Eksodha 13:18 - Bhiblia Yo Sawuleka

¹⁸ Konako, Txizimu, txi mahile ti to vathu va txi tenderuka ngu nzila ya txiwula hafuhi ni lineneni lo Bhilivila; kambe vanana va ka Israyeli va humile ngu ditikoni ka Egipta va di xomile.

Eksodha 13:18 Referans Kwoze

Dhewuteronome 32:10

Ene a mmani ditikoni ka txiwula, ka txiwula txa mafu a kuoma, txo tala ngu tihuwa; a m'bhiyete a txi mxayisa, a txi m'vekisa kufana ni ndolowani ya diso dakwe.

Eksodha 14:2

“Gela vanana va ka Israyeli ti to va txi tshumela va txi ya gova masoni ka Pi-Hahiroti, hagari ka Migodholi ni linene, masoni ka Bhahali-Safoni, anu mi na ya gova masoni ka wuwa wukhalo, hafuhi ni linene.

Eksodha 12:51

Ka ditshiku donedo Mkoma a humisile vanana va ka Israyeli ditikoni ka Egipta, ngu mthetho wa mabutho awe.

Masalmo 107:7

A to va tsimbitisa ngu nzila yo lulama, e va yisa ka ditiko di va fanelako kuaka ka dona.

Joxuwa 1:14

Vasikati vanu, vanana vanu, ni sifuyo sanu, si na sale ka ditiko dile Mosi a nga mi ninga, ngu didhawa dile da Jordhani; aniko anu mi na txhatuka mi di xomile, masoni ka vananu, votshe va tindena ni va mtamo, mi na va vhuna,

Dhewuteronome 17:16

Kambe mfumeliyo kha kulaveki ku eva ni mahantxhi o tala, hambi kukurumeta vathu ve tshumelela Egipta kasi kuya mana mahantxhi o tala; nguko Mkoma a ti khene: Kha mi na mbi tsimbila kambe ngu yona nzila yiya.

Joxuwa 4:12

Se vanana va Rubheni, ni vanana va Gadhi, ni hafu ya lihunzu la ka Manasi, va to tshawunyeta na va di xomile, masoni ka vanana va ka Israyeli, nga ti Mosi a ngadi va gelisile tona;

Joxuwa 4:13

hafuhi ka 40.000 wa vavamna va yimbi, na va di xomile, va to pinda masoni ka Mkoma, va txi ya kulwani, mikovani ka Jeriko.

Masalmo 136:16

Awule a nga tsimbitisa vathu vakwe amu txiwulani; nguko lirando lakwe nda kala kupinduka!

Genesisi 50:25

Se Josefa a mahile ti to vanana va ka Israyeli ve xambanya, a txi khene: “Mbimo yi Txizimu txi no mi endela, mi na thavisa marambu angu ka wuwa wukhalo mi tsula nawo.”

Eksodha 14:9

Vaegipta va to va londeta, va di ni otshe mahantxhi ni sikotxikani sa kona a mfumeli Faro, ni vagadhi va kona va mahantxhi ni dibutho da kona da yimbi, avava va nga ya va manela va di govile hafuhi ka linene, i ku hafuhi ka Pi-Hayiroti, masoni ka Bhahali-Zefomi.

Masalmo 68:8

mafu ma to dekadeka, se mati me wa ngu nzumani, ngu mhaka ya kuva txi diho Txizimu txa Sinayi, ngukuva a diho Mkoma, Txizimu txa Israyeli.