Eksodha 14:28 - Bhiblia Yo Sawuleka

²⁸ Mbimo yi mati ma nga tshumela me teka txikale txa ona, ma to mita sikotxikani, vagadhi va mahantxhi, ni mahantxhi a kona, ni dotshe dibutho da yimbi ya Faro, yi yi nga ti va londetile mu lineneni yi txi va hinga, kambe kha ka huluka ni wammweyo.

Eksodha 14:28 Referans Kwoze

Masalmo 78:53

Txi va thangete ve tsimbila ngu kutsana va si thavi txilo, txi mbembisile valala vawe lineneni.

Habhakuki 3:13

Awe u humile kuya hulukisa vathu vako, kuya hulukisa msawuleki wako; awe u gangile msungo wa nyumba ya wo biha, u fumbula makhato a nyumba kala magwito. (Selahi)

Masalmo 136:15

A bhwabhwamelisile Faro ni dibutho dakwe, ka Linene lo Bhilivila; nguko lirando lakwe nda kala kupinduka!

Vahebheru 11:29

Ngu likholo, va tshawunyetile Linene lo Bhilivila, nga vo tsimbila txitimwi ka mafu a kuoma; kasi Vaegipta, ngako va txi duketa kumaha toneto ni vona, va to mitwa ngu linene.

Nehemiya 9:11

Aniko u to va abanisela linene masoni kwawe, se ve pinda ngu hagari ka linene, li di omile; u rinza valala vako mazivani, va txi nga marigwi amu ka mati o tutuma.

2 Makronika 20:24

Mbimo yi va ka Judha va nga hoka ka wukhalo wo guleka txiwulani, va to wona sirumbi si si nga fenengeta mafu, kha kuya huluka ni wammweyo.

Dhewuteronome 11:4

ni ti ene a nga maha ka dibutho da yimbi ya Egipta, ni ka sikotxikani sawe, ni ka mahantxhi awe, ati a nga maha ta ku va bhwabhwamelisa lineneni ko Bhilivila, mbimo yi vona va nga txi mi hinga, ahawa Mkoma a nga va fuvisa, kala ni nyamsi;

Eksodha 15:10

U futetile ngu moya wako, se linene li va mitile; va bhekile nga simbi, va txi ya hahatshi ka mati.

Eksodha 14:13

Kambe Mosi a to khene ka vathu: “Mi nga thaveni; manekani mi di tsani, nguko nyamsi mi na wona ti Mkoma a no mi hulukisisa tona; nguko Vaegipta vava mi va wonako nyamsi, kha mi na mbiswa mi txi va wona kambe.

Eksodha 15:19

Nguko mbimo yile mahantxhi a Faro, ni sikotxikani sakwe, ni vagadhi va mahantxhi, va nga wulela lineneni, Mkoma a mahile ti to mati ma txi tshangana txitimwi kwawe; na kuve vanana va ka Israyeli va pindile ku di omile hagari ka linene.

Valamuli 4:16

Bharake a to tutumisa vathu va yimbi kala Heroseti-wa-vamatiko. Dotshe dibutho da yimbi da Sisera di to xulwa, di txi khoziswa ngu ditxhari, ni wammweyo asi huluki.

Genesisi 7:18

Se mati ma to guleka me kukumuka ngutu ha mafuni, ngalava yi deluka txitimwi ka mati.

Genesisi 50:9

Kumweko navo kutsute sikotxikani ni mahantxhi, ni vagadhi va ona: I ti dibutho da hombe ngutu.

Masalmo 106:22

Txi nga va mahela sidiwukiso ditikoni ka Kamu ni simaha so thisa lineneni ko Bhilivila.