egipta.

Dhewuteronome 1:30

Mkoma, Txizimu txathu, ngene a no ya masoni kwanu, ene a na mi lwela, kufana ni tile a nga ti maha ngu nganu ditikoni da Egipta, khoheni kwanu.

Dhewuteronome 4:34

Mwendo njizimu txokari txi nga duketa kuya teka vathu hagari ka vamwani vathu, ngu mithumo ni sikombiso, ni sixamaliso, ni kulwa ngu dianza do tsana, di nga guleka ni mithumo ya hombe yo thisa ku nga totshe tile Mkoma, Txizimu txako, a nga ti maha ditikoni ka Egipta, na anu mi txi ti wona kani?

1 Makronika 16:25

Nguko Mkoma mbwa hombe; a fanela kudhumiswa ngutu, wa thaviseka kupinda sotshe sizimu.

Masalmo 60:2

U dekadekisile mafu u txi ma bhandisela; tsivetela tufa ta ona, nguko ma khungumuka!

Masalmo 77:11

Mkoma, ani na alakanya simaho sako so xamalisa; na alakanya sidiwukiso si u nga si maha kale.

Masalmo 86:10

Nguko ngawe wekha u ku Txizimu! Ngawe u ku wa hombe, u mahako sidiwukiso!

Isaya 46:9

Alakanyani timhaka ti ti nga pinda ta kale ngutu: Taku ani ngani Txizimu, se kha ku na tximwani Txizimu, kha ku nga ni tximwani txo fana ni nani;