Eksodha 13:3 - Bhiblia Yo Sawuleka

³ Se Mosi a to khene ka vathu: Di alakanyeni ditshiku diya, adi mi nga huma ngu dona ditikoni ka Egipta, nyumbani ka wukhumbi, nguko Mkoma a mi humisile kona ngu dianza da mtamo; se ngu mhaka yeto, kha mi na mbi dya dipawu do tshumbelwa ka ditshiku donedo.

Eksodha 13:3 Referans Kwoze

Dhewuteronome 24:18

Alakanya ti to na nawe u ti ti khumbi ditikoni ka Egipta, ni ti to Mkoma, a kuthavisile koneyo. Ngu toneto, ni kuleleta ti to u hanyisa toneto.

Dhewuteronome 5:15

Alakanya ti to nawe u ti ti khumbi ditikoni ka Egipta, ni ti to Mkoma, Txizimu txako, a ku humisile koneyo ngu dianza da mtamo ni diwoko do guleka. Ngu mhaka ya toneto, Mkoma, Txizimu txako, a ku leletete ti to u vekisa ditshiku da Sabbata.

Eksodha 20:2

“Ani ngani Mkoma Txizimu txako, awule a nga kuhumisa ditikoni ka Egipta, amu ka nyumba ya wukhumbi.

Dhewuteronome 16:12

Alakanya ti to u ti ti khumbi ditikoni ka Egipta, ngu mhaka ya toneto, khutala u txi xayisa milayo yiya ni ku yi maha.”

Dhewuteronome 5:6

“Ani ngani Mkoma, Txizimu txako, ni nga kuhumisa ditikoni ka Egipta, ka nyumba ya wukhumbi.

Dhewuteronome 15:15

Alakanya ti to na nawe u ti ti khumbi ditikoni ka Egipta, ni ti to Mkoma, Txizimu txako, a ku tirute; ngu mhaka ya toneto, ani na kuninga mlayo wuwa nyamsi.

Dhewuteronome 6:12

Ti wonele, u si divali Mkoma, a nga kuhumisa ditikoni ka Egipta, ka nyumba ya wukhumbi.

Dhewuteronome 16:3

U nga dye dipawu do tshumbelwa; amu ka mtxhanu wa masiku ni mambidi u na dya dipawu da kuxaniseka, (nguko u humile ngu txikuluveta ditikoni ka Egipta) u na maha toneto ka otshe masiku a kuhanya kwako, kasi kukhumbula ditshiku da kuhuma kwako ngu Egipta.

Dhewuteronome 8:14

mbilu yako yi nga ti kukumukise, se u divala Mkoma, Txizimu txako, awu a nga kuhumisa ditikoni ka Egipta, ka nyumba ya wukhumbi;

Eksodha 13:14

Ngako mangwana wa ditshiku vanana vanu va txi mi wotisa va txi kha vona: “Toneto ti womba txani kani?” Mi na xamula mi txi khanu: Mkoma a hi humisile ditikoni ka Egipta, nyumbani ka wukhumbi, ngu dianza da mtamo.

Joxuwa 24:17

Mkoma ngene i ku Txizimu txathu, atxi txi nga hi humisa athu ni vatate vathu, ditikoni ka Egipta, nyumbani ka wukhumbi, atxi txi nga maha sotshe sidiwukiso sa hombe, asiya hi nga si wona ngu maso athu, atxi txi nga hi xayisa amu ka nzila yotshe yi hi nga yi tsimbila ni hagari ka vathu votshe vale hi nga pinda ngu ka vona.

Dhewuteronome 13:10

Se u na m'balisela ngu marigwi kala a txi fa, nguko a duketile ku ku hambukisa ka Mkoma, Txizimu txako, awu a nga kuhumisa ditikoni ka Egipta, amu ka nyumba ya wukhumbi.

Dhewuteronome 24:22

Alakanya ti to na nawe u ti ti khumbi ditikoni ka Egipta. Ngu toneto, ani ni ku leletako ti to u hanyisa tona.

Eksodha 12:42

Wusikuwo, Mkoma a nga pila a txi maha ti to vanana va ka Israyeli va txi huma ditikoni ka Egipta, wu fanete ku va i di wusiku wa kupila, ka votshe vanana va ka Israyeli, va txi khozela Mkoma, ka tixaka totshe ta liveleko lawe.

Dhewuteronome 13:5

Se mprofeti wule mwendo mlori, a fanete kudawa, nguko a kujetete vathu kuhambana ni Mkoma, Txizimu txanu, awu a nga mi humisa ditikoni ka Egipta, a txi mi hulukisa ka nyumba ya wukhumbi; kasi ku mi hambukisa ka nzila yi Mkoma, Txizimu txanu, a nga mi leleta, kasi ku mi tsimbila ngu yona; ngu kumaha keto, mi na thavisa wubihi hagari kwanu.

Dhewuteronome 4:34

Mwendo njizimu txokari txi nga duketa kuya teka vathu hagari ka vamwani vathu, ngu mithumo ni sikombiso, ni sixamaliso, ni kulwa ngu dianza do tsana, di nga guleka ni mithumo ya hombe yo thisa ku nga totshe tile Mkoma, Txizimu txako, a nga ti maha ditikoni ka Egipta, na anu mi txi ti wona kani?

Eksodha 23:15

U na vekisa M'buso wa Mapawu o mbi Tshumbelwa. Amu ka mtxhanu wa masiku ni mambidi u na dya mapawu o mbi tshumbelwa, nga ti ni nga kuleletelisa tona, ka mbimo yi yi nga emiselwa, amu ka mtxima wa Abhibhi, nguko ngu wonewo mtxima u nga huma ngu wona ditikoni ka Egipta. Ni wammweyo a nga sikote kuhumelela masoni kwangu a sa ñola txilo;

Eksodha 20:8

Alakanya ditshiku da Sabbata, u txi di sawulekisa.

Eksodha 12:19

Mndani ka mtxhanu wa masiku ni mambidi ku nga thuke ku txi maneka mtshumbelo tinyumbani kwanu; awule a no maneka a txi dya dipawu do tshumbelwa a na hambukiswa ka msengeletano wa ka Israyeli, hambi i di mluveli mwendo txizikwa txa ditiko.

Eksodha 12:8

Ka wusiku wonewo, va na dya nyama yo bawulwa ha mndiloni; ni mapawu o mbi tshumbelwa.

Eksodha 6:1

Sekoko Mkoma a to khene ka Mosi: “Konkuwa, u na wona ti ni no maha ka Faro, nguko ngu mhaka ya mtamo wa dianza dangu, ene a na va leka va txi tsula, ni mhaka ya mtamo wa dianza dangu a na va tutumisa ditikoni kwawe!”

Eksodha 3:20

Ngu mhaka yeto, ni na nawuluta dianza ni txi peka ngu dona ditiko da Egipta, ngu sixamaliso sotshe ni no si maha kwawe; msana ka toneto ngu kona ene a no mi leka mi txi tsula.

Eksodha 12:15

Mndani ka mtxhanu wa masiku ni mambidi mi na dya mapawu o mbi tshumbelwa, kukhukhela ka ditshiku do khata kala ka ditshiku da mtxhani ni mambidi, mi na thavisa mtshumbelo tinyumbani kwanu, nguko awule a no dya dipawu do tshumbelwa a na wilwa hagari ka va ka Israyeli.

Masalmo 105:5

Alakanyani mithumo yakwe ya kuxamalisa, sidiwukiso sakwe ni kulamula ka txisofu txakwe,

Vaefesu 1:19

mi ziva kambe tito, kwathu makholwa, mbwa hombe ngutu mtamo wa txona, nyala ni mtamo wa Txona wa hombe,

1 Vakorinto 11:24

se a di bongile, a to di bhanda, a txi khene: “Asiya i mmidi wangu awu wu no ningelwa ngu kota yanu; mahani tonatiya, mi na ni alakanya ngu tona.”

1 Vakorinto 5:8

Ngu konaho, he maheni m'buso, i si nga ngu mtshumbelo wa kale, i si nga ngu mtshumbelo wa tshofu ni wa wubihi, aniko he dyeni Pasika ya mapawu o mbi na mtshumbelo, a wunene ni a ditshuri.

Luka 22:19

Ngu konaho a to teka dipawu, se a di bongile, a to di bhanda, a txi va ninga, a txi khene: “Asiya i mmidi wangu wu no ningelwa ngu kota yanu; mahani tiya kasi ku ni alakanya ngu tona.”

Nehemiya 9:10

U kombisile sixamaliso ni sidiwukiso ka Faro, ni ka sotshe sithumi sakwe, ni ka vathu votshe va ditiko dakwe, nguko wu ti zivile ti va nga xanisisa tona vathu vako, se ngu kumaha keto u ti manete ditina, kufana ni ti ti wonekako nyamsi.

1 Makronika 16:12

Alakanyani mithumo yakwe yo xamalisa ayi a nga yi maha; sidiwukiso sakwe ni kululama ka txisofu txakwe.

Matewu 10:12

Ngako mi txi wulela nyumbani, yi loseni.

Eksodha 6:6

Ngu mhaka yeto, u na womba ka vanana va ka Israyeli u txi khawe: Ani ngani Mkoma, kambe ni na mi humisa ka mithumo yo nemela ya ditikoni ka Egipta, ni na mi thusa wukhumbini kwanu, kambe ni na mi tirula ngu dianza dangu da mtamo ni mthumo wa hombe wa kulamula.

Eksodha 7:4

Faro koko kha na mbi mi engisa; hambi ka toneto ani ni na veka dianza dangu txitimwi ka Egipta, nina humisa mabutho angu mu ditikoni ka Egipta, vona vathu vangu, vanana va ka Israyeli, ngu sitsayiso sa hombe.

Eksodha 12:17

Mi na vekisa m'buso wa mapawu o mbi tshumbelwa nguko ngu ka dona ditshikudo ni nga maha ti to dibutho danu da yimbi di txi huma ditikoni ka Egipta. Anu ditshiku diya mi na di vekisa ni tiveleko tanu, awuwa i mthetho wa yotshe mbimo.

Eksodha 13:9

Txi nava i di txialakanyiso manzani kwanu, ni ha mbanza kwanu, kasiku Mlayo wa Mkoma wu txi zumba sisofuni kwanu; nguko Mkoma a mi humisile ditikoni ka Egipta ngu dianza da mtamo.

Dhewuteronome 7:8

Mkoma a maha tiya nguko wa mi randa, kambe a lava kutsanisa txithembiso txakwe, txi ene a nga va a di xambanyile ka vatate vanu, Mkoma a mi humisile ngu dianza dakwe da mtamo, kambe a mi tirute nyumbani ka wukhumbi, manzani ka Faro, mfumeli wa Egipta.

1 Vafumeli 8:42

(nguko va na pfa ngu ditina dako da hombe, ni dianza dako da mtamo, ni diwoko dako do nawuluka), se a txi ta khongela ka yiya nyumba.

Masalmo 114:1

Mbimo yi Vaisrayeli va nga huma ngu Egipta, txikhati txi nyumba ya Jakobe yi nga rura ditikoni ka vanyamthuvo,

Masalmo 136:11

Kambe a thavisile Israyeli hagari ka Vaegipta; nguko lirando lakwe nda kala kupinduka!

Genesisi 15:16

Vanana va liveleko lako la wumune va na wuya kambe kona muwa, nguko konkuwa wubihi wa Vaamori kha wu se hoka magwito ka wona.”

Eksodha 6:7

Ni na mi maha vathu vangu, se ani ni na va Mkoma Txizimu txanu, ni mi humisako ka mikaralo ya ditikoni ka Egipta.

Eksodha 12:2

“Awuwa mtxima wu na va wo khata kwanu, wu na va wo khata mu ka dilembe.

Eksodha 12:41

Ka ditshiku di ku nga ti guma 430 wa malembe, mabutho a tiyimbi ta Mkoma ma manekile ma txi huma ditikoni ka Egipta.

Eksodha 34:18

Vekisa m'buso wa mapawu o mbi tshumbelwa; amu ka mtxhamu wa masiku ni mambidi, u na dya mapawu o mbi tshumbelwa, amu ka mtxima wa Abhibha, nguko ngu wona mtximewo u nga huma ngu wona ditikoni ka Egipta.

Dhewuteronome 6:21

Konako u na mxamula u txi khawe: “Athu hi ti tikhumbi ta Faro ditikoni ka Egipta, aniko Mkoma a hi humisile kona Egipta ngu dianza da mtamo.

Dhewuteronome 9:12

Konako Mkoma a ni gete a txi khene: “Khukha, relela konkuwa, nguko vathu vako, avale u nga va humisa ditikoni ka Egipta, se va mahile kubiha; va kuluvetile kuleka nzila yi ani ni nga va leleta; va ti mahete txithombe txo tshulwa!”

Dhewuteronome 13:6

Ngako mwananu, awu i ku mwanana wa mame wako, mwendo mwanana wako wa mfana, mwendo wa dihorana, mwendo msikati wa mbilu yako, mwendo mndoni wako wo randeka ngutu, a txi lava ku ku kujetela ngu malengo, a txi khene: “He tsimbile hi txi ya khozela simwani sizimu,” sizimu sile awe ni vatate vako mi nga mbi si ziva,

Dhewuteronome 13:11

Kasi ku votshe va ka Israyeli ve tiengisa, ve thava, ni ti to va siswi ve maha to biha, to nga toneto hagari kwanu.

Dhewuteronome 16:1

Xayisa mtxima wa Abhibha, u mahela Mkoma, Txizimu txako, Pasika, nguko mtxima wa Abhibha ngu wona mtxima wule Mkoma, Txizimu txako, a nga kuhumisa ngu ka wona, ni wusiku, ditikoni ka Egipta.

Dhewuteronome 26:8

Se Mkoma a to hi humisa ditikoni ka Egipta ngu dianza da mtamo, ni diwoko do nawulutwa, hagari ka kudhuka ka hombe, kumweko ni sikombiso ni sidiwukiso;

Valamuli 2:12

Se va to leka Mkoma, Txizimu txa vatate vawe, awu a nga va humisa ditikoni ka Egipta, ve londetela simwani sizimu, sa vathu vale va nga ti ti va ranganyetile, se va to khizama ka sona, veza ve wusa kuhenya ka Mkoma.

Valamuli 6:8

Mkoma a to rumela vaprofeti ka vanana va ka Israyeli, a txi ya va gela ku khene: “Mkoma, Txizimu txa ka Israyeli, a khene: Ani ni mi humisile ditikoni ka Egipta, ni mi thavisile nyumbani ka wukhumbi.

Nehemiya 1:10

Avava i ngadi sithumi sako, ni vathu vako, avale u nga va tirula ngu mtamo wako wa hombe, ni dianza dako da mtamo.

Masalmo 89:14

Mfumo wako wu tsanisilwe ngu kululama ni ditshuri, lirando ni ditshuri si ni nawe masoni kwako.

Masalmo 136:12

Ngu dianza da mtamo ni diwoko do nawulutwa; nguko lirando lakwe nda kala kupinduka!

Jeremiya 34:13

A womba tiya Mkoma, Txizimu txa ka Israyeli: Ni mahile txitumelelano ni vakokwani vanu ditshikwedo ni nga va humisa ditikoni ka Egipta, nyumbani ka wukhumbi, ni txi khani:

Dhaniyeli 9:15

Kha ditshuri, awe Mkoma, Txizimu txathu, u nga humisa vathu vako ditikoni ka Egipta ngu dianza dako da mtamo, aniko u mana ditina, i ku ti ti wonekako nyamsi, hi onhile; hi mahile kubiha.